Al-haywaan al-fasil al-awwal
13
Wa ana chift haywaan fasil marag fi ust al-bahar.
Wa indah achara guruun wa sabʼa raas wa ayyi garin indah taaj sakhayyar.
Wa ayyi raas indah usum maktuub foogah wa l-kilme di tiwassif kalaam kufur.
2 Wa l-haywaan da,
hu yichaabih misil al-nimir wa rijileenah misil rijileen hana l-dubb wa gadduumah misil gadduum hana l-duud.
Wa l-khuul antaah gudurtah wa kursi haggah wa sulta kabiire bilheen.
3 Wa raas waahid min ruuseen al-haywaan indah alama misil awwal jarahooh wa katalooh wa jarihiinah biri.
Wa kulla naas al-ard ajjabo min al-haywaan wa gammo yitaabuʼuuh.
4 Wa kulla l-naas sajado le l-khuul achaan anta gudurtah le l-haywaan da.
Wa sajado le l-haywaan wa gaalo :
Ma fi cheyy gaadir misil al-haywaan da.
Wa l-yagdar yidaawisah kula ma fiih.
5 Wa l-haywaan indah izin achaan yihajji kalaam hana istikbaar wa kufur.
Wa indah izin achaan yamluk foog al-naas muddit itneen wa arbaʼiin chahar.
6 Wa gamma hajja wa kallam kalaam cheen didd Allah wa gaal kalaam cheen foog usum Allah wa l-bakaan al-Allah gaaʼid foogah wa didd sukkaan al-samaawaat.
7 Wa indah izin achaan yihaarib al-saalihiin wa yinnasir fooghum.
Wa indah gudra foog ayyi gabiila wa chaʼab wa lukhkha wa umma.
8 Wa kulla sukkaan al-ard yasjudu leyah,
yaʼni ayyi naadum al-usmah ma maktuub fi Kitaab al-Haya.
Wa l-kitaab da hana l-Kharuuf al-mukhaddar leyah min bidaayit al-dunya yadbahooh wa khalaas bigi dahiiye.
9 Ayyi naadum al-indah adaan,
khalli yasmaʼ.
10 Ayyi naadum al-maktuub fi saffah yakurbuuh fi l-sijin,
khalli yakurbuuh fi l-sijin.
Wa ayyi naadum al-maktuub fi saffah yaktuluuh be l-seef,
khalaas khalli yaktuluuh.
Wa l-kalaam da yiwassif kadar al-saalihiin waajib yahmalo al-taʼab be sabur.
Al-haywaan al-fasil al-taani
11 Wa fi l-bakaan da,
ana chift haywaan aakhar.
Hu marag min lubb al-ard wa indah guruun itneen misil guruun hana kharuuf wa laakin hissah misil hiss al-khuul.
12 Wa indah izin achaan yistaʼmal kulla gudrat al-haywaan al-awwal wa fi giddaamah gaaʼid yahkim al-naas.
Wa gamma yajbur kulla sukkaan al-ard yasjudu le l-haywaan al-indah jarih al-awwal katalah wa hassaʼ biri khalaas.
13 Wa sawwa ajaayib kubaar lahaddi naada naar achaan tanzil min al-sama wa tiharrig al-ard giddaam al-naas kula.
14 Wa khachcha kulla sukkaan al-ard be l-ajaayib al-indah izin yisawwiihum giddaam al-haywaan al-awwal.
Wa amaraahum le l-naas achaan yasnaʼo sanam fi suurat al-haywaan al-antaʼan be l-seef wa maat wa battaan hiyi.
15 Wa l-haywaan al-taani indah izin achaan yanti ruuh le sanam hana l-haywaan al-awwal wa l-sanam kallam.
Wa amaraahum le l-naas achaan yaktulu ayyi naadum al-yaaba ma yasjud leyah.
16 Wa battaan,
kulla l-naas min al-sukhaar wa l-kubaar wa min siyaad al-maal wa l-masaakiin wa min al-hurriin wa l-abiid,
al-haywaan jabaraahum achaan yakhbalo be alaama al-yukhuttaha leehum fi iidhum al-zeene aw fi jabhithum.
17 Wa misil da,
ma fi ayyi naadum al-yagdar yachri cheyy walla yibiiʼ cheyy illa kan al-alaama di gaaʼide foogah.
Wa l-alaama di,
hi usum al-haywaan aw nimra hana usmah.
18 Wa khalli al-naas yifakkuru fi l-kalaam da be fikir adiil.
Wa khalli al-naadum al-faahim yahsib nimrat al-haywaan di achaan nimirtah di nimra hana l-naas wa hi suttumiya wa sitte wa sittiin.