Paulus wasi atyahy kla-ru ikesy
ti iry ribun matohak mamin ti
Tesalonikake
Tun a khatu nekre klyosu kitab ne kralake
Iry matohak mamin ti nus Tesalonika-nare lenla rhe, ti kolkyabei ne ity Ebut Yesuske ana ima kla-ruake ne (2Tes. 2:1-2). Ode irire dum ti Tesalonika ne rtanuk ohe, sew a ity Ebutke ima ne neke kmya de. Ode dum dakun o lema rbuma rkarya de, kali rrekan o sew ity Ebutke ima ne kyarasy de (2Tes. 3:6, 11-12).
Paulus wasi atyahy a ikesy kla-ruake ti iry Tesalonika-nare, neke kbuanke nenma kola wasi atyahy a ikesy mamunake ti sir desy. Paulus syurat iry Tesalonika-nare ma ralkyaw ralatare manenen, biar ma irire roban de rtaba sir ode masunkwe kdyan sir (2Tes. 1:4-10). Ode yajar sir ti ktela ana madi ti, ti kyala ma kyarasy ti sew a ity Ebut Yesuske ima ne (2Tes. 2:1-12), ode syurat sir ma rtohak ity Ebutke manenen (2Tes. 2:13-15). Ode kete rakbo a karyake, de musti mo rkarya ma ral ma rbuak nam ti tenatare (2Tes. 3:6-15). Ti atyahy neke Paulus kyalamo ihes a sew ity Ebut Yesuske ti ana ima huruk ne (1:7-10; 2:1-12).
Kitab ne kisike kolnye
1. Tun mamunake (2Tes. 1:1-2).
2. Paulus syalak eraske ba ti Hulasokwe, khyali iry Tesalonika-nare, ode yalkyaw ralat a kralanare ma rtohak manenen ity Ebutke, biar ma irire roban de rtaba sir dakun (2Tes. 1:3-12).
4. Paulus iten ma iry Tesalonika-nare rsambayan ti Paulus sir, ode syurat Tesalonika-nare ma kete rakbo a karyake (2Tes. 3:1-15).
5. Paulus kyus wasi atyahkye ode yosa wasi salamke ti sir (2Tes. 3:16-18).