7
Mii cìnmpyiibii,
mii à li cè na ɲje mii na yu yii á ke,
yii à yi cè a kwɔ̀,
ɲaha na yɛ yii à saliyaŋi karigii cè.
Yii à li cè na sùpyaŋi ká mpyi shì na,
lire e saliyaŋi fànhe maha mpyi u na.
2 Yyecyeenɛ na,
ceeŋi u ɲyɛ nàmbage e ke,
mà u pooŋi yaha shì na,
saliyaŋi maha pi pwɔ piye na.
Ŋka nɔ̀ŋi ká ŋkwû,
saliyaŋi fànhe saha ɲyɛ ceeŋi na nɔ̀ŋi kàmpanŋa na mɛa.
3 Ɲyɛ mà u pooŋi yaha shì na,
u aha ŋkàre nɔ̀ŋi wabɛrʼá,
u à jacwɔrɔ pyi.
Ŋka u pooŋi ká ŋkwû,
saliyaŋi saha ɲyɛ u ɲuŋʼi mɛ,
u aha ŋkàre nɔ̀ŋi wabɛrʼá,
u ɲyɛ a jacwɔrɔ pyi mɛ.
4 Mii cìnmpyiibii,
amuni yii wuuni mú ɲyɛ.
Li mpyi mu à jwo Musa Saliyaŋi u mpyi yii pooŋi.
Ŋka numɛ,
lʼà pyi mu à jwo yii à kwû ná Kirisita e.
Lire e ke yii pooŋi fànhe saha ɲyɛ yii na mɛ.
Yii na ɲyɛ nɔ̀ŋi wabɛrʼá ŋgemu u à ɲɛ̀ a fworo kwùŋi i ke.
Lirʼà pyi bà yii si mpyi sʼa kacɛnŋii pyi sʼa Kile pêre mɛ.
5 Yii li cè na tèni i wuu mpyi na wuu ɲyii karigii pyi ke,
Musa Saliyaŋi mpyi a wuu ɲyii karigii nimpegigii lage pyi kʼà wuu yaha kapegigii na,
ɲcyiimu ná Saliyaŋi mpyi a kàntugo wà yiyʼá ke.
Lire mpyi a wuu le kwùŋi kuni i.
6 Numɛ wuu à fworo Musa Saliyaŋi bilere e,
ɲaha kurugo yɛ wuu mpyi uru ŋgemu cye e kasujyii fiige ke,
wuu à kwû uru kàmpanŋke na.
Saliyaŋi nizemɛŋi u ɲyɛ ke,
wuu mpyi maha ɲcaa sʼa ɲaare sʼa ntàanni ná urʼe,
ŋka numɛ,
Kile Munaani à fànhe kan wuu á,
wuu u ɲaare ɲaaraŋkanna nivɔnnɔ na.
Musa Saliyaŋi maha kapegigii cyêre
7 Ɲyɛ mpe funŋke e,
ɲaha mii la ɲyɛ si jwo yɛ?
Musa Saliyaŋi na ɲyɛ kapii la?
Mà byanhara bá la!
Saliyaŋi u à mii pyi mii à kapiini cè.
Uru baare e,
mii mpyi na sì n‑cè na ɲyipɛɛnni na ɲyɛ kapii mɛ.
Ɲje yʼà jwo Saliyaŋi i na:
«Ma hà ma supyiɲɛɛŋi cyeyaage ɲyipɛɛn pyi mɛ» yire yʼà mii pyi mii à li cè kapiib.
8 Ɲyɛ Saliyaŋi à pyi kaɲuŋɔ mà kapegigii mpyiŋi lage tîrige mii funŋʼi pyiŋkannigii niɲyahagii na.
Ɲaha na yɛ Saliyaŋi kàmpyi u ɲyɛ mɛ,
wuu mpyi na sí wuu kapegigii cè mɛ.
9 Tèni lʼe,
mii mpyi a Saliyaŋi cè mɛ,
ŋka tèni i u à cyêe mii na ke,
ka mii i nta a cè na mii na kapegigii pyi,
10 na mii laage mpyi a tɔɔn Kile na.
