Al-sama maftuuh
4
Wa baʼad da,
ana chift cheyy aakhar.
Ana chift baab maftuuh fi l-sama.
Wa simiʼt battaan nafs al-hiss al-awwal simiʼtah,
al-hiss al-bichaabih misil hiss burunji.
Wa hu hajja leyi wa gaal :
Taʼaal leyi hini foog wa niwassifak al-cheyy al-laabudda yabga baʼadeen.
2 Wa ajala ke,
ana fi l-ruʼya chift al-arch fi l-samaawaat wa siidah gaaʼid foogah.
3 Wa l-gaaʼid fi l-arch da yiraari misil faaruus wa agiig ahmar.
Wa fi chokhol muhaawig al-arch misil hajjaaz al-matara al-biraari misil yaakhuut akhadar.
4 Wa ana chift arbaʼa wa ichriin karaasi muhawwigiin al-arch da wa arbaʼa wa ichriin chuyuukh gaaʼidiin fooghum.
Wa ayyi waahid laabis khalag abyad wa indah taaj hana dahab fi raasah.
5 Wa chift barraaga tiwajwij fi l-arch wa simiʼt haraka chadiide wa raʼad.
Wa fi giddaam al-arch,
chift sabʼa iidaan mugargariin naar wa humman bimassulu Arwaah Allah al-Sabʼa.
6 Wa battaan giddaam al-arch,
chift bakaan wasiiʼ bichaabih misil bahar hana almi saafi marra waahid lahaddi gaʼarah binchaaf.
Wa chift arbaʼa haywaanaat samaawiiye muhawwigiin al-arch min kulla jiihe wa jilidhum malaan be uyuun min wara wa min giddaam.
7 Wa l-awwalaani minhum bichaabih misil duud wa l-taani misil toor wa l-taalit indah wijih misil wijih al-insaan wa l-raabiʼ yichaabih misil sagur kabiir gaaʼid yitiir.
8 Wa ayyi waahid min al-arbaʼa haywaanaat al-samaawiiye dool indah sitte janaaheen malaaniin be uyuun min foog wa min tihit.
Wa gaaʼidiin bikhannu daayman leel wa nahaar wa abadan ma khallo khineehum.
Wa gaaʼidiin buguulu :
Khudduus,
Khudduus
Allah al-Rabb al-Gaadir
al-gaaʼid fi l-wakit al-faat
wa l-wakit al-haali
wa l-wakit al-jaayi
hu al-Khudduus.
9 Wa l-haywaanaat dool gaaʼidiin yimajjudu al-gaaʼid fi l-arch wa hu al-Hayy ila l-abad.
Wa humman gaaʼidiin yahmuduuh wa yachkuruuh.
Wa ayyi wakit yimajjuduuh misil da,
10 al-chuyuukh al-arbaʼa wa ichriin yasjudu giddaam al-gaaʼid fi l-arch wa yaʼabudu al-Hayy ila l-abad.
Wa ayyi waahid yarmi taajah giddaam al-arch wa yuguul :
11 Ya Rabbina Allah,
kulla cheyy hana l-majd wa l-ikraam wa l-gudra
waajib leek inta
achaan inta bas khalagt kulla cheyy
wa be muraadaatak inta bas,
kulla cheyy bigi wa gaaʼid.