Jawaabaat le Timuutaawus
min jawaabaat al‑rasuul Buulus
Mugaddima
Al‑hamdulillah, Rabbina yaʼarif al‑yiʼaawinna wa nalgo minnah chajaaʼa. Wa achaan da, hu antaana fi l‑Kitaab kalaam rusulah al‑katabooh le waahidiin min talaamiizhum. Al‑rasuul Buulus katab jawaabaat itneen le tilmiizah Timuutaawus wa hu katab al‑jawaabaat al‑itneen dool be gudrat al‑Ruuh al‑Khudduus wa be izin Allah.
Timuutaawus hu min hille waahide usumha Listara al‑gaaʼide fi balad Turkiya. Wa l‑rasuul Buulus macha ballakh foogha bichaarat al‑Masiih wa naas waahidiin aamano be l‑Masiih. Wa l‑kalaam da maktuub fi Aʼmaal al‑Rusul fasul 14 aaya 6‑23. Wa baʼadeen al‑rasuul gabbal le Listara achaan yichajjiʼ al‑akhwaan wa naada Timuutaawus achaan yisaafir wa yakhdim maʼaayah. Wa l‑kalaam da binlagi fi Aʼmaal al‑Rusul fasul 16 aaya 1‑5. Min al‑wakit daak, Timuutaawus gaaʼid yisaafir maʼa Buulus wa yiʼaawinah fi kulla khidimtah wa bigi le Buulus misil wileedah.
Kitaab Aʼmaal al‑Rusul yiʼooriina be safar Buulus lahaddi wisil fi madiinat Rooma. Wa fi l‑wakit daak, hu masjuun wa gaaʼid yarja fursa le yidaafiʼ le nafsah giddaam sultaan al‑Roomaaniyiin. Wa fi l‑akhiir, talagooh min al‑sijin wa da baʼad kitaab Aʼmaal al‑Rusul ankatab khalaas. Wa l‑rasuul gamma yisaafir battaan le yiballikh bichaarat al‑Masiih. Wa fi safarah, hu wadda Timuutaawus fi hillit Afasus wa khallaah foogha achaan yiʼallim al‑Masiihiyiin hinaak. Wa Buulus zaatah macha giddaam fi Magiduuniya. Wa wakit wisil fi Magiduuniya, hu katab al‑jawaab al‑awwal le Timuutaawus achaan yichajjiʼah fi amalah wa yizakkirah be l‑wasaaya al‑awwal antaahum leyah wa yiwassifah kikkeef yinazzim al‑muʼminiin.
Wa baʼad da, siyaasit al‑Roomaaniyiin khayyarat. Al‑rasuul Buulus karabooh battaan wa waddooh masjuun fi Rooma. Wa Buulus irif mootah garrab. Wa fi l‑bakaan da, hu katab al‑jawaab al‑taani wa wassa Timuutaawus achaan yagood saabit wa ma yakhaaf min al‑taʼab. Wa dawwar minnah yaji leyah ajala fi Rooma.
Khalli ayyi naadum al‑yagri al‑jawaabaat dool yasʼal Allah achaan Allah yisabbit kalaamhum fi galbah. Aamiin.