Timɔti à bâra Poli ná Silasi na
16
Lire kàntugo ka Poli ná Silasi si ŋkàre Dɛribe kànhe e,
maa yîri wani mà kàre Lisitiri kànhe e.
Cyelempyaŋi wà na mpyi wani Lisitiri kànhe e,
uru mɛge na mpyi Timɔti.
U nuŋi na mpyi dánafoo,
Yahutu u mpyi ure,
ŋka u tuŋi na mpyi Girɛki.
2 Cìnmpyiibii dánafeebii pi mpyi Lisitiri kànhe e,
mà bâra mpii pi mpyi Ikoni kànhe e ke,
pire mpyi na u mɛtange yiri.
3 Lire kurugo Poli la mpyi si u pyi u báarapyiɲɛɛ.
Ɲyɛ Yahutuubii pi mpyi wani ke,
pire kurugo,
ka Poli si u kwɔ̀n,
ɲaha na yɛ sùpyire puni mpyi a cè na u tuŋi na ɲyɛ Girɛkia.
4 Pi niŋkaribii na,
kànha maha kànha na pi à tòro ke,
Yesu tùnntunmpii ná Zheruzalɛmu kànhe dánafeebii kacwɔnribii mpyi a karigii ɲcyiimu jwo ke,
ka pi i cyire jwo yire kànyi dánafeebilʼá,
maa li cya pi á,
na pi a cyi kurigii ɲaare.
5 Là mpyi na bârali dánafeebii kuruɲyi fànhe ɲyahaŋi na,
pìi sí i bârali pi na canŋa maha canŋa.
Kile kacyeeni lʼà Poli pyi u à kàre Masedoni kùluni i ke
6 Ɲyɛ Poli ná u shɛ̀rɛfeebii la mpyi si sà Kile jwumpe jwo Azi kùluni i,
ŋka Kile Munaani ɲyɛ a ɲɛɛ mɛ.
Lire e ka pi i Firijyi kùluni jyiile mà kàre Galati kùluni i.
7 Pi à sà byanhara Misi kùluni na ke,
ka pi la si mpyi si ŋkàre Bitini wuuni i,
ŋka Yesu Munaani b ɲyɛ a ɲɛɛ mɛ.
8 Ɲyɛ ka pi i Misi kùluni jyiile mà kàre Torasi kànhe na.
9 Mà Poli yaha wani,
Kile à kani là cyêe u na.
Canŋka numpilage e,
u à Masedoni kùluni shinŋi wà niɲjyerewe ɲya,
ka uru si jwo:
«Poli,
mii na mu ɲáare,
ta ma Masedoni i ma a wuu tɛ̀gɛ.»
10 Ɲyɛ Poli à yire jwo wuu á ke,
ka wuuc u ntílʼa li lwɔ́ wuye funŋʼi si ŋkàre Masedoni i,
ɲaha na yɛ wuu à li ɲya na nàkaana baa,
Kile à li cyêe wuu na na wuu sà Jwumpe Nintanmpe jwo wani shiinbilʼá.
Lidi à uye kan Kafooŋi á Filipi kànhe na
11 Ka wuu u yîri Torasi kànhe e,
maa bakwɔɔge lwɔ́ maa ntílʼa kàre Samɔtirasi kànhe e.
Kuru canŋa nùmpanŋa,
maa ŋkàre Nɛyapolisi kànhe e.
12 Maa yîri wani mà kàre Filipi kànhe na,
kuru ku ɲyɛ Masedoni kùluni kànhe niɲcyiige,
maa mpyi Ɔrɔmu shiinbii màrampe e.
Wuu à canmpyaa pyi kuru kànhe e.
13 Canŋɔŋkʼà pa nɔ ke,
ka wuu u ŋkàre kànhe kàntugo yyére dùge ɲwɔge na,
ɲaha na yɛ wuu à li ta na wani pi maha Kileɲarege pyid.
Wuu à sà cyeebii mpiimu ta pi à bínni wani ke,
wuu à Kile jwumpe jwo pirʼá.
