Al-naadum al-mawluud ke amyaan
9
Wa yoom waahid,
Isa gaaʼid yuruukh wa chaaf naadum waahid mawluud ke amyaan.
2 Wa talaamiizah saʼalooh wa gaalo :
Sayyidna,
al-naadum da wildooh amyaan be sabab zunuub yaatu ?
Be sabab zunuubah hu walla zunuub waaldeenah ?
3 Wa Isa radda leehum wa gaal :
Hu amyaan ma be sabab zunuubah wa la zunuub waaldeenah.
Hu bigi misil da achaan Allah yiwassif gudurtah fi l-cheyy al-yabga leyah.
4 Al-rassalaani kallafaani be amal.
Wa wakit al-wata lissaaʼ nahaar,
laazim nisawwu al-amal da.
Al-leel baji wa fi l-leel ma fi naadum yagdar yakhdim.
5 Ana nuur al-aalam wa wakit ana gaaʼid fi l-aalam,
ana bas al-yantiih nuur.
6 Wa wakit Isa gaal al-kalaam da,
hu bazzakh fi l-turaab wa ajjan tiine be buzaakhah wa massahaaha fi uyuun al-amyaan.
7 Wa gaal leyah :
Amchi khassil wijhak fi hoot hana Silwaam.
Wa khalaas,
al-amyaan macha wa khassal wijhah wa gabbal bichiif.
Wa l-usum Silwaam maʼanaatah «
al-murassal ».
8 Wa jiiraanah wa l-naas al-chaafooh wakit hu lissaaʼ gaaʼid yasʼal sadakha,
assaaʼalo ambeenaathum.
Wa gaalo :
Da ma al-naadum al-awwal gaaʼid fi l-chaariʼ yasʼal al-sadakha walla ?
9 Wa naas waahidiin gaalo :
Aywa,
da hu.
Wa naas aakhariin gaalo :
La,
da ma hu.
Da naadum aakhar bichaabihah bas.
Wa l-naadum zaatah gaal :
Ana bas hu.
10 Wa saʼalooh wa gaalo :
Kan sahiih inta hu,
kikkeef uyuunak anfataho ?
11 Wa radda leehum wa gaal :
Al-naadum al-usmah Isa ajjan tiine wa massahaaha fi uyuuni wa gaal leyi «
Amchi le Silwaam wa khassil wijhak ».
Wa macheet wa khassalt wa khalaas nichiif.
12 Wa saʼalooh wa gaalo :
Wa ween al-naadum da ?
Wa gaal leehum :
Da ma naʼarfah.
13 Wa waddo al-naadum al-awwal amyaan le l-Fariisiyiin.
14 Wa l-yoom al-Isa ajjan foogah al-tiine wa fattah uyuun al-amyaan da yoom al-sabit.
15 Achaan da,
al-Fariisiyiin kula saʼalooh wa gaalo :
Uyuunak anfataho kikkeef ?
Wa radda leehum wa gaal :
Hu massah uyuuni be l-tiine wa ana khassalt wijhi wa khalaas ana chift.
16 Wa Fariisiyiin waahidiin gammo yuguulu :
Al-naadum al-sawwa al-cheyy da,
hu ma min Allah achaan hu ma yitaabiʼ churuut hana yoom al-sabit.
Laakin waahidiin gaalo :
Naadum kan muznib,
kikkeef yisawwi ajaayib misil da ?
Wa be misil da,
al-Fariisiyiin ankhalafo.
17 Wa battaan,
saʼalo al-naadum al-awwal amyaan wa gaalo :
Inta ke,
al-naadum al-hu fattah leek uyuunak,
inta tuguul foogah chunu ?
Wa l-naadum radda leehum wa gaal :
Hu nabi.
18 Wa l-Yahuud abo ma saddakho kadar hu awwal amyaan wa hassaʼ bichiif lahaddi naado waaldeen al-naadum al-uyuunah anfataho.
