Ɔrɔmu Shiinbii 9

Kile à Izirayɛli shiinbii cwɔɔnrɔ

Sèeŋi mii ɲyɛ na yu yii á, kafinara bà mɛ, ɲaha kurugo yɛ mii ɲyɛ wu, mii zòmbilini yyaha à cû ke, lirʼà li cyêe mii na na sèeŋi mii ɲyɛ na yu na: 2 mii yyetanha wu ná mii nàvunŋɔ wu u ɲyɛ mii shiŋi shiinbii taan. 3 Laŋaŋke mɛ́ɛ nʼa mpyi a cwo mii na pi cyaga, maa mii yige Kirisita wwoɲɛɛge e bà pi si mpyi si jyè kuru wwoɲɛɛge e mɛ, lire mpyi na sí n‑táan mii i. 4 Pire pi ɲyɛ shiinbii, Kile à pi pyi u pyɛngɛ shiin. U à sìnampe kan pi á, maa tunmbyaare le ná pi e, maa kan pi á, pyiŋkanni na pi à yaa pi a uru pêre ke, maa lire cyêe pi na, maa yaayi ɲwɔmyahigii lwɔ́ pi á. 5 Pi à fworo tiibii niɲcyiibilʼe. Pire cye na Kirisita à pa, uru u ɲyɛ yaayi puni ɲùŋɔ na, uru u ɲyɛ Kile. U à yaa u a mpêre tèrigii puni i, fo tèekwombaa. Amiina.

6 Izirayɛli shiinbii niɲyahamii mɛ́nʼà Kile cyé ke, lire ɲyɛ a li cyêe na yaayi ɲwɔmyahigii Kile à lwɔ́ ke, na cyirʼà pyi kaɲwɔɔ baa mà dɛ! Yii li cè na Izirayɛli shiinbii puni ɲyɛ Izirayɛli tùluge shiin mɛ. 7  tùluge shiinbii puni ɲyɛ Ibirayima pyìi mɛ. Kile mpyi a yi jwo Ibirayima á na: «Ishaka pyìibii pi sí n‑pyi mu tùluge shiinbii.» 8 Lire ɲwɔhe ku ɲyɛ, pyìibii pi à ta mà tàanna ná sùpyire ɲyii wuuni i kanna ke, pire ɲyɛ Kile pyìi mɛ. Mpii pi à ta mà tàanna ná Kile ɲwɔmɛɛni i ke, pire pi ɲyɛ Ibirayima tùluge shiinbii. 9 Kile ɲwɔmɛɛni jwumpe pu ɲyɛ mpe: «Yyeela numɛcyiin, mii sí núru n‑pa, lire sí pyà ta Sara á.» 10 Lire kanni bà mɛ. Wuu sɔ̂nŋɔ Erebeka na mú! Urʼà u ŋampii laani lwɔ́ wuu tulyɛge Ishaka á. 11-13 Mà pyìibii yaha pi sàha si, si ŋkwɔ̀ kacɛnnɛ, lire ɲyɛ mɛ kapii pyi mɛ, Kile mpyi a yi jwo Erebeka á na yyahafooŋi Ezawu sí n‑pyi kàntugo wuŋi Yakuba báarapyi. Kile à jwo u Jwumpe Semɛŋi i na: «Mii à Yakuba funŋɔ lwɔ́ mà tòro Ezawu na.» Kile à yire jwo mà pi ta pi sàha si mɛ. Lirʼà li cyêe na kani Kile à bégelʼa yaha ke, u na u báaraŋi pyi na ntàanni ná lire e, u ɲyɛ na u pyi mà tàanna ná sùpyaŋi kapyiiŋkilʼe mɛ.

