Génesis t'orroorã pedeede jara k'inia bù ‘chi naarapema’. Na Libro nãga t'âjarapata tachia leedak'ãri, k'awadait'ee perã Tachi Ak'õrepa sãgá na eujã ooji. Ichiaba na librode k'awadait'ee sãgata Tachi Ak'õrepa ooji chi naarapema eperã.

Na librode jara bù p'uuru pidaarã israelitaarã apatap'edaarãdé. Jara bù sãmãik'aapa uchiajida. Ichiaba jara bù sãgá Tachi Ak'õrepa ma p'uuru pidaarã jùrùt'erada ichia k'inia bùk'a p'anapataadamerã.

Chonaarãwedadeepa idi parumaa eperãarãpa ichita ne–inaa na p'ek'au eujãde p'asapari jarapata ak'õre waibùa apataarãpa mãga oopatada apata. Mapa na libro leedak'ãri, k'awadait'ee awaraarã ak'õre waibùa apataarã k'ãyaara Tachi Ak'õreta waibùara bù. Irua ne–inaa pi–ia oopari awaraarã ak'õre waibùa apataarãpa p'oyaa oodak'aa.

Ichiaba na libro leedak'ãri, k'awadait'ee Tachi Ak'õre apai; na p'ek'au eujã ooda. Ichiaba k'awadait'ee sãgá Tachi Ak'õrepa k'inia bù eperãarã p'anapataadamerã ichia k'inia bùk'a. Na librode p'ã bù chi naarapema eperãarã sãgá k'achiade baaijida Tachi Ak'õre k'îrapite. Mãga p'asaji mîda, ichiaba Tachi Ak'õrepa ne–inaa ooji eperãarã waya ichi k'îrapite pia p'aneedamerã.

Tachi Ak'õre pedee pi–ia estudiapataarãpa na libro pi–iara estudiadait'ee t'oot'aajida t'ooma omeede. Chi naapema t'oomade (cap. 1–11) unudait'ee na eujã Tachi Ak'õrepa ook'ãri. Ichiaba unudait'ee chi naarapema eperãarãpa oodap'edaa k'achia p'aneerutamaa iru k'îrapite. Na t'oomade ichiaba unudait'ee eperãarã uchiadap'edaarã Adandeepa Noé parumaa. Ichiaba jara bù sãgá Tachi Ak'õrepa na p'ek'au eujã ûut'aada. Ichiaba jara bù sãgá pedee awara awaraa uchiadap'edaa. Chi apema t'oomade (cap. 12–50) jara bù sãmãik'aapa uchiajida israelitaarã mãik'aapa k'airã paji ãchi ak'õchonaarã. Chi naarapema t'âjarapata Abraham, aù eere Isaac, aù eere Jacob mãik'aapa José. Na t'oomade ichiaba jara bù José mãik'aapa chi ak'õre Jacob wãdap'edaa Egipto eujãdee. Israelitaarã mama p'anùde k'achia p'anapachida Egipto pidaarã jua ek'ari. Mãga nùde Tachi Ak'õrepa ichi p'uuru pidaarã ma eujãdeepa uchiapiji ateeit'ee ichia eujã teeit'eeda adadee.

Na librode k'awadait'ee Tachi Ak'õrepa eperãarã ichia jara bùk'a oopataarã ichita k'aripapari.