رُؤية 21

كل شيّء جديد

١ وَ أَنَا شِفْت سَمَاءْ جَدِيدْ وَ أَرْض جَدِيدَةْ. وَ السَّمَاءْ وَ الْأَرْض الْأَوَّلْ قَاعِدِينْ بِقَوْا مَا فِيهُمْ وَ الْبَحَرْ كُلَ بِقِي مَا فِيهْ. ٢ وَ شِفْت الْمَدِينَةْ الْمُقَدَّسَةْ وَ اللّٰهْ قَاعِدْ يِنَزِّلْهَا مِنْ السَّمَاءْ وَ هِي مَدِينَةْ الْقُدُسْ الْجَدِيدَةْ. وَ هِي مِثِلْ عَرُوسْ مُجَمَّلَةْ جَايَةْ لِعَرِيسْهَا. ٣ وَ أَنَا سِمِعْت حِسّ شَدِيدْ جَايِ مِنْ الْعَرْش وَ قَالْ: «دَاهُو مَسْكَنْ هَنَا اللّٰهْ قَاعِدْ فِي أُسْط النَّاسْ. هُو سَاكِنْ مَعَاهُمْ وَ هُمَّنْ بِقَوْا شَعَبَهْ. اللّٰهْ ذَاتَهْ قَاعِدْ مَعَاهُمْ وَ هُو بَسْ رَبُّهُمْ. ٤ وَ هُو يُقُشّ مِنْ عُيُونْهُمْ كُلَّ دُمُوعْهُمْ وَ الْمَوْت يَبْقَى مَا فِيهْ. وَ مَا فِي حِزِنْ بَتَّانْ وَ لَا بَكِي وَ لَا تَعَبْ أَشَانْ كُلَّ شَيّءْ الْأَوَّلْ قَاعِدْ بِقِي مَا فِيهْ.»

٥ وَ الْقَاعِدْ فِي الْعَرْش قَالْ: «نَعَمْ، أَنَا قَاعِدْ نِجَدِّدْ كُلَّ شَيّءْ.» وَ بَتَّانْ حَجَّى لَيِّ وَ قَالْ: «أَكْتِبْ الْكَلَامْ دَا أَشَانْ الْكَلَامْ دَا ثَابِتْ وَ صَحِيحْ.»

٦ وَ أَوْرَانِي وَ قَالْ: «خَلَاصْ، كُلَّ شَيّءْ كَمَّلْ. أَنَا الْأَوَّلْ وَ الْأَخِيرْ. أَنَا الْبِدَايَةْ وَ النِّهَايَةْ. وَ أَنَا نَنْطِي إِذِنْ لِأَيِّ نَادُمْ الْعَطْشَانْ أَشَانْ يَشْرَبْ أَلْمِي مِنْ بِيرْ أَلْمِي الْحَيَاةْ بَلَا تَمَنْ. ٧ وَ أَيِّ نَادُمْ الْيِنَّصِرْ، يَوْرِثْ كُلَّ الْبَرَكَةْ دِي. وَ أَنَا نَبْقَى رَبَّهْ وَ هُو يَبْقَى وِلَيْدِي. ٨ لَاكِنْ الْخَوَّافِينْ وَ الْمَا مُؤمِنِينْ وَ الْفَاسْدِينْ وَ كَتَّالِينْ الدِّمَمْ وَ الزَّنَّايِينْ وَ السَّحَّارِينْ وَ عَابِدِينْ الْأَصْنَامْ وَ كُلَّ الْكَدَّابِينْ، بَكَانْهُمْ يَبْقَى بَحَرْ النَّارْ وَ الْكِبْرِيتْ الْأَصْفَرْ. وَ دَا بَسْ الْمَوْت التَّانِي.»

مدينة اللّه الجديدة

٩ وَ مَلَكْ وَاحِدْ جَاءْ لَيِّ وَ هُو وَاحِدْ مِنْ السَّبْعَةْ مَلَائِكَةْ الْأَوَّلْ عِنْدُهُمْ السَّبْعَةْ كِيسَانْ وَ دَفَّقَوْا السَّبْعَةْ وَبَاءْ الْأَخِيرِينْ فِي الْأَرْض. وَ هُو حَجَّى لَيِّ وَ قَالْ: «تَعَالْ، نِوَصِّفَكْ الْعَرُوسْ التَّبْقَى زَوْجَةْ الْحَمَلْ.»

١٠ وَ فِي الرُّؤْيَةْ دِي، هُو وَدَّانِي بَعِيدْ وَ خَطَّانِي فِي رَاسْ هَنَا حَجَرْ طَوِيلْ بِلْحَيْن. وَ وَصَّفَانِي الْمَدِينَةْ الْمُقَدَّسَةْ الْاللّٰهْ قَاعِدْ يِنَزِّلْهَا مِنْ السَّمَاءْ وَ هِي مَدِينَةْ الْقُدُسْ. ١١ وَ هِي ضَاوِيَةْ بِنُورْ مَجِيدْ هَنَا اللّٰهْ. الْمَدِينَةْ تِرَارِي مِثِلْ حَجَرْ غَالِي وَ مِثِلْ فَارُوسْ وَ مِثِلْ قَزَّازْ صَافِي مَرَّةْ وَاحِدْ. ١٢ دُرْدُرْهَا قَوِي وَ طَوِيلْ وَ عِنْدَهْ 12 بِيبَانْ وَ فِي 12 مَلَائِكَةْ وَ أَيِّ مَلَكْ مَسْؤُولْ فِي بَابْ وَاحِدْ. وَ أَسَامَيْ هَنَا قَبَايِلْ بَنِي إِسْرَائِيلْ الْأَتْنَا عَشَرْ مَكْتُوبِينْ فِي الْبِيبَانْ. ١٣ فِي نُصَّهْ الصَّبْحَانِي، تَلَاتَةْ بِيبَانْ وَ فِي نُصَّهْ الْمُنْشَاقِي، تَلَاتَةْ بِيبَانْ وَ فِي نُصَّهْ الْوَطِيَانِي، تَلَاتَةْ بِيبَانْ وَ فِي نُصَّهْ الْغَرْبَانِي، تَلَاتَةْ بِيبَانْ. ١٤ وَ دُرْدُرْ الْمَدِينَةْ عِنْدَهْ 12 أَسَاسْ وَ أَسَامَيْ هَنَا رُسُلْ الْحَمَلْ الْأَتْنَا عَشَرْ مَكْتُوبِينْ فَوْقهُمْ.

