Musti mo tala ity wait matohakare ma ralatare ksyenan, de kete trekan ity tenatare kmyesan bo
15
Waikw o hatnimakw e!
Ity neke ity wait tohtohakare malkyakaw de,
ode the ktela Hulasokwe ilura ma taalanare de.
Dendye musti mo kete toit salke ti iry a wait tohtohakare lenla malkyakaw nekre,
ode lenla rhe ktela Hulasokwe ilura ma raalanare.
De musti mo taneti ity ralatare ti ktela lenla rahe desikre,
ode kete tala ktela desikre ma kyala ity ralatare ma ksyenan bo.
2 De ity neke,
it o it ne musti mo tala ktelanare ma kyala ity wait o ity hatnimat matohakare ralatare ma ksyenan,
ma kyety eraske ti sir.
Ode musti mo tala koldyesy,
ma wait tohtohakare ktyabal ma malkyakaw.
3 Kali Kristuske dakun o lema ryekan tenanke kmyesan bo,
biar ma I neke Iry a Hulasokwe isusu ma ika Raja ode yaorif irkye.
Kola tun Kristuske itanuk ti Hulasokwe ma rakesy ti Kitab Lanke ma kbyohe,
“Nam sai irire rtanuk ma rahmway O,
nam desike kola ne rtanuk ma Yaw ma desy.”*
4 Dendye nam sai ta sai heitlulswo rakesy mumu ti Kitab Lanke ne,
neke rkesy ma kyajar ity.
Ode nam kiajar ity desy kyalkyaw ity ralatare,
ma ity ne bisa ma taneti ity ralatare manenen ti kyoat masunkwe kidan ity ne,
mamode bisa ma tmea ti Hulasokwe ma takita bo.
5 Hulasokwe I ne yala ity ma taneti ity ralatare manenen,
ode I ne yaluka ity ode yalkyaw ity ralatare ti kyoat masunkwe kidan a ity ne.
Dendye yaw ne kswambayan ma kuten ma Hulasokwe syaluk e,
ma mimorif ne myety ral sasamke,
ma ktyoha nam Yesus Kristuske ialanare dakun.
6 Ode myety ral sasamke koldyesy,
mamode bisa ma miktemtem a mlyeru Hulasokwe,
neke ity Ebut Yesus Kristuske Ama,
ode wasi Hulasow a I dakun.
Iry matohakare musti mo it de yal it eras kola Kristuske inal ity ma wasi iry a ity ne
7 Lemadendye waikw o hatnimakw e,
Kristuske yal e ma wasi iry a e de,
dendye kuten ma lemamo ei neke it de yal it eras-eras bo,
kola ne Kristuske inal a e ne.
Musti mo myala koldyesy,
mamode irire rleru Hulasokwe.
8 Dendye mnyenas,
kali Kristuske mya kola makaryake ti iry a Yahudi-nare,
ma syaluk sir,
ma ksyusu ohe,
Hulasokwe nyenas wasi tnyetak a heitlulswo ihatetak inor Yahudi-nare ebnwo matrumat ne.
Ode khyali desike mane,
irire mumu ne rhe ohe,
Hulasokwe wasi inahatetakare mumu ne,
kyaki-kyaki ne musti mo kdi ti.
9 Ode Kristuske mya ma syaluk iry a lema Yahudi-nare dakun,
ma rleru Hulasokwe,
kali syusu rala eraske ti sir.
Kola dene rkesy tun Daud itanuk ti ity Ebutke ne,
ti Kitab Lanke ma kbyohe,
“Koldyesike mane kyoat kor iry a lema Yahudi-nare,
desikeo kswalak eraske ba ti O,
ode kuora ma klweru Animkwe.”*
10 Ode rkesy huruk ma kbyohe,
“Hei iry a lema Yahudi e,
mmya ma mimukmuka mimarmara e a myor Hulasokwe wasi irire,
neke iry a Yahudi-nare.”*
11 Ode ktyanuk huruk ma kbyohe,
“Hei iry a lema Yahudi e,
ei ne mumu ne mmya ma mlyeru ity Ebut Hulasokwe Anike.
Hei iry mamin ti nuske ktem e,
mmya mumu ma mlyeru I!”*
12 Ode Yesaya Hulasokwe wasi manety nyanoke kyesy dakun ma kbyohe,
“Isai neke tesnwo natuke it ana mya,
ma hyareta iry a lema Yahudi-nare,
ode sir ne ana rmea ti I bo.”*
13 Dendye kswambayan ti Hulasow a maala ity ma tamea ti I ne,
ma kuten ma yala ralamy kralanare ma kimukmuka kimarmara i,
ma inamukmuka ike lema ktyol ti e elik,
kali mtyohak ti I.
Ode kuten dakun ma yal wasi inaka eraske ti e,
ma kimin ti ralamy kralanare ma lema ktyol ti e elik,
kali mtyohak ti I.
Kuten koldyesy ma Hulasokwe Memeanke kamalkyauke kkyarya ti ralamy kralanare,
mamode ktyabal a ktyabal toha ma mmyea ti I.
Paulus lyosu wasi karya ikarya ti Hulasokwe ne
14 Waikw o hatnimakw matohak e!
Yaw neke ktwohak ohe,
ei neke eras e a ksyalik.
Ode wasimy heheke kbyenw ti nam Hulasokwe ibuke de,
ma ti kyal ei neke bisa ma it de syurat it dakun de.
15 Ode biar ma koldyesy,
keskyede kures ma kkwesy ktelake enai ne ti atyahy ne,
ma kala e ma minenenas ktela desikre.
Kala koldyesy kali Hulasokwe syusu rala eraske ma yaw ti karya inal ma yaw desy,
16 dendye kuka nyaso ti Yesus Kristuske,
ma kswaluk iry a lema Yahudi-nare.
