Yesu à jwo na uru na ɲyɛ ɛrɛzɛn cige
15
Ka Yesu si núrʼa jwo:
«Mii u ɲyɛ ɛrɛzɛn cige sèe woge,
mii Tuŋi u ɲyɛ ku faafooŋi.
2 Ŋkéŋɛ maha ŋkéŋɛ ku ɲyɛ mii na,
ku sí ɲyɛ na yasɛrɛ pyi mɛ,
u sí kuru kwɔ̀n n‑wà.
Ŋka ŋkéŋɛ maha ŋkéŋɛ ku ɲyɛ mii na,
marii seni ke,
u sí kuru bînni,
là sʼa bârali ku zeŋi na.
3 Kàlaŋi mii à kan yii á ke,
uru kurugo yii à fíniŋʼa kwɔ̀ Kile yyahe taan.
4 Yii tɛ̀ɛn mii wwoɲɛɛge e,
mii sí n‑tɛ̀ɛn ná yii e mú.
Ɛrɛzɛnŋi ŋkéŋke sì n‑jà n‑se ná ku ɲyɛ a ta cige na mà yɛ.
Amuni yii ɲyɛ,
ná yii ɲyɛ a tɛ̀ɛn mii wwoɲɛɛge e mɛ,
yii sì n‑jà yafyin pyi Kile a mɛ.
5 Mii u ɲyɛ ɛrɛzɛn cige,
yii pi ɲyɛ ku ŋkéɲyi.
Ŋgemu ká ntɛ̀ɛn mii wwoɲɛɛge e,
ka mii i ntɛ̀ɛn urufoo woge e ke,
urufoo sí raa kacɛnŋii niɲyahagii pyi Kile á.
Mii aha mpyi mii ɲyɛ ná yii e mɛ,
yii sì n‑jà yafyin pyi Kile á mɛ.
6 Ŋgemu ká mpyi u ɲyɛ a ɲɛnʼa tɛ̀ɛn mii wwoɲɛɛge e mɛ,
urufoo sí n‑wà cyíinŋi na,
bà ɛrɛzɛnŋi ŋkéɲyi maha ŋkwɔ̀n a wà mɛ.
Yi sí n‑waha,
pi sí yi lwɔ́ n‑wà nage e.
7 Yii aha ntɛ̀ɛn mii wwoɲɛɛge e,
ka mii jwumpe si ŋkwôro yii funŋʼi,
kyaa maha kyaa yii na ɲcaa ke,
yii aha lire ɲáare,
li sí n‑pyi yii á.
8 Yii aha kacɛnŋii niɲyahagii pyi Kile á,
lire li sí li cyêe na yii ɲyɛ mii cyelempyii.
Lire e mii Tuŋi mɛge sí n‑pêe.
9 Bà mii kyalʼà táan na Tuŋi á mɛ,
amuni yii kyalʼà táan mii á.
Yii tɛ̀ɛn mii tàange e.
10 Yii aha a mii toŋi kurigii ɲaare,
yii sí n‑kwôro mii tàange e,
bà mii à na Tuŋi wuŋi kurigii ɲaara maa ŋkwôro u tàange e mɛ.
11 Mii na mpe puni yu bà funntange ku ɲyɛ mii i ke,
kuru si mpyi si yii ɲî mɛ.
Lire e yii funntange sí n‑fûnŋɔ.
12 Mii toŋi u ŋge:
yii yiye kyaa táan yiyʼá,
bà yii kyalʼà táan mii á mɛ.
13 Mà ma múnaani kan kwùŋʼá ma ceveebii kurugo,
tàange sì n‑tòro kuru na mɛ.
14 Nde mii à jwo yii á ke,
yii aha a lire pyi,
lire e yii sí n‑pyi mii cevee.
15 Mii saha sì raa yii yiri na báarapyii mɛ,
ɲaha na yɛ báarapyiŋi sì n‑jà u kàfooŋi karigii puni cè mɛ.
Ŋka mii à yii pyi na ceveebii,
ɲaha na yɛ kyaa maha kyaa mii à ta na Tuŋi á ke,
mii à yii kâla cyire puni na.
16 Yii bà pi à mii cwɔɔnrɔ mà dɛ!
Ŋka mii u à yii cwɔɔnrɔ mà pyi tùnntunmii,
yii raa báare Kile á,
u u mpyi báara ŋgemu tɔ̀ɔnŋi u ɲyɛ u sì n‑kwɔ̀ mɛ.
Lire pyiŋkanni na,
yii aha kyaa maha kyaa ɲáare mii Tuŋi á ná mii mɛge e ke,
u sí lire kan yii á.
17 Nde mii na ɲcaa yii á ke,
lire li ɲyɛ yii yiye kyaa táan yiyʼá.»
Diɲyɛ sùpyire sí n‑pa dánafeebii tùn
18 «Yii kyaa ká mpɛn diɲyɛ sùpyirʼá,
yii li cè na mii kyalʼà fyânha a pɛn pi á.
19 Yii ná diɲyɛ sùpyire nʼa mpyi niŋkin,
yii kyaa mpyi na sí n‑táan pi á,
ɲaha na yɛ yii mpyi na sí n‑pyi pi á.
Ŋka yii saha ɲyɛ pi á mɛ,
mii à yii cwɔɔnrɔ pi shwɔhɔlʼe.
Lire kurugo yii kyalʼà pɛn pi á.
20 Jwumpe mii à fyânha a jwo yii á ke,
yii funŋke cwo puru na na báarapyiŋi sì n‑jà n‑pêe n‑tòro u ɲùŋufooŋi na mɛ.
Ná pìlʼà mii kyérege,
pìi sí yii kyérege mú.
Ná pìlʼà ɲɛɛ mii jwumpe na,
pìi sí ɲɛɛ yii wumpe na mú.
21 Ɲyɛ cyire karigii puni sí n‑pyi yii na mii mɛge kurugo,
ɲaha na yɛ ŋge u à mii tun ke,
pi ɲyɛ a uru cè mɛ.
22 Mii nʼa mpyi mii ɲyɛ a pa maa jwo ná pi e mɛ,
làwwugo mpyi na sì n‑jà n‑cyán pi na mɛ.
Ŋka numɛ tashwɔgɔ ɲyɛ pi na mɛ.
23 Mii kyalʼà pɛn ŋgemu á ke,
mii Tuŋi kyaa mú à pɛn urufolʼá.
24 Karigii cyi à sìi sùpya sàha cyi pyi a ɲya mɛ,
kàmpyi mii mpyi a cyire pyi a cyêe pi na mɛ,
pi kapegigii yoge sàha mpyi na sì n‑jà n‑kwɔ̀n pi na mɛ.
Ŋka numɛ,
pi mɛ́nʼà cyi ɲya ke,
lire ná li wuuni mú i,
pi à mii ná Tufooŋi kyaa pɛn piyʼá.
25 Lire pyiŋkanni na,
ɲje yi mpyi a sémɛ pi Kile Jwumpe Semɛŋi i na “Pi à mii kyaa pɛn piyʼá ɲùŋɔ baaa” ke,
yirʼà fûnŋɔ.