١٥ وَ الْمَلَكْ الْقَاعِدْ يِحَجِّي لَيِّ عِنْدَهْ عَصَاةْ هَنَا دَهَبْ فِي إِيدَهْ أَشَانْ يِقَاوِسْ الْمَدِينَةْ وَ بِيبَانْهَا وَ دَرَادِرْهَا. ١٦ وَ الْمَدِينَةْ مُرَبَّعَةْ. عُرْضَهَا وَ طُولْهَا سَوَا سَوَا. وَ هُو قَاوَسْ الْمَدِينَةْ بِعَصَاتَهْ وَ طُولْهَا 12 000 إِسْتَادِيَةْ وَ عُرْضَهَا وَ طُولْهَا فَوْق سَوَا سَوَا. ١٧ وَ الْمَلَكْ قَاوَسْ تُخُنْ الدُّرْدُرْ بِالدُّرَاعْ الْيِقَاوُسُوا بَيَّهْ النَّاسْ وَ لِقِي 144 دُرَاعْ.

١٨ وَ الدُّرْدُرْ مَبْنِي بِفَارُوسْ وَ بُيُوتْ الْمَدِينَةْ هَنَا دَهَبْ صَافِي يِرَارِي مِثِلْ الْقَزَّازْ. ١٩ وَ أَسَاسْ هَنَا الدُّرْدُرْ عِنْدَهْ زِينَةْ مِنْ أَيِّ حَجَرْ غَالِي. الْأَسَاسْ الْأَوَّلَانِي عِنْدَهْ فَارُوسْ وَ التَّانِي يَاقُوتْ ظَهْرِي وَ التَّالِتْ عَقِيقْ أَحْمَرْ وَ الرَّابِعْ زُمُرُّدْ أَخْضَرْ. ٢٠ وَ الْخَامِسْ عَقِيقْ أَزْرَقْ وَ السَّادِسْ مَرَجَانْ أَحْمَرْ وَ السَّابِعْ زَبَرْجَدْ أَصْفَرْ وَ التَّامِنْ عَقِيقْ ظَهْرِي وَ التَّاسِعْ يَاقُوتْ أَصْفَرْ وَ الْعَاشِرْ عَقِيقْ أَخْضَرْ وَ الْإِحْدَى عَشَرْ فَيْرُوزْ وَ الْأَتْنَا عَشَرْ يَاقُوتْ قَرَضِي. ٢١ وَ الْأَتْنَا عَشَرْ بِيبَانْ دَوْل، هُمَّنْ 12 لُؤلُؤ وَ أَيِّ بَابْ مِنْهُمْ سَوَّوْه مِنْ لُؤلُؤَةْ وَاحِدَةْ بَسْ. وَ شَارِعْ الْمَدِينَةْ مِنْ دَهَبْ صَافِي يِرَارِي مِثِلْ الْقَزَّازْ.

٢٢ وَ مَا شِفْت بَيْت هَنَا عِبَادَةْ فِي الْمَدِينَةْ دِي أَشَانْ فِي قَدّ هَنَا بَيْت عِبَادَةْ، رَبِّنَا اللّٰهْ الْقَادِرْ وَ الْحَمَلْ ذَاتْهُمْ قَاعِدِينْ وَ أَشَانْ دَا بَيْت هَنَا عِبَادَةْ مَا وَاجِبْ بَتَّانْ. ٢٣ وَ الْمَدِينَةْ مَا تِدَوْر نُورْ مِنْ الْحَرَّايْ وَ لَا ضَيّ مِنْ الْقَمَرْ أَشَانْ نُورْ مَجِيدْ هَنَا اللّٰهْ بِقِي نُورْ الْمَدِينَةْ وَ الْحَمَلْ قَاعِدْ يَنْطِيهَا ضَيّ. ٢٤ وَ الْأُمَمْ يِعِيشُوا فِي نُورْهَا وَ مُلُوكْ الْأَرْض يِجِيبُوا لَيْهَا دَرَجَتْهُمْ. ٢٥ بِالنَّهَارْ، بِيبَانْهَا أَبَداً مَا يِسِدُّوهُمْ وَ فِي الْبَكَانْ دَا، الْوَطَاةْ أَبَداً مَا تَبْقَى لَيْل. ٢٦ وَ يِوَدُّوا فِي الْمَدِينَةْ كُلَّ شَيّءْ هَنَا دَرَجَةْ وَ إِكْرَامْ مِنْ الْأُمَمْ. ٢٧ وَ أَيِّ شَيّءْ الْمَا طَاهِرْ وَلَّا أَيِّ نَادُمْ الْيِسَوِّي الْمُحَرَّمَاتْ وَلَّا أَيِّ كَدَّابْ مَا يَدْخُلُوا فَوْقهَا. الْيَدْخُلُوا فِي الْمَدِينَةْ دِي، إِلَّا النَّاسْ الْأَسَامَيْهُمْ مَكْتُوبِينْ فِي كِتَابْ الْحَيَاةْ هَنَا الْحَمَلْ.