Yesu cìnmpyiibii ɲyɛ a dá u na mɛ
7
Lire kàntugo Yesu à tòro ná ɲani i Galile kùluni i,
u ɲyɛ a ɲɛnʼa jyè Zhude kùluni i mɛ,
ɲaha na yɛ Yahutuubii ɲùŋufeebii mpyi na u caa si mbò.
2 Yahutuubii vùnɲyi kataanni mpyi a byanhara a kwɔ̀.
3 Ka Yesu cìnmpyiibii si mpa u fye e,
maa yi jwo u á:
«Mu à yaa mu u yîri naha numɛ mà kàre Zhude kùluni i,
bà mu cyelempyiibii pi ɲyɛ kuru cyage e ke,
pire si mpyi si mu kakyanhala karigii ɲya mɛ.
4 Ŋgemu la ká mpyi sùpyire si u cè ke,
uru ɲyɛ a yaa u a karigii pyi ŋwɔhɔre e mɛ.
Ɲcyii kakyanhala karigii mu na mpyi amɛ ke,
li pyi bà diɲyɛŋi puni si mpyi si cyi ɲya mɛ.»
5 Yesu cìnmpyiibii mpyi na puru puni yu,
ɲaha na yɛ pi ɲyɛ a dá u na mɛ.
6 Ka Yesu si pi pyi:
«Lire tèepyiini sàha ŋkwɔ̀ a nɔ mii á mɛ.
Tère o tère lʼà táan yii á ke,
yii maha yii ɲyii wuuni pyi.
7 Yii kyaa sì n‑jà n‑pɛn diɲyɛ sùpyirʼá mɛ,
ŋka mii kyalʼà pɛn tʼá,
ɲaha na yɛ mii na li yu tʼá na ti kapyiiŋkii ɲyɛ a ɲwɔ mɛ.
8 Yii pi ke,
yii a sì kataannʼá.
Ŋka mii wi ke,
mii kɛ̀ɛge numɛ mɛ,
ɲaha na yɛ tèni sàha nɔ mii á mɛ.»
9 U à yire jwo pi á ke,
maa ntɛ̀ɛn wani Galile kùluni i.
Yesu à kàre vùnɲyi kataanni cyage e
10 Ɲyɛ Yesu cìnmpyiibilʼà kàrʼa kwɔ̀ kataannʼá ke,
ka Yesu si ŋwɔhʼa kàre uye niŋkin.
11 Lirʼà ta Yahutuubii ɲùŋufeebii mpyi na u caa sùpyire shwɔhɔlʼe,
fo na yíbili:
«Taa u ɲyɛ ke?»
12 Sùpyire shwɔhɔlʼe,
jwumɔ niɲyahama mpyi na ŋkunni Yesu kyaa na.
Pìi mpyi na ŋko:
«Ŋge nàŋi ɲyɛ sùpya niɲcɛnŋɛ» pìi sí i ŋko:
«Sèe bà mɛ,
u na sùpyire leni kuni nimpiini i.»
13 Mpe jwumpe puni mpyi na ŋwɔhɔni na yu,
ɲaha na yɛ pi mpyi na fyáge Yahutuubii ɲùŋufeebii na.
Yahutuubii pìlʼà nàkaana pyi ná Yesu i
14 Tèni i kataannʼà nɔ niŋke e ke,
ka Yesu si ŋkàre Kileɲaarebage ntàani na,
maa cye le na sùpyire kâlali.
15 Ka Yahutuubii ɲùŋufeebii si wá na ŋkyáali marii ŋko:
«Di ŋge nàŋʼà pyi maa Kile Jwumpe Semɛŋi cè na yu amɛ,
wà sí ɲyɛ a u kâla pu na mà yɛ?»
16 Ka Yesu si jwo pi á:
«Jwumpe na mii na sùpyire kâlali ke,
mii wumɔ bà mɛ,
mii tunvooŋi wumɔ pi.
17 Ŋgemu la ká mpyi sʼa Kile ɲyii wuuni pyi ke,
urufoo sí n‑pa n‑cè kampyi mii kàlaŋʼà fworo Kile e,
lire ɲyɛ mɛ mii yabiliŋi i u à fworo.
18 Ŋgemu ká a yu u yabiliŋi mɛge na ke,
uye pèente urufoo maha ɲcaa.
Ŋka ŋgemu la ká mpyi u tunvooŋi sʼa mpêre ke,
urufoo cye e sèeŋi ɲyɛ.
Kafinara ɲyɛ urufoo karigilʼe mɛ.
