Al-khilaaf fi aadaat al-juduud
7
Wa fi l-bakaan da,
fi Fariisiyiin wa ulama waahidiin al-jo min Madiinat al-Khudus.
Humman gaaʼidiin fi ust al-naas al-yasmaʼo kalaam Isa.
2 Wa chaafo kadar waahidiin min talaamiizah ma tahharo iideenhum gubbaal ma yaakulu.
Wa fi aadaat al-Fariisiyiin,
kan naadum ma khassal iideenah gubbaal al-akil iideenah ma taahiriin.
3 Wa l-Fariisiyiin maʼa kulla l-Yahuud ma yaakulu illa kan awwal tahharo iideenhum be almi hasab aadaat juduudhum.
4 Wa kan yigabbulu min al-suug,
yikhassulu iideenhum gubbaal ma yaakulu cheyy achaan ma yidooru yabgo ma taahiriin.
Wa yitaabuʼu aadaat katiiriin misil deel.
Wa yikhassulu ayyi kooro wa sakhkhaan wa ayyi maaʼuun hana nahaas hasab al-aadaat deel.
5 Wa l-Fariisiyiin wa l-ulama saʼalooh le Isa wa gaalo :
Maala talaamiizak ma yitaabuʼu aadaat al-juduud ?
Maala yaakulu be iideen ma taahiriin ?
6 Wa Isa radda leehum wa gaal :
Kalaam al-nabi Ichaʼya sahiih.
Hu hajja foogku intu al-munaafikhiin.
Maktuub fi kitaab Ichaʼya,
Allah gaal <Al-naas dool yikarrumuuni be kalaam khuchuumhum wa laakin fi guluubhum ma yiriiduuni.
7 Sujuudhum leyi baatil wa kulla taʼaaliimhum da wasaaya al-naas bas>.
8 Wa intu ke tikhallu minku wasiiyit Allah wa tinkarubu fi aadaat al-naas.
9 Wa battaan Isa gaal leehum :
Mabruuk leeku !
Ligiitu al-derib al-yikhalliiku tankuru min wasiiyit Allah wa titaabuʼu aadaatku fi badalha.
10 Akiid Muusa gaal <Karrim ammak wa abuuk>
wa <Ayyi naadum al-yuguul kalaam fasil fi ammah walla abuuh,
waajib yaktuluuh>.
11 Laakin intu tuguulu kan naadum hajja le ammah wa abuuh wa gaal «
Kulla cheyy al-awwal saaʼadtuku beyah min hini wa giddaam bigi khurbaan »
(wa khurbaan maʼanaatah al-chokhol al-naadum antaah le Allah),
12 tuguulu kadar ma waajib le l-naadum da yisaaʼid ammah wa abuuh.
13 Wa misil da,
tibattulu kalaam Allah fi chaan titaabuʼu aadaatku al-tiʼallumuuhum le l-naas.
Wa tisawwu cheyy katiir misil da.
Al-yisawwi al-naadum ma taahir
14 Wa battaan Isa naada kulla l-naas wa gaal leehum :
Khalli ayyi naadum minku yasmaʼ kalaami wa yafhamah.
15 Ma fi cheyy al-yisawwi naadum ma taahir kan yidissah fi khachmah.
Laakin al-cheyy al-maarig min lubb al-naadum,
da bas al-yisawwiih ma taahir.
16 Ayyi naadum al-indah adaan khalli yasmaʼ.
17 Wa wakit Isa gamma min al-naas wa dakhal fi l-beet,
talaamiizah saʼalooh fi maʼana al-masal da.
18 Wa Isa gaal leehum :
Wa intu kula ma fihimtu walla ?
Ma fi cheyy al-yadkhul fi khachum al-naadum wa yisawwi al-naadum ma taahir
19 achaan ma yamchi fi galbah.
Al-akil yamchi fi batnah bas wa baʼadeen yamrug min jildah.
Wa be l-kalaam da,
Isa jaʼal kulla cheyy min al-akil taahir.
20 Wa battaan Isa gaal :
Al-maarig min lubb al-naadum,
da bas al-yisawwiih ma taahir.
21 Achaan min al-naadum daakhal wa min galbah yamrug al-fikir al-cheen wa chahwa al-fasle wa l-sirge wa l-katil
22 wa l-zina wa l-tamaʼ wa l-fasaala wa l-khachch wa l-fasaad wa een al-naas wa l-gatiiʼe wa l-istikbaar wa l-amal al-bala fikir.
23 Kulla al-achya dool jaayiin min galib al-naadum wa dool bas al-yisawwu al-naadum ma taahir.
Iimaan al-mara al-Lubnaaniiye
24 Wa Isa gamma min al-bakaan da wa macha fi balad hana Suur wa Seeda.
Wa dalla fi beet waahid wa dawwar al-naas ma yaʼarfu kadar hu gaaʼid foogah.
Laakin ma gidro yadharo al-naas min al-khabar.
25 Wa mara waahide bineeytha muchootine wa ajala ke al-mara simʼat khabar hana Isa wa jaat leyah wa sajadat giddaamah.
26 Wa l-mara di ma min al-Yahuud.
Hi Lubnaaniiye.
Wa chahadatah le Isa achaan yatrud al-cheetaan min bineeytha.
27 Wa Isa radda leeha be masal wa gaal :
Khalli al-iyaal yaakulu awwal.
Akil al-iyaal da kan nantuuh le l-kulaab,
da ma sameh.
28 Wa hi raddat leyah wa gaalat :
Sayyidna,
kalaamak sahiih.
Wa laakin al-kulaab al-fi l-hooch yaakulu al-akil al-yidaffig min al-sufra wakit al-iyaal gaaʼidiin yaakulu kula.
29 Wa Isa gaal leeha :
Khalaas,
gabbili be deribki.
Be sabab kalaamki da,
al-cheetaan marag min bineeytki.
30 Wa l-mara gammat machat beetha wa ligat al-bineeye aafe.
Hi raagde fi l-sariir wa l-cheetaan al-awwal gaaʼid foogha ma fiih.
Al-Masiih daawa naadum ambuuku
31 Wa baʼad da Isa gamma min turaab hana Suur wa chagga turaab hana Seeda wa balad al-Mudun al-Achara wa lihig bahar al-Jaliil.
32 Wa jaabo leyah naadum atrach al-ma yihajji adiil.
Wa chahadooh le Isa achaan yukhutt foogah iideenah wa yidaawiih.
33 Wa Isa waddaah chiyya baʼiid min al-naas wa dassa leyah usbaʼah al-waahid fi adaanah al-zeene wa usbaʼa al-aakhar fi adaanah al-isra.
Wa baʼad da,
hu bazzakh fi iideenah wa limis lisaan al-naadum.
34 Wa rafaʼ raasah wa chaaf foog fi l-sama wa ganat wa hajja leyah be kalaam ibraani wa gaal «
Affasa »
wa maʼanaatah «
abga faatih ».
35 Wa udunneenah anfataho wa lisaanah anhalla wa gamma yihajji kalaam waadih.