Moot Laʼaazar
11
Wa fiyah naadum waahid mardaan.
Usmah Laʼaazar wa hu saakin fi hillit Beet Anya wa di hille hana Mariyam wa akhutha Marsa.
2 Wa Mariyam di,
hi al-mara al-masahat al-Rabb Isa be itir wa gachchat rijileenah be chaʼarha.
Wa akhuuha Laʼaazar mardaan.
3 Achaan da,
al-akhwaat rassalo le Isa wa gaalo :
Ya sayyidna,
al-naadum al-tiriidah mardaan.
4 Wa Isa simiʼ al-kalaam da wa gaal :
Al-marad da ma yikammil be l-moot laakin be sababah al-naas yimajjudu Allah.
Wa be sabab al-cheyy al-yukuun,
yimajjudu Ibn Allah.
5 Wa Marsa wa akhutha Mariyam wa akhuuhum Laʼaazar rufgaan hana Isa wa hu yihibbuhum.
6 Wa min Isa simiʼ khabar hana marad Laʼaazar,
hu gaʼad battaan yoomeen fi l-bakaan al-hu gaaʼid foogah.
7 Wa baʼad al-yoomeen dool,
hu hajja le talaamiizah wa gaal :
Namchu nigabbulu fi daar al-Yahuudiiya.
8 Wa talaamiizah raddo leyah wa gaalo :
Sayyidna,
gibeel al-Yahuud dawwaro yarjumuuk.
Wa battaan tidoor tigabbil fi bakaanhum walla ?
9 Wa Isa gaal leehum :
Al-nahaar ma indah atnaachar saaʼa walla ?
Kan naadum raayikh fi l-nahaar,
hu ma yagaʼ achaan deyy hana l-dunya gaaʼid wa hu yichiif beyah.
10 Wa laakin kan naadum raayikh fi l-leel,
hu yagaʼ achaan ma indah deyy.
11 Wa hu radda leehum be l-kalaam da wa battaan hajja leehum wa gaal :
Rafiigna Laʼaazar naam khalaas laakin namchi leyah nigawwimah.
12 Wa talaamiizah gaalo :
Sayyidna,
kan hu naayim,
da sameh.
Hu yalga al-aafe.
13 Wa fi fikir al-talaamiiz,
Isa hajja leehum be l-noom bas laakin Isa hajja be l-moot.
14 Wa khalaas,
Isa ooraahum be kalaam waadih wa gaal :
Laʼaazar maat.
15 Wa ana farhaan kadar yoom al-moot ana ma haadir achaan be misil da tiʼaamunu beyi.
Khalaas,
namchu leyah.
16 Wa Tuuma,
al-binaaduuh Chigg al-Toom,
hajja le l-talaamiiz wa gaal :
Khalaas,
namchu maʼaayah wa numuutu maʼaayah.
Al-Masiih gawwam Laʼaazar
17 Wa wakit Isa wisil fi hillit Beet Anya,
oorooh Laʼaazar gaaʼid fi l-khabur min arbaʼa yoom.
18 Wa l-hille gaaʼide misil talaata kiilomitir bas min Madiinat al-Khudus.
19 Wa Yahuud katiiriin jo min al-madiina le yikallugu le Marsa wa Mariyam fi akhuuhum.
20 Wa wakit Marsa simʼat Isa jaayi,
hi gammat wa maragat achaan tilaagiih.
Wa Mariyam gaʼadat fi l-beet.
21 Wa Marsa gaalat leyah :
Sayyidna,
kan awwal inta haadir,
akhuui ma yumuut.
22 Laakin hassaʼ kula naʼarif kadar ayyi cheyy al-tasʼalah,
Allah yantiik.
23 Wa Isa gaal leeha :
Akhuuki yuguum.
24 Wa Marsa gaalat leyah :
Naʼarif kadar hu yabʼas maʼa l-maytiin fi l-giyaama al-tabga fi yoom al-akhiir.
25 Wa Isa gaal leeha :
Ana al-giyaama wa l-haya.
Ayyi naadum muʼmin beyi kan yumuut kula,
hu yahya.
26 Wa ayyi naadum al-aayich muʼmin beyi,
abadan ma yumuut.
Kalaami da,
inti muʼmine beyah walla ?
27 Wa hi gaalat leyah :
Aywa,
sayyidna,
ana muʼmine beek.
Inta al-Masiih Ibn Allah.
Inta hu al-laabudda yaji fi l-dunya.
28 Wa hi gaalat al-kalaam da wa gammat machat le akhutha Mariyam wa hajjat leeha be hiss tihit.
Wa gaalat leeha :
Al-muʼallim ja wa binaadiiki.
29 Wakit Mariyam simʼat kalaamha,
hi gammat ajala ke wa machat leyah.
30 Wa Isa lissaaʼ ma dakhal fi l-hille wa gaaʼid fi l-bakaan al-Marsa laagatah foogah.
31 Wa wakit al-Yahuud al-gaaʼidiin maʼaaha fi l-maytam chaafooha gammat maragat ajala,
humman taabaʼooha.
Fi fikirhum,
hi tidoor tamchi le l-khabur achaan tabki hinaak.
