جوابات الرسول يُوحَنَّا
الجواب التاني
١
١ جَوَابْ مِنِّي أَنَا الشَّيْخ لَيْكِ إِنْتِ السَّيِّدَةْ الْاللّٰهْ عَزَلَاكِ،
لَيْكِ إِنْتِ وَ عِيَالْكِ* النِّحِبُّكُو فِي الْحَقّ.
وَ مَا أَنَا وِحَيْدِي نِحِبُّكُو.
كُلَّ النَّاسْ الْيَعَرْفُوا الْحَقّ يِحِبُّوكُو.
٢ وَ نِحِبُّكُو بِسَبَبْ الْحَقّ الْقَاعِدْ ثَابِتْ فَوْقنَا وَ الْيَقْعُدْ مَعَانَا إِلَى الْأَبَدْ.
٣ أَكِيدْ السَّلَامْ وَ النِّعْمَةْ وَ الرَّحْمَةْ الْجَايِينْ مِنْ أَبُونَا اللّٰهْ وَ مِنْ إِبْن أَبُونَا،
عِيسَى الْمَسِيحْ،
يَقْعُدُوا مَعَانَا بِالْحَقّ وَ بِالْمَحَبَّةْ.
٤ أَنَا بِقِيتْ فَرْحَانْ مَرَّةْ وَاحِدْ وَكِتْ لَمَّيْت مَعَ وَاحِدِينْ مِنْ عِيَالْكِ وَ شِفْتُهُمْ مَاشِينْ فِي الْحَقّ مِثِلْ أَبُونَا أَمَرَانَا بَيَّهْ.
٥ يَا السَّيِّدَةْ،
نِدَوْر نَطْلُبْ مِنْكِ شَيّءْ وَاحِدْ.
مَا نَكْتِبْ لَيْكِ وَصِيَّةْ جَدِيدَةْ.
الْوَصِيَّةْ دِي سِمِعْنَاهَا مِنْ الْبِدَايَةْ وَ هِي وَاجِبْ نِرَّايَدَوْا أَمْبَيْنَاتْنَا.
٦ كَنْ نِتَابُعُوا وَصَايَا رَبِّنَا،
خَلَاصْ دِي بَسْ الْمَحَبَّةْ.
وَ هِي بَسْ الْوَصِيَّةْ وَ هِي نَفْس الْكَلَامْ السِّمِعْتُوهْ مِنْ الْأَوَّلْ وَ وَاجِبْ تِتَابُعُوهَا.
٧ غَشَّاشِينْ كَتِيرِينْ قَمَّوْا يُرُوغُوا فِي الدُّنْيَا.
هُمَّنْ يَابَوْا مَا يَشْهَدَوْا كَدَرْ عِيسَى الْمَسِيحْ بِقِي إِنْسَانِي وَكِتْ جَاءْ فِي الدُّنْيَا.
النَّادُمْ الْيُقُولْ كَلَامْ مِثِلْ دَا،
هُو غَشَّاشْ وَ عَدُو الْمَسِيحْ.
٨ أَنْقَرْعُوا أَشَانْ الْأَجُرْ الْيَجِي بِسَبَبْ عَمَلْكُو مَا يِوَدِّرْ.
شِدُّوا حَيْلكُو أَشَانْ تَلْقَوْا أَجُرْكُو كَامِلْ.
٩ أَيِّ نَادُمْ الْمَا يَقْعُدْ ثَابِتْ فِي تَعْلِيمْ الْمَسِيحْ وَ لَاكِنْ يِزِيدْ فِي تَعْلِيمْ الْمَسِيحْ كَلَامْ جَدِيدْ،
اللّٰهْ مَا مَعَايَهْ.
النَّادُمْ الْقَاعِدْ ثَابِتْ فِي التَّعْلِيمْ،
هُو بَسْ النَّادُمْ الْأَبُونَا اللّٰهْ قَاعِدْ مَعَايَهْ وَ إِبْن اللّٰهْ كُلَ قَاعِدْ مَعَايَهْ.
١٠ كَنْ نَادُمْ بُقُولْ هُو مَسِيحِي وَ يَجِي لَيْكُو وَ كَلَامَهْ مَا يِوَافِقْ لِلتَّعْلِيمْ دَا،
مَا تِضَيُّفُوهْ وَ مَا تِسَلُّمُوهْ كُلَ.
١١ أَشَانْ النَّادُمْ الْيِسَلِّمَهْ بِقِي مِثِلْ هُو يِعَاوِنَهْ فِي عَمَلَهْ الْفَسِلْ.