Kile maha sùpyire cwɔɔnre maha ntàanna ná u ɲyii wuuni i

14 Ɲyɛ ɲaha wuu sí n‑jwo yɛ? Lire e ke Kile ɲyɛ a tílʼà bɛ? Ɔnhɔ! Lire bà mɛ! 15 Sèeŋi na, u à yi jwo á na: «Shinŋi na mii la ɲyɛ si ɲùɲaara ta ke, mii sí ti ta uru na, shinŋi i mii la ɲyɛ si ɲùŋke pi ke, mii sí ku pi ná urʼe.» 16 Lire e ke sùpya ɲyii wuu, lire ɲyɛ mɛ u kapyiŋii sì n‑jà lire pyi li pyi mɛ, fo Kile ká ɲùɲaara ta ŋgemu na ke. 17 Kile Jwumpe Semɛŋi i, Kile à jwo Farɔn á na: «Mii à mu tìŋɛ saanre tatɛɛnge e bà mii fànhe ná mii mɛge si mpyi si nɔ ɲìŋke cyeyi puni i mu cye kurugo mɛ.» 18 Lire e ke shinŋi na Kile la ɲyɛ si ɲùɲaara ta ke, u maha ti ta urufoo na, u la ká mpyi si ŋgemu niŋgyii waha ke, u maha li waha. 19 Wà sí n‑jà mii yíbe na «Ɲaha na Kile maha núru na wuu cɛ̂ɛge yɛ? Jofoo u sí n‑jà n‑cyé u ɲyii wuuni i yɛ?» 20 Mu u ɲyɛ sùpya kanna ke, ɲaha ku ɲyɛ mu, ka mu u wá na Kile kyáali yɛ? Pwoore cwooni sí n‑jà li yaafooŋi pyi na ɲaha na u à lire yalʼamɛ yɛ la? 21 Pwoore cwɔ̀nhɔfooŋi bà u maha ti pyi u ɲɛɛmpe mà? Lʼaha u táan, ná pwoore ninure e, u sí n‑jà loŋgara cwoo, lire ɲyɛ mɛ cwotiile yaa. 22 Kile la mpyi si li cyêe na uru lùunʼà yîri, si u sífente cyêe mú. Ŋka cyire cwɔhigii cyi mpyi a yaa cyi kɛ̀ɛge ná Kile lùuni mpyi a yîri cyi taan ke, Kile à li kwû uye e, maa ɲcû uye na cyi taan. 23 Mpii na u à ɲùɲaara ta maa pi bégelʼa yaha pi i jyè nìɲyiŋi i ke, u à lire pyi si li cyêe sùpyire puni na na u pèente na ɲyɛ tɛgɛlɛ baa. 24 Wuu u à yyere ke, Yahutuubii kanni shwɔhɔlʼe bà u à wuu yyere mɛ, u à wuu pìi yyere mà fworo shwɔhɔlʼe mú. 25 Yire yʼà jwo Kile tùnntunŋi Oze sémɛŋi i na:

«Mpii pi ɲyɛ pi mpyi mii shiin mɛ,

mii sí pire pyi na shiin.

Supyishiŋi u ɲyɛ mii mpyi a u kyaa táan nayʼá mɛ,

mii sí uru kyaa táan nayʼá sèlʼe.

26 Cyage e yi mpyi a jwo pi á na

“Yii ɲyɛ mii shiinbii mɛ” ke,

kuru cyage ninuge e pi sí raa yiri Kile ɲyii wuŋi pyìibii.»

Ɲje Kile à jwo Izirayɛli shiinbii kyaa na ke

27 Kile tùnntunŋi Ezayi mú mpyi a jwo shiinbii kyaa na na:

«Izirayɛli shiinbii mɛ́ɛ ká sàa ɲyaha suumpe lwɔhe ɲwɔge nticɛnŋi fiige,

pi shin paanra kanna ti sí n‑shwɔ.

28 Yii li cè na jwumpe Kafooŋi Kile à jwo ke,

u sí pu fûnŋɔ feefee ɲìŋke na fwɔfwɔ.»

29 Kile tùnntunŋi Ezayi mú mpyi a fyânha a jwo na:

«Kàmpyi Siŋi Punifoo Kile ɲyɛ a mpyi a shinpaanra yaha tʼà kwôro wuu shiŋi i mɛ,

wuu shiŋi mpyi na sí n‑tò Sɔdɔmu fiige,

wuu shiŋi mpyi na sí n‑tò Gɔmɔri fiige.»

Mpii pi à dá Kirisita na ke, Kile à jwo na pire punʼà tíi

30 Ɲyɛ shiinbii pi mpyi pi mpyi na ntìiŋi caa mɛ, pirʼà ntìiŋi ta pi dániyaŋi kurugo; 31 mà li ta, shiinbii pi mpyi na sɔ̂nŋi si ntìiŋi ta kurigii ɲaaraŋi kurugo ke, pire ɲyɛ a u ta mɛ. 32 Ɲaha na lirʼà pyi yɛ? Pire pi ke, mà jwo pi dániyaŋi pyi si u ta ke, pi mpyi na u caa ná pi kapyiiŋkilʼe. Ɲyɛ lʼà pyi mu à jwo pi à búrugo kafaage na mà cwo. 33 Yire yʼà sémɛ Kile Jwumpe Semɛŋi i na:

«Yii wíi, kafaage na sùpyire sí raa búruge ke, mii à kuru yaha kànhe e.

Kafaage ku sí raa sùpyire cyáan ke, mii à kuru yaha wani.

Ŋka ŋgemu u à dá ku na ke, urufoo sì n‑sílege mɛ.»