Tnyetak Musake lema kyety eta ity de
7
Waikw o hatnimakw matohak e!
Ei neke mhye tnyetak kihareta irkye ne de.
Dendye musti mo mhye dakun nam kutanuk ne,
neke:
tnyetakare cuma mo khyareta irkye,
ti kyoat a imorif a nggora ne.
2 Kola ne wamfwetke it ma isa de,
ma lai-na myorif a nggora,
desikeo tnyetak insake kyety eta wamfwet desy yor lai.
Keskyede kolnye lai-na myaty de,
desikeo tnyetak maety eta wamfwet desy inor lai ne,
lema bisa ma kyety eta wamfwet desy de.
3 Dendye kolnye wamfwet desike lai-na myorif a nggora,
keskye isaa yor wamwany salik,
desikeo wamfwet desike yaldotw ma desy.
Keskye kolnye lai-na myaty de,
desikeo lema kika tnyetak maety eta wamfwet desy de.
Dendye kolnye wamfwet desike byuma isa huruk,
desikeo lema nam.
4 Waikw o hatnimakw e!
Ktela maoly desike kdi ti e dakun,
kali mmyaty myor Kristuske ti tul masanwalw ike de,
dendye tnyetak Musake lema kyety eta e de.
Koldyesikemo ei neke myety ral sasamke myor Kristuske de.
I neke Iry a Hulasokwe iala I ma imorif huruk toha matmyatkye ne.
Ode myety ral sasamke myor Kristuske,
mamode bisa ma myala ktela erasare,
ma wasimy mormyorifare kyala Hulasokwe ralake ma kimukmuka i.
5 Kali kyalake tamorif ne tdakin ma ttoha ity wait dakdyakin atyatare a nggora.
Ode biar ma tnyetak Musake kbyu eta ity,
keskye kibu eta ity neke khyury ma ity wait dakdyakin atyat desikre kkyarya ti ity tenatare,
ma tbuma taalala lim o sal ma ktyabal a ktyabal toha,
ma desike ne kinor a ity ei matmyaty manal nini namke ne.
6 Keskyede selsel ne Hulasokwe yaditi ity toha tnyetak Musake de,
kali kola dene tmaty de,
dendye tnyetak Musake lema kyety eta ity de.
Lemadendye selsel neke tkarya ti Hulasokwe,
neke lema kyor mormyorif mamuna a tnyetak Musake kihareta ity desy.
De tkarya ti Hulasokwe kyor ity wait mormyorif harharw a Hulasokwe Memeanke kihareta ne.
Tnyetak Musake ksyusu irkye wasi lim o sal
7 Waikw o hatnimakw e,
kolnye tnyetak Musa neke,
ne kihury ma tala lim o sal ma ktyabal a ktyabal toha ne,
desikeo anakyai irire dum rrekan ode rtanuk ma rbohe,
“Tnyetak Musake atyat!”
Keskyede kete trekan koldyesy!
De khyali tnyetak Musake,
mane bisa ma the bain-bain ohe,
nam sai ne lim o sal ne.
Kali kolnye tnyetak Musake lema ktyanuk ohe,
“Kete mmwaboka irire wait nam,”†
desikeo ana yaw ne lema khwe ohe,
wasikw dakdyakin maoly desike neke lim o salke desy.
8 Keskye kyoat khwe tnyetak desy,
desikeo lim o sal kyal klelan desike ma kkyarya ti ralakkwe kralake.
Mane khyury ma wasikw dakdyakin atyat desike ktyabal a ktyabal toha.
Keskye kolnye tnyetak Musake lema kimin ma ksyusu wasikw lim o sal,
desikemo lim o sal ne lema khyareta kyal ralakkwe kralake.
9 Kola lenla khwe tnyetak Musake,
desikeo krwekan o kumorif ne lema kala lim o sal.
Keskyede kyoat a khwe tnyetak Musa desy,
ma tnyetak desike kbyu eta yaw,
desikeo lim o sal neke nenmo khyareta kyal ralakkwe kralake.
10 Lemade khwe toha lbwetakw ohe,
soso yaw toha Hulasokwe,
ode musti mo kmwaty.