19 Kile tùnntunŋi Musa bà u à Saliyaŋi kan yii á mà?
Yii wà sí ɲyɛ na cyire karigii kuni ɲaare mɛ.
Ɲyɛ ɲaha na yii sí na mii caa raa bùu yɛ?»
20 Ka pìi si jwo sùpyire shwɔhɔlʼe:
«Jínacyan u ɲyɛ mu,
sùpya ɲyɛ na mu caa raa bùu mà dɛ!»
21 Ka Yesu si pi pyi:
«Mii à sàa ta naha kabwoo niŋkin pyi canŋɔŋke e ke,
ka lire si yii kàkyahanla la?
22 Yii maha pùnampyire kwùun canŋɔŋke e,
maa jwo na Musa u à lire kuni kan yii á (mà li ta Musa bà u à ŋkwɔ̀nŋi sìi mɛ,
ŋka yii tulyeyi yi.)
23 Ná yii maha pùnampyire kwùun canŋɔŋke e,
si nta raa Musa Saliyaŋi kuni ɲaare,
ɲyɛ ɲaha na yii na ntîri mii na na mii à sùpya nimpuŋɔ cùuŋɔ canŋɔŋke e yɛ?
24 Yii àha raa sùpyire la wwû kaɲyaani kanni na mɛ,
ŋka yii fyânha a sèeŋi cya yii cè,
yii i nta a pà jwo.»
25 Mà Yesu yaha jwumpe na,
Zheruzalɛmu kànhe shiinbii pìi mpyi na ŋko:
«Tá nàŋi pi na ɲcaa si mbò ke,
uru bà u ɲyɛ ŋge mɛ?
26 Ŋka u we,
u u yu sùpyire shwɔhɔlʼe,
pi sʼà fyâha maa u yaha wani.
Kampyi wuu ɲùŋufeebilʼà tɛ̀ɛn li taan na Kile Niɲcwɔnrɔŋi kyaa lʼà jwo ke,
na uru wi de?
27 Wuu sʼà ŋge nàŋi tayirige cè,
mà li ta Kile Niɲcwɔnrɔŋi ká mpa,
sùpya niŋkin sì u tayirige cè mɛ.»
28 Ɲyɛ mà Yesu yaha kàlaŋi na Kileɲaarebage e,
u à jwo fànha na:
«Yii à mii cè,
maa mii tayirige cè mú la?
Ŋka mii ɲyɛ a pa nayʼá mɛ,
sèeŋi na wà u à mii tun,
yii ɲyɛ a u cè mɛ.
29 Mii sʼà u cè,
ɲaha na yɛ mii à yîri u yyére,
uru mú sí u à mii tun.»
30 Yesu à yire jwo ke,
pi la mpyi si u cû.
Ŋka sùpya ɲyɛ a jà mɛ,
ɲaha na yɛ u tèecûni mpyi na sàha ŋkwɔ̀ a nɔ mɛ.
31 Lire ná li wuuni mú i,
sùpyire shwɔhɔlʼe shinɲyahara à dá Yesu na,
tire sùpyire mpyi na ŋko:
«Kile Niɲcwɔnrɔŋi ká bú mpa,
kakyanhala kani ndire u sí n‑pa n‑pyi mà núrʼa tòro ŋge nàŋi wuuni taan yɛ?»
Yahutuubii ɲùŋufeebilʼà pìi tun pi sà Yesu cû
32 Mpe sùpyire mpyi na ŋkunni Yesu kyaa na ke,
pʼà jyè Farizhɛɛnbii niŋgyigigilʼe.
Ɲyɛ ka Kile sáragawwuubii ɲùŋufeebii ná Farizhɛɛnbii si Kileɲaarebage saɲcwɔnsigibii pìi tun pi sà Yesu cû.
33 Ka Yesu si jwo:
«Mii saha sí tère nimbilere pyi yii shwɔhɔlʼe,
lire ká ntòro,
mii sí núru na tunvooŋi yyére.
34 Yii sí raa mii caa,
yii sì mii ɲya mɛ,
ɲaha na yɛ cyage e mii sí n‑pyi ke,
yii sì n‑jà nɔ wani mɛ.»
35 Ka Yahutuubii ɲùŋufeebii si wá na ŋko piyʼá:
«Lire tèni i ke,
taa ŋge nàŋi la ɲyɛ sʼa ŋkɛ̀ɛge,
marii ŋko na wuu sì n‑jà uru ɲya mà yɛ?
Yahutuubii pi à caala a kàrʼa sà ntɛ̀ɛn Girɛkiibii shwɔhɔlʼe ke,
kampyi pire yyére u la ɲyɛ sʼa ŋkɛ̀ɛge,
si sà a pi kâlali de?