Lire e Saliyaŋi u mpyi a yaa u shìŋi niŋkwombaaŋi kuni le mii taan ke,
u à kwùŋi kuni le mii taan.
11 Kapegigii mpyiŋi lage ku ɲyɛ mii i ke,
kurʼà mii wurugo,
maa mii pyi mii à kwû Saliyaŋi cye kurugo.
12 Ɲyɛ Saliyaŋi à fworo Kile e,
ɲje yʼà jwo u e ke,
yire mú à tíi,
maa ɲwɔ.
13 Lire e ke yaage kʼà ɲwɔ ke,
kuru kʼà pyi kaɲuŋɔ si mii bò la?
Mà byanhara bá la!
Ŋka kuru yaagʼà pyi kaɲuŋɔ mà kapegigii mpyiŋi lage pêe mii funŋʼi,
ka lire si mii pyi mii à kwû.
Lirʼà pyi mii si li cè na mii kapyiiŋkii ɲyɛ a tíi mɛ.
Mii aha ɲcè na mii à Kile Saliyaŋi kuni yaha,
mii maha ɲcè na mii sɔ̀nŋɔre ɲyɛ a sàa ɲwɔ mɛ.
14 Sèeŋi na,
wuu à li cè na Saliyaŋi à yîri Kile yyére,
ŋka mii na ɲyɛ sùpya,
ŋgemu fànha kʼà cyɛ́rɛ ke.
Mii na ɲyɛ mu à jwo biliwe kapegigii mpyiŋi kàmpanŋke na.
15 Ɲaha na yɛ nde mii na mpyi ke,
mii ɲyɛ na lire yyaha cìni mɛ.
Nde lʼà táan mii á ke,
mii ɲyɛ na lire pyi mɛ,
nde lʼà pɛn mii á ke,
lire mii maha mpyi.
16 Ɲyɛ nde lʼà pɛn mii á ke,
ná lire mii maha mpyi,
lire e ke,
mii à li cè na Saliyaŋi à ɲwɔ.
17 Ŋka mii fànha ɲyɛ naye na mɛ,
ɲaha na yɛ kapegigii mpyiŋi lage ku ɲyɛ mii i ke,
kuru ku maha mii yaha li na.
18 Mii à li cè na kacɛnŋkii mpyiŋi fànha ɲyɛ mii i mɛ.
Sèeŋi na,
mii la maha mpyi sʼa katiigii pyi,
ŋka mii maha jà mɛ.
19 Kacɛnŋkii mii la maha mpyi sʼa mpyi ke,
mii ɲyɛ na jìni na cyire pyi mɛ fo kapegigii,
cyire lage sí ɲyɛ mii na mɛ.
20 Nde lʼà pɛn mii á ke,
mii aha a lire pyi,
lirʼà li cyêe na mii fànha ɲyɛ naye na mɛ,
ŋka kapegigii mpyiŋi sɔ̀nŋɔre ti ɲyɛ mii i ke,
tire fànhe ku ɲyɛ mii na.
21 Mii à nde kani kàanmucya naye e,
tère o tère e mii la ɲyɛ sʼa kacɛnŋii pyi ke,
kapiini mpyiŋi lage ku maha mii ta.
22 Kile Saliyaŋi kyalʼà sàa táan mii á.
23 Ŋka mii maha kani labɛrɛ fànha ɲya naye na,
ndemu li ɲyɛ li ɲyɛ mii ɲyii wuuni mɛ.
Lire li maha mii yaha kapegigii mpyiŋi na,
mii a sì mpyi cyi biliwe.
24 Ei!
Mii wuunʼà kɛ̀ɛge dɛ!
Mii sɔ̀nŋɔpeere ti sí kwùŋi nɔ mii na ke,
jofoo u sí mii shwɔ tire na yɛ?
25 Wuu Kile kêe,
ɲaha na yɛ wuu Kafooŋi Yesu Kirisita à wuu shwɔ.
Ɲyɛ mii la na ɲyɛ sʼa Kile Saliyaŋi kurigii ɲaare,
ŋka kapegigii mpyiŋi lage kurugo,
mii ɲyɛ a jà a li pyi mɛ.