10
Ya akhwaani fi l-Masiih,
nitmanna be kulla galbi kadar akhwaani al-Yahuud yanjo wa da al-cheyy al-ana daayman natlubah min Allah.
2 Ana nachhad leehum kadar humman munkaribiin fi ibaadat Allah laakin fiyah cheyy waahid ma yaʼarfuuh.
3 Humman ma yaʼarfu kikkeef Allah yisawwi al-naas saalihiin wa khalaas yidooru yabgo saalihiin be juhudhum wa abo ma yakhbalo al-derib al-Allah fatahah le l-naas al-beyah yabgo saalihiin.
4 Al-Masiih ja wa tamma churuut al-Tawraat wa be l-Masiih kulla l-naas yabgo saalihiin,
kan yiʼaamunu beyah.
5 Wa fi l-Kitaab,
Muusa fassar leena kikkeef al-naas yabgo saalihiin be churuut al-Tawraat.
Hu gaal <Al-naadum al-yitabbig kulla l-churuut dool yahya beehum>.
6 Laakin maktuub battaan kadar al-naas yabgo saalihiin be l-iimaan.
Buguul <Ma tuguul fi galbak,
yaatu al-yatlaʼ fi l-sama ?>
yaʼni achaan yinazzil al-Masiih.
7 <Wa ma tuguul yaatu al-yanzil fi l-haawiya ?>
yaʼni achaan yamrug al-Masiih min ust al-maytiin.
8 Laakin al-cheyy al-buguulah chunu ?
Buguul <Al-kalaam gaaʼid gariib leek.
Hu fi khachmak wa fi galbak>.
Wa l-kalaam da,
hu kalaam al-iimaan al-niballukhuuh leeku.
9 Kan be khachmak tachhad le Isa wa tuguul hu al-Rabb wa fi galbak tiʼaamin kadar Allah baʼasah min ust al-maytiin,
be misil da tanja khalaas.
10 Achaan be sabab al-iimaan al-gaaʼid fi l-galib,
Allah yajʼal al-naadum saalih wa be sabab chahaadat khachmah,
Allah yinajjiih.
11 Al-Kitaab buguul ayyi naadum al-yiʼaamin beyah ma yafchul abadan.
12 Wa da bigi sawa sawa le l-Yahuud wa le l-ma Yahuud achaan al-Rabb al-waahid,
hu Rabb kulla l-naas wa hu kariim le ayyi naadum al-yadʼi be usmah.
13 Achaan maktuub <Ayyi naadum al-yadʼi be usum al-Rabb yanja>.
Ballikhiin al-bichaara waajib
14 Wa kikkeef yadʼu be l-Rabb,
kan ma aamano beyah ?
Wa kikkeef yiʼaamunu be l-Rabb,
kan awwal ma induhum beyah khabar ?
Wa kikkeef yasmaʼo al-kalaam,
kan ma fi naadum al-yiballikh leehum al-bichaara ?
15 Wa kikkeef yiballukhu leehum al-bichaara,
kan ma rassalo leehum murassaliin ?
Achaan da,
al-Kitaab buguul <Kan al-naas jaayiin be l-bichaara,
da halu bilheen>.
16 Wa laakin ma kulla l-naas khiblo al-bichaara.
Achaan da,
al-nabi Ichaʼya gaal <Ya Allah,
ballakhna kalaamak laakin yaatu al-saddakh beyah ?>.
17 Khalaas,
al-naas ma yabgo muʼminiin be l-Masiih illa kan yasmaʼo al-bichaara wa ma yasmaʼo al-bichaara illa kan naadum yiballikhha leehum.
18 Laakin nasʼal cheyy waahid.
Sahiih,
humman lissaaʼ ma simʼo al-bichaara di walla ?
La,
humman simʼooha.
Al-Kitaab buguul <Hiss al-murassaliin ansamaʼ fi kulla l-ard wa kalaamhum lihig kulla bakaan fi l-dunya>.
19 Wa battaan nasʼal,
Bani Israaʼiil ma fihmo al-kalaam walla ?
Awwal be khachum Muusa,
Allah gaal <Nisawwiiku hasuudiin fi l-naas al-ma chaʼabi wa nizaʼʼilku be l-naas al-jaahiliin>.
20 Wa l-nabi Ichaʼya gamma hajja kalaam Allah leehum bala chakak wa gaal <Al-naas al-ligo barakaati,
ma al-naas al-jaahado le yaʼarfuuni.
Wa bayyant gudurti le l-naas al-ma talabo minni cheyy>.
21 Laakin foog Bani Israaʼiil,
hu gaal <Kulla ma yoom ana gaaʼid nimidd iideeni ninaadi al-chaʼab da laakin humman aasiyiin wa raashum gawi>.