Wɩɩla sɩ́ peri Ɩzɩrayɛl nɩpiŋe
6
1 Wɩɩla sɩ́ péríwa nɩɛ ná há mɩŋ Sɩɔŋ mɛ́;a bɩɩnɛ rɩ́ɩ́wa mɩŋ tɛŋfɩ́ɛ́l mɛ́ rɛ́;
wɩɩla sɩ́ péríwa nɩɛ ná má há mɩŋ Samari paalɔ nyúú,
a bɩ́ɩ́nɛ rɩ wɩ́ɩ́ toó.
Ɓa sɩ́ɩ́wa nɛ́ ká duwero ná há mɩŋ duowa sɩɛrʋ nɩpiŋe.
Ɩ́ maábináŋa Ɩzɩrayɛl duo nɩɛ sɩ́ɛ́ bɩ́rwɔ́ sɩ́ɛ́ cáásɩ́wa.
2 Ɩ́ sɩ́ɛ́ mʋ́ Kalne, a ná tʋtʋmɩ́ ná há tʋ́ŋ ráŋ.
Ɛ́ har mɛ́, ɩ́ lɛ ráŋ mʋ́ tɔ́zeno Hamatɛ a ná.
Ɩ́ cɩ́ róŋ mí a mʋ́ Gatɛ, Filisiti nɩɛ dɩhɩ̃́.
Ɓa tɔ́nɛ nɛ́ wéríwa dɩtɩ́llɛ ná bɛllɛ?
Ɓa dɩtɩ́llɛ jɛ́l nɩ́ kɩ́ɩ́wa dɩtɩ́llɛ?
3 Ɩ́ɩ́ já rɩ́ɩ́wa yiki wɩɩla tápʋl nɛ́ tá,
ɩ́ sɩ́ɛ́ ɔsɔ́ pɔsɛ bɩbarɩ́ nɛ́ kúko rʋ́ʋ́ dííwa.
4 Betúnyɩl gódoɓɩɛrɛ́ daha nɛ́, ɩ́ jɛ́rɩ́wa tɩɩ,
a lɛ́sɩ́wa dɩcaksaŋpure sɩɛrʋ,
aá dí peɓʋɔllɛ ná há wéró,
aá dí nɔɓʋɔllɛ ná há vʋ́ɛ́ hé nʋʋ.
5 Ɩ́ɩ́ du cemo ká dɩ́dɛnnɛ;
á bɩ́ɩ́nɛ rɩɩ́wa ɛ̃ dúí mɔ Davidi rí.
6 Ɩ́ɩ́ nyɔ dɩvɛ́ŋ nyíŋgbaŋjɛlɛ sɩɛrʋ nɛ́,
aá tɩɩsɛ nʋyɩra ná há kéŋ sɔ́ŋ,
amá zɔ́krɛ ná háá ko Zɔzɛfɛ jɩmʋ́l nɩɛ nyúú,
ʋ wɩ́ɛ́ wɩ́ɩ́wa mɩ́ɩ́ wɛ.
7 Ɛ́ wɩ́ɛ́, ɩ́ zɩŋ rɩ́ɩ́wa nɛ́ sɩ́ la nɩɛ ná ɓa há sɩ́ kɛ́sɛ a mʋ́ yomí sɩ́ɛ́;
ɩ́ caŋsɛ díí sɩɛ́ sɩ́ tenni,
tɛŋwɩltɩɩna duo!
Samari zɔkɛ́ wɩ́ɛ́
8 Nyuutɩna Wɩɩsɛ, nɛ́ ŋmɩ́ɛ́sʋ́ tɩɩ yɩr mɛ́ a bʋlɛ́:
«Ŋ é Nyuutɩna Wɩɩsɛ, dóé wuu tɩ́na,
ŋ bɛ́rɛ Ɩzɩrayɛl dɩ́tɩllɛ nɩɛ mákɩ́ŋtɩɩ ná,
káŋ sɩɛrʋ má lʋ́ʋ́ kuójɩɩsɛ ná.
Ɛ́ nɛ́ tɛ ŋ sɩ́ lo, rʋ́ʋ́ dɩŋdɔma zɔkʋ́ tɔ́zeno Samari,
arɩ́rʋ́ sɩɛrʋ onni wuu.»
Nyuutɩna Wɩɩsɛ nɛ́ bʋ́l ɛ́.
9 Rɩ́ báála pérí fí, rɩ́ɩ́ káánɛ jaa balá sɩɛrʋ,
ɓa sɩ́ sʋsɛ. 10 Nɩsʋsɛ ná nɩtɩ́na há sɩ́ ko zʋʋ pa nɩsʋsɛ ná jaa ná sɩɛrʋ, rʋ́ʋ́ kaa lɩɩ nyɩkɛ; ʋ sɩ́ bɔsɛ nɩwómmi ná há káánɛ́, a mɩŋ jaa ná sɩ́ɛ́rɩ́ a bʋlɛ́: «Nɛ́ŋ rɩ́ ha mɩŋ ráŋ a súúrí mí?» Ʋ sɩ́ bʋlɛ́: « Aɩ́, nɛ́ŋ báá toó.» Ká súúri a bʋlɛ́: «Sɩ́ kʋɔllɛ kɔ́! Nyuutɩna Wɩɩsɛ yɩr yɩrɛ́ tɛ́ŋ raá nyɛ.»
11 Beé wɩ́ɛ́ Nyuutɩna Wɩɩsɛ pá ŋmɛ́nɔ,
rɩ́wɔ́ zɔkɛ jɩzeŋsi,
ká búksi jɩwɩɛla.
Ballɩ́wa náŋa wɩ nyʋɔrɛ
12 Záksɛ́ fá bʋ́ɔ́ daha rɛ́?
Ɓa kéŋ nɛsɛ aá párwɔ́ daha rɛ́?
Beé rí sɩ́ɛ́ tɛ ɩ́ ka yɛrɛ a bɩrmɛ bɛrɔ́,
ká a taŋá má háksɛ anɛ bákalá?
13 Ɩ́ɩ́ nyʋ́kʋ́, ɩ́ há dí dóé Lɔdɩbaarɛ nyúú, tɔ́ɔ́ ná há de wɩ cúcó; ká bʋlɛ́: «Á dóé mí raá, á la Karnayiimi rí, tɔ́ɔ́ ná há kéŋ dóé?» 14 Ɛ́ wɩ́ɛ́ sɩ́ɛ́, ŋ é Nyuutɩna Wɩɩsɛ, Wɩɩsɛ ná há ká dóé wuu tɩ́na nɛ́ bʋlɛ́: «Ɩzɩrayɛl nɩɛ, ŋ sɩ́ a rɩ́ duo nɔ́ŋɔ cɩ́nɩ́wa mɛ́, duo ná há sɩ́ pɔ́ Lebohamati mí, ká gɛ́rɩ́wa, a kaa mʋ́ yakɛ Araba dɩtɩ́llɛ polo mí.»