Dendye ohe tnyetak Musa ne kyor yaw ei mormyorif manal nini namke,
kyosy desy ma o tnyetak desike kyor yaw ei matmyaty manal nini namke.
11 Desike ne lim o sal kyal klelan desy,
ma kyal tnyetak Musake,
ma kyal ma kikakmet a yaw,
mane kitabahunw a yaw ne.*
12 Lemadendye tnyetak Musake,
ktyabal a nam mamin ti tnyetak desike kralake mumu ne,
neke nelnyely,
ode mlay,
ode eras,
kali kyosy a Hulasokwe.
13 Dendye anakyai mryekan ohe,
tnyetak eraske ne kinor yaw ei matmyaty manal nini namke ne e?
Lema koldyesy!
Kali kyosy tnyetak eras desike,
dendye khwe toha lbwetakw ohe,
lim o sal kkyarya ti ralakkwe kralake,
mane kinor yaw ei matmyaty manal nini namke ne.
Ode kyosy a tnyetak eras desy,
dendye bisa ma khwe ohe,
lim o sal neke kihatw ksyalik.
Kolnye lema Yesuske desyo irkye lema yala yal ma yala ktela erasare
14 Dendye waikw o hatnimakw e,
ity neke the ohe,
tnyetak Musa ne eras kali kyosy Hulasokwe Memeanke,
keskye yaw neke iry a yaw bo.
Dendye lim o sal neke khyareta yaw,
kola dene kuka at ti lim o sal ma desy.
15 Kali yaw neke lema krwekan a khwe o ktela sakar ne kuala ne!
Kali ktela eras kudakin ma kualanare,
desyo lema kala.
Klala ktela atyat kumnisikare,
desike ne kuala ne.*
16 Dendye kolnye kala ktela lema kudakin desikre,
neke kbuanke o,
yaw neke kou ohe,
tnyetak Musake eras.
17 Lemadendye kala ktela atyat desikre,
biar ma lema kdwakin,
kali lim o sal mamin ralakkwe krala ne,
neke ne kihury ma kuala ktela atyat desikre ne.
18 Ode khwe ohe,
lema kika nam eraske it elik,
ti tenakw a irkye ne bo.
Kali kdwakin ma kala ktela erasare,
keskyede lema kala kal ma kala.
19 Kali ktela eras kudakin ma kualanare,
desyo lema kala.
Klala ktela atyat lema kudakinare,
desike ne kuala ne.
20 Dendye kolnye kala ktela lema kudakinare,
desyo yaw ne lema kala,
de lim o sal mamin ti ralakkwe krala ne,
neke ne kiala ne.
21 Lemadendye khwe ohe,
nam desikre mumu ne kyalamo kdi ti ti tenakw ne,
neke biar ma kdwakin ma kala ktela erasare,
keskyede wasikw dakdyakin atyatare kimin ma kbya eta dakun.
22 Kali ti ralakkwe krala neke,
kimukmuka i ti Hulasokwe wasi tnyetakare,
23 keskye lema ktwoha Hulasokwe wasi tnyetak desikre,
kali haret lim o sal mamin ti tenakw neke ne khyareta yaw.
Ode ti ralakkwe krala ne,
desyo kdwakin ma ktwoha Hulasokwe wasi tnyetakare,
keskye ti tenakw ne,
desyo haret lim o sal ne kimin ti,
ma ksyorw a Hulasokwe wasi tnyetak desikre.
Mane haret lim o sal desike kyety eta yaw,
ma khyareta tenakkwe mane kuka at ti lim o sal.
24 Edo!
Ksunw ksyalik!
Lema keti kal de!
Esei ne ana iaditi yaw toha tenakw a kibuma kinor yaw ei matmyaty a manal nini namke ne de?
25 Kali ti ralakkwe krala neke,
kdwakin ma ktwoha Hulasokwe wasi tnyetakare,
keskye haret lim o sal mamin ti tenakw neke khyareta yaw ma ktwoha lim o sal desikre.
Keskye kswalak eraske ba ti Hulasokwe!
Kali Hulasokwe yal wasi haretke ma yaditi yaw toha lim o sal a mahareta tenakkwe ne,
ma yaorif yaw toha matmyatkye,
khyali nam ity Ebut Yesus Kristuske ialake.