19 Wa saʼalo waaldeenah wa gaalo :
Sahiih da wileedku wa tuguulu hu mawluud ke amyaan ?
Wa kan da sahiih,
kikkeef hassaʼ bichiif ?
20 Wa waaldeenah raddo leehum wa gaalo :
Naʼarfu da wileedna wa naʼarfu hu mawluud ke amyaan.
21 Laakin kikkeef hu bichiif wa yaatu al-fattah leyah uyuunah,
da ma naʼarfuuh.
Hu raajil aagil.
Asʼalooh wa hu yihajji be nafsah.
22 Waaldeenah hajjo be misil da achaan humman khaayfiin min kubaaraat al-Yahuud.
Al-kubaaraat awwal astafago ambeenaathum le yaturdu min beet al-sala ayyi naadum al-buguul Isa hu al-Masiih.
23 Wa achaan da,
waaldeenah gaalo «
Hu raajil aagil.
Asʼalooh hu ».
24 Wa marra taaniye,
naado al-naadum al-awwal amyaan.
Wa gaalo :
Ahlif Allah be l-sahiih.
Aniina naʼarfu kadar al-naadum da muznib.
25 Wa radda leehum wa gaal :
Kan hu muznib walla ma muznib,
da ma naʼarfah.
Cheyy waahid bas naʼarfah.
Awwal ana amyaan wa hassaʼ ana gaaʼid nichiif.
26 Wa saʼalooh wa gaalo :
Hu sawwa leek chunu ?
Fattah uyuunak kikkeef ?
27 Wa radda leehum wa gaal :
Ooreetku gibeel laakin intu ma dawwartu tasmaʼo kalaami.
Maala tidooru niʼooriiku marra taaniye ?
Intu kula tidooru tabgo talaamiizah walla ?
28 Wa gammo ayyarooh wa gaalo :
Inta bas tilmiizah.
Aniina talaamiiz hana Muusa.
29 Naʼarfu Allah kallam le Muusa wa laakin al-naadum da,
ma naʼarfu hu min ween.
30 Wa l-raajil radda leehum wa gaal :
Kalaamku ajiib !
Hu fattah leyi uyuuni wa laakin intu ma taʼarfu min ween hu jaayi.
31 Kullina naʼarfu Allah ma yasmaʼ duʼa hana l-muznibiin.
Allah yasmaʼ duʼa hana l-naadum al-saalih al-gaaʼid yisawwi muraadtah.
32 Min bidaayit al-dunya,
abadan ma simiʼna be ayyi naadum al-fattah uyuun hana naadum mawluud ke amyaan.
33 Kan al-naadum da ma min Allah,
hu abadan ma yagdar yisawwi cheyy.
34 Wa raddo leyah wa gaalo :
Inta wildook wa rabbook fi zunuub.
Ma tagdar tiʼallimna cheyy.
Wa khalaas,
taradooh.
35 Wa Isa simiʼ al-naadum al-awwal amyaan taradooh wa macha ligiih.
Wa gaal leyah :
Inta muʼmin be Ibn al-Insaan walla ?
36 Wa gaal :
Ya l-sayyid,
hu yaatu ?
Ooriini achaan niʼaamin beyah.
37 Wa Isa gaal leyah :
Inta chiftah wa hu al-naadum al-gaaʼid yihajji leek.
38 Wa l-naadum gaal :
Ya Rabb,
ana muʼmin beek.
Wa sajad leyah.
39 Wa Isa gaal :
Ana jiit fi l-dunya achaan nijiib hisaab wa beyah al-naas al-amyaaniin bichiifu wa l-naas al-bichiifu yabgo amyaaniin.
40 Wa waahidiin min al-Fariisiyiin gaaʼidiin maʼaayah wa simʼo al-kalaam da wa gaalo :
Tuguul aniina amyaaniin walla ?
41 Wa Isa radda leehum wa gaal :
Kan sahiih intu amyaaniin,
intu ma khaatiyiin.
Laakin gultu intu tichiifu wa achaan da al-khata yagood foogku.