Buʼaas al-Masiih
16
Wa yoom al-sabit kammal fi l-makharib wa Mariyam al-Majdaliiye wa Saluuma wa Mariyam amm Yaakhuub maragan wa charan riihe achaan yusubbanha fi janaazat Isa.
2 Wa awwal yoom al-usbuuʼ,
bakkaran fajur badri wa wasalan fi bakaan al-khabur wakit al-harraay dahaabha maragat.
3 Wa gaaʼidaat yihajjan ambeenaathin wa yuguulan :
Yaatu al-yidardig leena al-hajar min khachum al-khabur ?
4 Wa rafaʼan ruuseenhin wa chaafan al-hajar mudardag min khachum al-khabur khalaas.
Wa l-hajar da kabiir bilheen.
5 Wa dakhalan fi l-khabur wa chaafan malak suurtah misil sabi laabis khalag abyad gaaʼid tihit fi nussihin al-zeenaay.
Wa barjalan marra waahid.
6 Wa gaal leehin :
Ma tibarjilan.
Intan gaaʼidaat tifattichan Isa al-min al-Naasira al-katalooh fi l-saliib.
Hu baʼas khalaas.
Hu hini ma fiih.
Chiifan al-bakaan al-awwal ragadooh foogah.
7 Wa hassaʼ amchan le talaamiizah wa khaassatan le Butrus wa guulan leehum «
Isa maachi giddaamku fi daar al-Jaliil wa hinaak tichiifuuh misil hu awwal gaalah leeku ».
8 Wa l-awiin maragan min al-khabur wa jaran.
Wa hinna gaaʼidaat yarjifan min al-ajab wa l-khoof.
Wa ma hajjan beyah le ayyi naadum achaan hinna khaayfaat.
Al-Masiih baan le Mariyam
9 Wa Isa baʼas fajur badri fi yoom al-ahad.
Wa hu baan awwal le Mariyam al-Majdaliiye wa di al-mara al-awwal tarad minha sabʼa chawaatiin.
10 Wa hi gammat wa hajjat beyah le rufgaanah.
Wa humman haznaaniin wa gaaʼidiin yabku leyah.
11 Wa hi oorathum kadar Isa hayy wa hi chaafatah wa laakin humman abo ma saddakho kalaamha.
Al-Masiih baan le naaseen
12 Wa baʼad da,
naaseen min al-talaamiiz maachiin fi l-kadaade wa Isa baan leehum suurtah chig.
13 Wa humman gabbalo fi l-madiina wa ooro beyah al-talaamiiz al-aakhariin laakin al-aakhariin ma saddakho be kalaamhum.
Al-Masiih baan le l-ihdaachar
14 Wa baʼadeen Isa baan le l-talaamiiz al-ihdaachar wakit humman gaaʼidiin yaakulu.
Wa hu harajaahum achaan ma aamano wa gawwo ruuseenhum wa abo ma saddakho kalaam al-naas al-chaafooh baʼad hu baʼas.
15 Wa gaal leehum :
Amchu fi kulla l-ard wa ballukhu al-bichaara le kulla l-naas fi kulla bakaan.
16 Wa ayyi naadum al-yiʼaamin beyi wa yikhattusuuh,
yanja.
Wa ayyi naadum al-ma yiʼaamin beyi,
Allah yiʼaakhibah.
17 Wa l-muʼminiin yalgo gudra achaan yisawwu ajaayib.
Yaturdu be usmi al-chawaatiin wa yihajju be lukhkhaat judaad.
18 Wa yakurbu dabaayib wa kan yacharbo churaab al-indah samm,
ma yisawwi leehum cheyy fasil.
Wa yukhuttu iideenhum foog al-mardaaniin wa l-mardaaniin yalgo al-aafe.
Al-Masiih anrafaʼ fi l-samaawaat
19 Wa baʼad al-Rabb Isa kallam leehum,
hu anrafaʼ fi l-samaawaat wa gaʼad fi kursi jamb Allah fi nussah al-zeenaay.
20 Wa talaamiizah macho wa ballakho al-bichaara le l-naas fi ayyi bakaan.
Wa l-Rabb aawanaahum wa antaahum ajaayib achaan yisabbit al-bichaara al-humman gaaʼidiin yiballukhuuha.
Aamiin.