32 Wa Mariyam jaat fi l-bakaan al-Isa gaaʼid foogah wa wakit chaafatah,
hi wagaʼat giddaamah wa gaalat :
Sayyidna,
kan awwal inta haadir,
akhuui ma yumuut.
33 Wa wakit Isa chaaf dumuuʼha wa dumuuʼ al-Yahuud al-waraaha,
hu ziʼil fi galbah wa barjal.
34 Wa saʼalaahum wa gaal :
Ween al-bakaan al-dafanooh foogah ?
Wa raddo leyah wa gaalo :
Taʼaal sayyidna,
chiif.
35 Wa Isa baka.
36 Wa achaan da,
al-Yahuud al-jo fi l-maytam gaalo :
Chiifuuh.
Hu biriidah le Laʼaazar bilheen.
37 Wa laakin naas waahidiin gaalo :
Haay !
Da bas al-naadum al-fattah uyuun al-amyaan.
Kikkeef ma gidir yinajji al-naadum da min al-moot ?
38 Wa Isa ziʼil fi galbah battaan wa ja le l-khabur.
Wa l-khabur hu karkuur wa sidaadtah hajar kabiir.
39 Wa Isa gaal :
Lizzu al-hajar min khachum al-khabur.
Laakin Marsa akhut al-marhuum gaalat :
Sayyidna,
hu mayyit min arbaʼa yoom wa akiid al-janaaza affanat.
40 Wa Isa gaal leeha :
Ana ma ooreetki walla ?
Kan tiʼaamini,
tichiifi gudrat Allah al-majiide.
41 Wa lazzo al-hajar.
Wa Isa rafaʼ raasah wa gaal :
Abuui,
nachkurak achaan inta simiʼt hissi.
42 Ana irift inta daayman tasmaʼ hissi wa laakin gult al-kalaam da le faaydit al-naas al-haadiriin achaan yiʼaamunu inta rassaltini.
43 Wa wakit hu gaal al-kalaam da khalaas,
hu hajja be hiss foog wa gaal :
Ya Laʼaazar,
amrug !
44 Wa l-mayyit marag.
Iideenah wa rijileenah malfuufiin be l-gabag al-kafanooh beyah wa mindiil marbuut fi wijhah.
Wa Isa amaraahum le l-naas wa gaal :
Fartuguuh min al-kafan wa khalluuh yamchi.
45 Wa be misil da,
naas katiiriin min al-Yahuud al-jo yikallugu le Mariyam chaafo al-ajab al-Isa sawwaah wa aamano beyah.
Al-kubaaraat achchaawaro foog al-Masiih
46 Wa laakin waahidiin minhum macho le l-Fariisiyiin wa ooroohum be l-cheyy al-Isa sawwaah.
47 Wa achaan da,
kubaaraat rujaal al-diin wa l-Fariisiyiin naado naas hana l-majlis al-kabiir yilimmu.
Wa assaaʼalo ambeenaathum wa gaalo :
Nisawwu chunu ?
Al-naadum da gaaʼid yisawwi ajaayib katiiriin.
48 Kan ma nadharooh min al-cheyy al-gaaʼid yisawwiih,
kulla l-naas yiʼaamunu beyah wa l-Roomaaniyiin yaju wa yidammuru beetna al-mukhaddas wa yichattutu chaʼabna.
49 Wa naadum waahid minhum usmah Gayaafa wa fi l-sana di,
hu kabiir hana rujaal al-diin.
Wa hu hajja leehum wa gaal :
Intu ma taʼarfu cheyy.
50 Ma fihimtu kadar akheer leeku kan naadum waahid yumuut le faaydit al-chaʼab wa be misil da,
kulla l-chaʼab ma yiwaddir.
51 Wa kalaamah da ma ja min nafsah wiheedah.
Hu kabiir rujaal al-diin fi l-sana di wa achaan da,
be izin Allah,
hu gaal Isa yumuut le faaydit al-chaʼab.
52 Wa da ma le faaydit al-chaʼab al-Yahuudi wiheedhum.
Da yabga le faaydit kulla iyaal Allah al-muchattatiin le yilimmuhum fi umma waahide.
53 Wa min al-yoom da,
bado yichaawuru ambeenaathum achaan yaktulu Isa.
54 Wa achaan da,
hu waggaf ruwaakhitah fi ust al-Yahuud.
Wa gamma min hinaak wa macha fi hille waahide jamb al-sahara al-usumha Afraayim wa gaʼad hinaak maʼa talaamiizah.
55 Wa Iid al-Fisha garrab wa hu iid kabiir hana l-Yahuud.
Wa naas katiiriin gammo min hillaalhum wa macho fi Madiinat al-Khudus achaan yitahhuru nufuushum gubbaal al-iid.
56 Wa l-naas dawwaro yichiifu Isa.
Wa fi hooch hana Beet Allah gaaʼidiin yassaaʼalo ambeenaathum wa yuguulu :
Fikirku chunu ?
Hu yaji hini fi l-iid walla ?
57 Wa kubaaraat rujaal al-diin wa l-Fariisiyiin amaroohum le l-naas wa gaalo leehum kan naadum yaʼarif al-bakaan al-Isa gaaʼid foogah,
waajib yaji yiʼooriihum achaan yakurbuuh.