Pyɛri à cwɔ̀hɔmɔfooŋi wà cùuŋɔ
3
Canŋka yàkoŋɔ,
Kileɲarege tèni i,
Pyɛri ná Yuhana à kàre Kileɲaarebage e.
2 Lirʼà pi ta pi à sà faanŋi wà yaha Kileɲaarebage tajyiɲwɔge kà na,
pi maha ŋkemu pyi:
«Tajyiɲwɔge Nisinaŋke» ke.
Amuni u mpyi a si.
Canŋa maha canŋa,
pi mpyi maha mpa u yaha kuru cyage e,
sùpyire ti ɲyɛ na jyè Kileɲaarebage e ke,
bà u si mpyi sʼa pire ɲáare mɛ.
3 Uru faanŋʼà Pyɛri ná Yuhana ɲya tajyige e maa pi ɲáare.
4 Ka pi i u yalʼa wíi,
ka Pyɛri si jwo:
«Wuu wíi.»
5 Ka nàŋi si yyahe yîrigʼa le pi e.
U mpyi na sɔ̂nŋi na pi sí yaaga kan urʼá.
6 Ɲyɛ ka Pyɛri si u pyi:
«Wyɛ́rɛ,
lire ɲyɛ mɛ sɛɛn ɲyɛ mii á mii u kan mu á mɛ,
ŋka yaage ku ɲyɛ mii á ke,
mii sí kuru kan mu á.
Nazarɛti kànhe shinŋi Yesu Kirisita mɛge na,
yîri ma a ɲaare!»
7 U à yire jwo ke,
maa nàŋi cû kàniŋɛ cyɛge na mà yîrige.
Ɲyɛ ka nàŋi tooyi ná u nintajyiigii si ntílʼa cyiye ta.
8 Ka u u yi a yîrʼa yyére,
maa li ɲwɔ cû na ɲaare,
maa sà jyè Kileɲaarebage ea ná Pyɛri ná Yuhana i,
maa ɲaare,
maa yini,
maa Kile kêre.
9 Sùpyire punʼà u ɲya u u ɲaare marii Kile kêre.
10 Pi mpyi a li cè na nàŋi u mpyi maha ntɛ̀n Kileɲaarebage Tajyiɲwɔge Nisinaŋke na maa sùpyire ɲáare ke,
uru wi.
Pyiŋkanni na uru nàŋʼà pyi maa jà na ɲaare ke,
ka lire si sùpyire bilibili.
11 Nàŋi mpyi a taha a yaha Pyɛri ná Yuhana fye e.
Ka sùpyire kàkyanhala wuubii si fê a kàrʼa sà bínni pi taan,
Kileɲaarebage ŋkubabwɔhe kà ɲwɔhʼi,
pi mpyi a Saanŋi Solomani mɛge le kuru ŋkubage na.
12 Pyɛri à sùpyire ɲya ke,
maa jwo:
«Wuu cìnmpyiibii,
Izirayɛli shiinbii,
ɲaha na nde kanʼà yii kàkyanhala yɛ?
Ɲaha na yii na wuu wílʼamɛ mu à jwo wuu yabilimpii sífente ná wuu Kile yyahafyagare tʼà wuu pyi wuu à ŋge nàŋi pyi u à yîri na ɲaare yɛ?
13 Ibirayima ná Ishaka ná Yakuba ná wuu tulyeyi sanɲyi u Kileŋi,
u à u báarapyiŋi Yesu ɲùŋke yîrige ná lʼe.
Yii à u le fànhafooŋi Pilati cye e,
ka uru si li ta na yaaga ɲyɛ a yaa ku pyi u na mɛ,
ka yii i ɲcyé u na Pilati ɲyii na.
14 Ŋge u à ɲwɔ maa ntíi ke,
yii à cyé uru na,
ŋge u à boore pyi ke,
maa Pilati ɲáare na u uru cye yaha.
15 Ŋge u ɲyɛ na shìŋi niŋkwombaaŋi kaan ke,
yii à uru bò,
ŋka Kile à u ɲɛ̀ a yige kwùŋi i.
Wuu à u ɲya u ɲɛŋkwooni kàntugo.
16 Ŋge nàŋi u ŋge yii i ɲaa,
ná yii à u cè ke,
wuu à dániyaŋi pyi Yesu na,
lire cye kurugo,
u à jà a yîrʼa yyére.
Wuu à dániyaŋi pyi Yesu mɛge na,
lire lʼà ŋge nàŋi yampe kwɔ̀ feefee bà yii puni ɲyii wá u na mɛ.
17 Mii cìnmpyiibii,
mii à li cè na li ɲcèmbaaŋi u à yii ná yii ɲùŋufeebii pyi yii à lire kani pyi.
18 Lire e ke Kile à jwumpe mpemu jwo fo tèemɔni i u tùnntunmpii cye kurugo ke,
purʼà fûnŋɔ.
U mpyi a jwo na Kile Niɲcwɔnrɔŋi à yaa u kyaala.
19 Lire e ke yii yii toroŋkanni kɛ̂ɛnŋɛ,
yii i yiye kan Kile á,
bà u si mpyi si yii kapegigii yàfa yii na mɛ.
20 Lire ká mpyi,
Kafooŋi Kile sí taŋɔŋɔ kan yii á.
Mà bâra lire na,
ŋge u à yaha yii yahare e ke,
u sí uru tùugo yii á,
Yesu u ɲyɛ Kile Niɲcwɔnrɔŋi ke,
uru kyaa li.
21 Ŋka u à yaa u tɛ̀ɛn nìɲyiŋi na fo u aha yaayi puni pyi yʼà núru yi lyempe e,
yire Kile à jwo fo tèemɔni i u tùnntunmpii cye kurugo.
22 Ɲyɛ Kile tùnntunŋi Musa à jwo
“Bà wuu Kafooŋi Kile à mii tun mɛ,
amuni u sí n‑pa yii cìnmpworoŋi wà pyi u tùnntunŋɔ mii fiige.
U aha jwumɔ maha jwumɔ jwo yii á ke,
yii i ɲɛɛ puru na.
23 Shin maha shin u ɲyɛ u ɲyɛ a ɲɛɛ uru tùnntunŋi jwumpe na mɛ,
urufoo sí n‑bò n‑yige sùpyire shwɔhɔlʼeb.”
24 Ɲyɛ mà lwɔ́ Kile tùnntunŋi Samuwɛli na,
Kile tùnntunmpii punʼà jwo nde tèni kyaa na mú,
Musa fiige.
25 Jwumpe Kile tùnntunmpilʼà jwo ke,
purʼà jwo yii á mú.
Tunmbyaare Kile à le ná yii tulyeyi i,
tèni i u à jwo Ibirayima á na uru sí jwó le ɲìŋke supyishiŋi punʼá u tùluge cye kurugo ke,
tire tunmbyaarʼà le ná yii e múc.
26 Lire e Kile à u báarapyiŋi yaha a pa yii Izirayɛli shiinbii mɛɛ na yyecyiige na,
u u jwó le yii á,
yii i láha pege karigii na.»