Neke kabrita Brit Eras manosy Hulasokwe ti sir,
ma rtohak ti Kristuske.
Ode Hulasokwe yal sir ma wasi iry a sir,
kali Hulasokwe Memeanke kyala sir ma nelnyelnyely a sir.
Koldyesikemo wasikw karya ne,
neke kola iry mabaa klen ti irkye yor Hulasokwe ne wait karyake,
ode iry a lema Yahudi desikre rola heal a kuabar ti Hulasokwe ne.
17 Lemade kyosy kunety ral sasamke kor Yesus Kristuske ne,
dendye kumukmuka yaw,
kali wasikw karya kukarya ti Hulasokwe desy.
18 Ode lema kures ma ktwanuk ktela sai ta sai,
de lenla nam sai Kristuske iala desikre,
ti kyoat yal nam kuala o kutanuk nekre ma yal ma kyala iry a lema Yahudi-nare ma rtomolu ode rtoha Hulasokwe.
19 Ode Hulasokwe Memeanke kyal haretke ma yaw,
ma kala ktela desikre ktyabal ktela masalsyalik iare ode nyatos manosy Hulasokwe,
mamode sir ne rtoha Hulasokwe.
Dendye kala ate karyaakw a kuabrita Brit Eras malosu Kristuske ne,
neke kyala kyosy a nus Yerusalemke ma ti kyait a propinsi Ilirikumke.†
20 Kali kyala kyosy khyehyeike kdwakin a ksyalik ma kabrita Brit Eraske ti wen a irire lenla ratomolu Kristuske ti ne.
Kala koldyesy ma kete kswaur iry salik wait karyaare,
kola dene iry a masadiri sey ti iry salik wait fanderen raalanare ne.
21 Ktela kuala desike kola ne rakesy ti Kitab Lanke ma kbyohe,
“Iry a lenla rtomolu irire ma rabrita brit malosu I ne,
neke ana ratos I,
ode iry a lenla ratomolu elik nyano malosu I ne,
neke ana rtomolu wasi nyanoke ode rhe kbuanke.”*
Paulus ryeky ma byai nus lan Romake
22 *Waikw o hatnimakw matohak e!
Khyali kuabrita Brit Eraske ti hnu salik nekre,
dendye khyury ma lenla bisa ma kbwa ti ksweak e ti desy.
23 Keskye senweke wasikw karyake ti hnu salik nekre ktei de.
Ode ainke enai mane de,
neke kmwaboka e a ksyalik ma kbwuma ti ksweak e ti desy.
24 Dendye krweky ma kyoat a ana kbwai Spanyol,
desikeo kswery ei wasimy nus desy,
ma kor e ti desy aduk.
Ma taktemtem a tamukmuka ity ti desy mingguke enai ne,
maktei o nenmo bisa ma msyaluk yaw dakun ma kswaur wasikw laklakutke bai Spanyol.
25 *Keskyede senweke kala ma kbwai nus Yerusalemke aduk,
ma kety kuban iry matohakare rawahuk ma ana ranal ma rsaluk Hulasokwe wasi irire o nus Yerusalem so.
26 Kali iry matohak mamin ti propinsi Makedoniake ode propinsi Akhayake ne,
neke rtanuk maiske de,
ma rawahuk kuban,
ma ral ma rsaluk ribun matohak lema manait ei sra o hah mamin o nus Yerusalemke.
27 *Ode iry nekre rmesan a rohut ma rawahuk kuban.
Ode sir desike mlay bain o wait harharke ma musti mo rsaluk iry a Yahudi desikre.
Kali iry Yahudi-nare rety Brit Eraske ti iry a lema Yahudi-nare,
dendye sir desike ratot eras manosy Hulasokwe,
neke kyosy iry a Yahudi-nare,
dendye iry a lema Yahudi desikre musti mo rsaluk iry a Yahudi matohak ti Kristuske ne,
ti nam matol ti wait mormyorif sew kyaki nekre.
28 Dendye kolnye kala wasikw karya desy ti Yerusalem ne ma ktei,
neke kety kuban rawahuk desikre mumu ti iry mamin ti Yerusalem desikre aduk,
desikeo nenmo kbwai Spanyol.
Ode kyoat a ana kbwai Spanyol,
desikeo kswery ei wasimy nuske aduk.
29 Ode ktwohak ohe,
kyoat ti ksweak a e,
desikeo ana kety a eras ribun manosy Kristuske ti miktemtem.
30 Waikw o hatnimakw e,
tety ral sasamke tor ity Ebut Yesus Kristuske,
ode Hulasokwe Memeanke kkyarya ti ity ralatare ma it de lyobak it.
Kali koldyesike mane kal ralakkwe kralake ma kuten toha e,
ma kyaki-kyaki ne myety ral sasamke myor yaw,
ma talkyaw ity ma tsambayan ti Hulasokwe ma syaluk yaw ti wasikw karya ne.
31 Ode msyambayan ma Hulasokwe ijaga yaw,
ma kete iry a lema matohak mamin ti propinsi Yudeake ne rala atyat yaw.
Ode msyambayan dakun ma kyoat kety kubanke ma kal ti Hulasokwe wasi irire ti nus Yerusalemke,
desikeo iry desikre ana ral kuban desy kyor ralat mamukmuka iare.
32 Dendye kolnye kala karyaakw nekre mumu ma ktei koldyesy,
ode kolnye Hulasokwe you,
desikeo bisa ma kbwa ti ksweak a e kor ralakkwe krala mamukmuka mamarmara ike.
Ode ralakkwe bisa ma kele rteka,
kolnye ana kor e ti desy.
33 Lemadendye kuten ma Hulasow a manal wasi inaka eras ma ity ne yor miktemtem mumu.
Amin.