Akhwaan Isa lissaaʼ ma aamano beyah
7
Wa baʼad da,
Isa gamma yuruukh fi hillaal hana daar al-Jaliil.
Hu ma dawwar yuruukh fi hillaal hana daar al-Yahuudiiya achaan kubaaraat al-Yahuud dawwaro yaktuluuh.
2 Wa iid usmah Iid al-Lagaadiib garrab.
3 Wa akhwaan hana Isa hajjo leyah wa gaalo :
Gumm min hini.
Amchi fi daar al-Yahuudiiya wa khalli talaamiizak yichiifu al-amal al-inta tisawwiih.
4 Kan naadum yidoor yabga maʼruuf,
hu ma yilabbid amalah le l-naas.
Kan tidoor tisawwi achya misil dool,
khalaas amchi khalli kulla l-naas yichiifuuk.
5 Fi l-wakit da,
akhwaanah kula lissaaʼ ma aamano beyah.
6 Wa Isa radda leehum wa gaal :
Al-wakit al-Allah gataʼah leyi lissaaʼ ma ja.
Laakin leeku intu,
tagdaro tamchu ayyi wakit.
7 Naas al-dunya ma yakrahooku wa laakin yakrahooni ana achaan ana chaahid fooghum wa nuguul amalhum fasil.
8 Intu gummu amchu wa ayyudu fi Madiinat al-Khudus.
Fi l-iid da,
ana ma nugumm.
Al-wakit al-nugumm foogah lissaaʼ ma ja.
9 Wa hu gaal al-kalaam da wa gaʼad fi daar al-Jaliil.
10 Wa wakit akhwaanah gammo khalaas wa macho fi l-madiina yiʼayyudu,
Isa kula macha.
Wa laakin ma oora naadum wa fi l-safar ma fi naadum baʼarfah.
11 Wa fi Madiinat al-Khudus,
kubaaraat al-Yahuud gaaʼidiin yifattuchu Isa fi ust al-naas al-jo le l-iid wa gaaʼidiin yasʼaloohum wa yuguulu :
Hu gaaʼid ween ?
12 Wa kulla l-naas gaaʼidiin yihajju beyah ambeenaathum be hiss tihit.
Al-waahidiin gaaʼidiin yuguulu hu naadum adiil wa waahidiin yuguulu hu gaaʼid yukhuchch al-naas.
13 Wa kulla l-naas khaayfiin min kubaaraat al-Yahuud wa achaan da,
ma hajjo beyah be hiss foog.
Al-Masiih hajja le l-Yahuud
14 Wakit nuss ayyaam al-iid* faato khalaas,
Isa dakhal fi Beet Allah wa gamma yiʼallim al-naas.
15 Wa l-Yahuud ajjabo bilheen wa gaalo :
Kikkeef al-naadum da bigi aalim wa ma gara ?
16 Wa Isa radda leehum wa gaal :
Al-kalaam al-niʼallimku beyah ma jaayi minni ana.
Hu jaayi min Allah al-rassalaani.
17 Ayyi naadum kan indah niiye yisawwi kulla cheyy al-Allah yidoorah,
hu yaʼarif kan kalaami jaayi min Allah aw kan minni ana bas.
18 Ayyi naadum al-gaaʼid yiʼallim al-naas be taʼliim haggah halaalah,
hu yidoor chukur min al-naas.
Laakin al-naadum al-yidoor al-naas yachkuru Allah al-rassalah,
kalaam al-naadum da sahiih wa hu ma yukhuchch ayyi naadum.
19 Muusa ma antaaku al-Tawraat walla ?
Wa laakin ma fi naadum minku yitabbig kalaam al-Tawraat.
Maala tidooru taktuluuni ?
20 Wa l-naas raddo leyah wa gaalo :
Ma ke.
Inta muchootin.
Yaatu yidoor yaktulak ?
21 Wa Isa radda leehum wa gaal :
Ana sawweet ajab waahid* fi yoom al-sabit wa intu kulluku ajjabtu minnah bilheen.
22 Wa tuguulu Muusa antaaku wasiiyat al-tahuura.
Wa laakin be l-sahiih,
juduudna al-awwalaaniyiin kula induhum al-tahuura gubbaal Muusa.
Wa be sabab al-wasiiye di,
intu titahhuru naadum hatta kan fi yoom al-sabit kula*.
23 Wa kan titahhuru naadum yoom al-sabit achaan ma tikhaalufu wasiiyat Muusa,
maalku ziʼiltu minni kan fi yoom al-sabit ana anteet le naadum al-aafe fi kulla jismah ?
24 Ma tahkumu be l-zaahir.
Ahkumu be l-hagg.
25 Wa naas waahidiin min sukkaan Madiinat al-Khudus assaaʼalo ambeenaathum wa gaalo :
Da ma al-naadum al-yidooru yaktuluuh walla ?
26 Laakin daahu gaaʼid yikallim fi ust al-naas wa l-kubaaraat ma yuguulu cheyy.
Akuun irifo khalaas hu al-Masiih.
27 Laakin al-naadum da,
naʼarfu al-bakaan al-jaayi minnah.
Wa wakit al-Masiih yibiin,
ma fi naadum yaʼarif al-bakaan al-hu ja minnah.