14 Pire cyeebilʼe,
wà mɛge na mpyi Lidi,
uru mpyi a yîri Cyatiri kànhe e,
u mpyi na fyáge Kile na.
Uru ceeŋi mpyi maha vàanɲyi niɲyɛyi loŋgara wuyi pɛ́rɛli.
Ka Kafooŋi Kile si u zòmbilini múgo,
maa u pyi u à ɲɛɛ Poli jwumpe na.
15 Ka u ná u pyɛngɛ shiinbii puni si batize.
Lire kàntugo ka u u wuu pyi:
«Ná yii sʼà dá li na na sèeŋi na mii à naye kan Kafooŋi á,
yii a ma mii pyɛnge e.»
U à wuu kárama fo wuu à ɲɛɛ.
Pi à Poli ná Silasi cû a tò kàsuŋi i
16 Canŋka mà wuu niŋkaribii yaha Kileɲarege cyage e,
wuu à círi ná bilicwoŋi wʼe.
Jínaŋi wà na mpyi u e,
uru jínaŋi mpyi maha u pyi u u cɛɛre pyi.
Uru ceeŋi mpyi maha wyɛ́rɛɲyahaga taa lire céepyiini i na ŋkaan u ɲùŋufeebilʼá.
17 Ka uru ceeŋi si ntaha wuu ná Poli fye e,
maa ŋko fànha na:
«Mpii shiinbii na ɲyɛ Kileŋi nìɲyi wuŋi báarapyii.
Kuni i zhwoŋi ɲyɛ na ntaa ke,
lire pi ɲyɛ na ɲcyêre yii na.»
18 Ceeŋʼà lire pyi canmpyaa niɲyahagii funŋʼi,
li ɲyɛ a pa ɲwɔ mɛ.
Canŋka ka Poli lùyiri wuŋi si yyaha kɛ̂ɛnŋɛ u á,
maa jínaŋi pyi:
«Yesu Kirisita mɛge na,
fworo ŋge ceeŋi i.»
Ka jínaŋi si ntílʼa fworo u e.
19 Uru bilicwoŋi ɲùŋufeebilʼà li ɲya na wyɛ́rɛŋi pire ɲyɛ na ntaa u céepyiini cye kurugo ke,
na lire kuni na ŋko sʼa ntùni ke,
ka pi i Poli ná Silasi cû,
cyage e sùpyire maha bínnini ke,
maa ŋkàre wani ná pi e fànhafeebii yyére.
20 Pi à nɔ wani ke,
maa jwo yukyaabilʼá:
«Mpii shiinbii wá na wuu kànhe ɲyàha na wùruge.
Yahutuu pi ɲyɛ pi pi.
21 Pi wá na karigii ɲcyiimu yu sùpyirʼá ke,
kapyimbaagii cyi ɲyɛ cyi cyi,
wuu Ɔrɔmu shiinbii sì ɲɛɛ cyi na,
si nta ɲjyere cyi mpyi na mɛ.»
22 Sùpyirʼà yire lógo ke,
ka pi lùgigii si yîri Poli ná Silasi taan.
Ka yukyaabii si pi pyi pi à pi vàanɲyi dìrilʼa wwû pi na,
maa pi bwɔ̀n ná kàsɔrigilʼe.
23 Pi à pi bwɔ̀n sèlʼe mà kwɔ̀ ke,
maa pi le kàsuŋi i,
maa kasubage kàanmucyafooŋi pyi u a pi kàanmucaa sèlʼe.
24 Pi à puru jwo kàanmucyafooŋʼá ke,
ka u u ntílʼa Poli ná Silasi lèŋɛ kasubage bapyɛɛgii puni kàntugo yyére wuuni i,
maa pi tooyi le a shwɔ̂hɔ cinŋke kà na.
25 Ɲyɛ ɲìɲiŋke byanhampe e,
Poli ná Silasi mpyi na Kile ɲáare,
maa Kile pèente myahigii cêe,
kàsujyiibii sanmpii sí i núru.