36 Di mpe jwumpe ɲwɔhe ɲyɛ yɛ “Yii sí raa mii caa,
yii sì mii ɲya mɛ,
ɲaha na yɛ cyage e mii sí n‑pyi ke,
yii sì n‑jà nɔ wani mɛ”?»
Yesu à jwo uru sí Kile Munaani kan dánafeebilʼá
37 Ɲyɛ kataanni canzanŋkʼà nɔ ke,
kuru sí kʼà pyi canmbwɔhe,
ka Yesu si yîrʼa yyere sùpyire yyaha na,
maa jwo fànha na:
«Byaga ká wà ta,
urufoo u a ma mii yyére,
u u mpa bya.
38 Ŋgemu ká dá mii na ke,
lwɔhe ku maha shìŋi kaan ke,
kuru sí raa fwu raa fwore urufoo funŋke e ba fiige,
bà lʼà sémɛ Kile Jwumpe Semɛŋi i mɛ.»
39 Kile Munaani li mpyi na sí n‑pa n‑kan dánafeebilʼá ke,
lire kyaa Yesu mpyi na yu amɛ.
Lire tèni i Kile Munaani mpyi na sàha ŋkan mɛ,
ɲaha na yɛ Yesu mpyi na sàha dùgo nìɲyiŋi na u pèente e mɛ.
Sùpyire ɲwɔjwumpʼà táa Yesu kyaa na
40 Sùpyire shwɔhɔlʼe,
shinɲyahara à Yesu jwumpe lógo ke,
ka pìi si wá na ŋko:
«Nàkaana ɲyɛ mɛ,
Kile tùnntunŋi wuu na sigili ke,
uru u ɲyɛ ŋge nàŋi.»
41 Pìi bá mpyi na ŋko na Kile Niɲcwɔnrɔŋi wi.
Ka pìi si jwo:
«Di Kile Niɲcwɔnrɔŋi sí n‑jà n‑yîri Galile kùluni i n‑jwo yɛ?
42 Li ɲyɛ a sémɛ Kile Jwumpe Semɛŋi i na Kile Niɲcwɔnrɔŋi sí n‑fworo saanŋi Dawuda tùluge e mà?
Maa núrʼa sémɛ “U sí n‑yîri Dawuda kànsege na,
Bɛtilɛhɛmu kànhe e.”»
43 Ka sùpyire funzɔnŋɔre si ntáa Yesu kyaa na.
44 Pìi mpyi wani sùpyire shwɔhɔlʼe,
pire la mpyi si u cû,
ŋka pi wà ɲyɛ a cye taha u na mɛ.
45 Ka Kileɲaarebage saɲcwɔnsigibii si núrʼa kàre Kile sáragawwuubii ɲùŋufeebii ná Farizhɛɛnbii yyére.
Ka pire si pi yíbe:
«Di kʼà ta a jwo,
ka yii i mpa maa u yaha yɛ?»
46 Ka pi i pi pyi:
«Wuu sàha ŋkwɔ̀ a ŋge nàŋi jwumpe fiige lógo wuu niŋgyigigilʼe mɛ!»
47 Ka Farizhɛɛnbii si pi pyi:
«Yii mú à yiye yaha u à wurugo la?
48 Tá yii sàha ŋkwɔ̀ a lógo na wuu ɲùŋufooŋi wà niŋkin,
lire ɲyɛ mɛ Farizhɛnŋi wà niŋkin à dá u na?
49 Mpii pi à dá u na ke,
pire wà ɲyɛ a yaage cè Musa Saliyaŋi i mɛ,
pi punʼà láŋa.»
50 Pi wà na mpyi wani,
uru mɛge mpyi Nikodɛmu.
Uru u mpyi a shà Yesu yyére canŋka numpilage e.
Ka uru si jwumpe lwɔ́,
maa jwo Farizhɛɛnbilʼá:
51 «Mà tàanna ná wuu Saliyaŋi i,
wuu sì n‑sìi n‑jà yoge kwɔ̀n shin na,
mà li ta wuu ɲyɛ a fyânha a lógo u ɲwɔ na,
lire ɲyɛ mɛ wuu ɲyɛ a u kapyiini cè mɛ.»
52 Ka pi i u pyi:
«Lire e ke Galile kùluni shin mú u ɲyɛ mu la?
Sà Kile Jwumpe Semɛŋi wíi,
mu sì n‑sìi li ɲya wani na Kile tùnntunŋi wà sí n‑yîri Galile e mɛ.»