28 Wa achaan da,
wakit Isa gaaʼid yiʼallim al-naas fi hooch Beet Allah,
hu hajja be hiss chadiid wa gaal :
Sahiih taʼarfuuni walla ?
Sahiih taʼarfu al-bakaan al-ana jiit minnah walla ?
Ana ma jiit be izni.
Al-rassalaani hu bas saadikh wa intu ma taʼarfuuh.
29 Wa laakin ana naʼarfah achaan ana jaayi minnah wa hu rassalaani.
30 Wa fi chaan da,
naas waahidiin dawwaro yakurbuuh wa laakin ma fi naadum sawwa foogah cheyy achaan al-wakit al-Allah gataʼah leyah lissaaʼ ma ja.
31 Wa fi l-bakaan da,
naas katiiriin aamano beyah wa gaalo :
Al-Masiih kan ja,
yisawwi ajaayib ziyaada min al-naadum da walla ?
32 Wa l-naas gaaʼidiin yihajju tihit tihit ambeenaathum wa yuguulu kalaam misil da fi Isa.
Wa l-Fariisiyiin simʼoohum wa lammo maʼa kubaaraat rujaal al-diin wa rassalo askarhum achaan yakurbu Isa.
33 Wa Isa gaal :
Ana nagood maʼaaku chiyya bas wa baʼad da namchi fi bakaan hana l-rassalaani.
34 Wa intu tifattuchuuni wa ma talgooni wa l-bakaan al-ana nagood foogah ma tagdaro taju foogah.
35 Wa l-Yahuud hajjo ambeenaathum wa gaalo :
Ween al-bakaan al-yidoor yamchi foogah wa aniina ma nagdaro nalgooh ?
Hal hu yidoor yisaafir le l-Yahuud al-muchattatiin ajaanib fi buldaan al-Yuunaaniyiin walla ?
Hu yidoor yiʼallim al-Yuunaaniyiin walla ?
36 Wa l-kalaam al-gaalah da «
intu tifattuchuuni wa ma talgooni wa l-bakaan al-ana nagood foogah ma tagdaro taju foogah »,
chunu maʼanaatah ?
Buhuur hana almi al-haya
37 Wa aakhir ayyaam al-iid,
hu akbar yoom al-iid.
Wa fi l-yoom da,
Isa gamma foog wa hajja le l-naas be hiss aali wa gaal :
Kan ayyi naadum atchaan,
khalli yaji leyi yachrab.
38 Wa ayyi naadum al-yiʼaamin beyi,
buhuur hana almi al-haya yugummu yajru fi galbah wa da misil maktuub fi l-Kitaab.
39 Wa be l-kalaam da,
hu hajja be l-Ruuh al-Khudduus al-baʼadeen yanzil fi l-naas al-muʼminiin beyah.
Wa fi l-wakit da,
Allah lissaaʼ ma nazzal al-Ruuh achaan Isa lissaaʼ ma talaʼ fi majdah.
Al-naas gammo alkhaalato
40 Wakit al-naas simʼo al-kalaam da,
waahidiin minhum gaalo :
Akiid hu bas al-nabi.
41 Wa naas waahidiin gaalo :
Da bas al-Masiih.
Wa naas waahidiin gaalo :
Haay !
Al-Masiih yaji min daar al-Jaliil walla ?
Abadan.
42 Al-Masiih yaji min zurriiyit Sayyidna Dawuud wa min Beet Laham,
al-hille al-rabbo foogha Dawuud.
Ma maktuub fi l-Kitaab walla ?
43 Wa be misil da,
al-naas ankhalafo ambeenaathum fi sabab Isa.
44 Naas waahidiin dawwaro yakurbuuh wa laakin naadum ke ma gidir sawwa leyah cheyy.
45 Wa l-askar gabbalo le kubaaraat rujaal al-diin wa l-Fariisiyiin.
Wa l-kubaaraat saʼalo al-askar wa gaalo :
Maala ma jibtuuh leena ?
46 Wa l-askar raddo leehum wa gaalo :
Abadan ma fi naadum hajja kalaam ajiib misil al-naadum da.
47 Wa l-Fariisiyiin raddo leehum wa gaalo :
Haay !
Hu khachchaaku intu kula ?
48 Fiyah naadum waahid min al-kubaaraat aw min al-Fariisiyiin al-aaman beyah walla ?
49 Naas al-hille dool ma baʼarfu al-Tawraat.
Humman manaaʼiil.
50 Wa Nigudiimus maʼaahum wa hu al-naadum al-yoom waahid macha hajja maʼa Isa be l-leel.
Wa hu hajja leehum wa gaal :
51 Kan naadum ma indah fursa le yidaafiʼ le nafsah wa kan aniina ma akkadna fi l-cheyy al-sawwaah,
chariiʼatna tikhalliina nahkumuuh walla ?
52 Wa l-kubaaraat raddo leyah gaalo :
Haay !
Inta kula min daar al-Jaliil walla ?
Agri al-Kitaab adiil ke wa tichiif ma fi nabi yaji min daar al-Jaliil.
53 Wa khalaas,
kulluhum chatto wa ayyi waahid macha le beetah.