26 Mà pi yaha puru na,
ka ɲìŋke si mpâlʼa cyɛ̂ɛnnɛ,
maa kasubage cúnŋɔ cúnŋɔ sèe sèlʼe,
ka ku ɲwɔyi puni si ntílʼa múgo,
ka kàsujyiibii puni yɔ̀rɔyi si ŋkwɔ̀n ŋkwɔ̀n a láha pi na.
27 Ka kasubage kàanmucyafooŋi si ɲɛ̀.
U à kasubage ɲwɔyi ɲya yʼà múgo ke,
maa wá na sɔ̂nŋi na kàsujyiibilʼà fê a fworo,
maa u ŋwɔtɔɔnge dìrʼa wwû si ntɛ̀gɛ uye bòe.
28 Ka Poli si jwo fànha na:
«Ma hà kapii pyi maye na mɛ!
Wuu puni na naha naha!»
29 Ɲyɛ ka kasubage kàanmucyafooŋi si bɛ̀ɛnmɛ cya.
U fyagara wuŋi fo na ɲcyɛ̂ɛnni,
maa fyâlʼa jyè babilini i,
mà sà ɲcwo Poli ná Silasi fere e.
30 U à yîri ke,
maa pi yige ntàani na,
maa jwo:
«Na cìnmpyii,
ɲaha mii à yaa mii u pyi si nùmpanŋa ta yɛ?»
31 Ka pi i u pyi:
«Dá Kafooŋi Yesu na,
lire ká mpyi,
mu ná ma pyɛngɛ shiinbii sí nùmpanŋa ta.»
32 Lire kàntugo ka Poli ná Silasi si Kafooŋi jwumpe jwo u ná u pyɛngɛ shiinbii punʼá.
33 Kuru numpililyage e,
ka kasubage kàanmucyafooŋi si ŋkàre ná Poli ná Silasi i,
maa sà pi nɔɔyi wyɛrɛ pyi,
maa ntílʼa batize mà bâra u pyɛngɛ shiinbii puni na.
34 Lire kàntugo maa Poli ná Silasi pyi pi à dùgo u bage nìɲyiŋi na,
maa pi kan pi à lyî.
Uru nàŋi ná u pyɛngɛ shiinbii puni mpyi funntange e,
ɲaha na yɛ pi mpyi a piye kan Kile á.
35 Ɲyɛ ɲyɛ̀gʼà pa múgo ke,
ka yukyaabii kuruŋke si pìi tun pi sà yi jwo kasubage kàanmucyafooŋʼá na u Poli ná Silasi cye yaha.
36 Ka kasubage kàanmucyafooŋi si sà Poli pyi:
«Fànhafeebii naha a tùnntunmii yaha pi à pa yi jwo mii á na mii u yii cye yaha.
Yii sí n‑jà n‑fworo sʼa sì yyeɲiŋke e.»
37 Ka Poli si pi pyi:
«Pi ɲyɛ a wuu yalʼa yíbe mɛ,
maa wuu bwɔ̀n,
mà li ta wuu na ɲyɛ Ɔrɔmu shiinf.
Lire kàntugo pi à wuu le kàsuŋi i.
Numɛ,
pi la na ɲyɛ si núru wuu ŋwɔhɔ ɲjige kàsuŋi i la?
Lire mpyi ɲyɛ mɛ,
fo pire yabilimpii pi pa wuu yige.»
38 Ka tùnntunmpii si núrʼa kàrʼa sà yire jwo yukyaabilʼá.
Pi à lógo na Poli ná Silasi na ɲyɛ Ɔrɔmu shiin ke,
ka pi i fyá,
39 maa ŋkàrʼa sà piye mpìnni kan Poli ná Silasi á,
maa pi yige kàsuŋi i,
maa li ɲáare pi á na pi fworo kànhe e.
40 Pi à fworo kàsuŋi i ke,
maa ŋkàre Lidi yyére,
mà sà dánafeebii ta wani,
maa pi yɛrɛ maa màban le pi e,
maa nta a kàre.