جوابات الرسول بُطْرُس
الجواب التاني
مقدمة
الحمْدُ للّٰه، ربِّنا صادِق و كل شيّء الهو قال يبْقى لابُدّ يبْقى. من زمان، اللّه حجّى بلِسان الأنبياء و قال يرسِّل المسيح ليِنجّي الناس و يودّيهم في درِب اللّه. و بتان قال في الأخير، هو يحاسِب كل الناس و يدمِّر الشرّ مرّة واحِد.
و الرسول بُطْرُس هو واحِد من الناس الراغوا مع المسيح. و المسيح جعله واحِد من رُسُله اليبلُّغوا بِشارْته في أيِّ بكان و ينادوا كل الناس في درِب اللّه. و الرسول بُطْرُس كتب الجواب دا بإذِن اللّه و بقُدْرة الروح القُدّوس.
و في الجواب دا، هو يذكِّر المُؤمِنين بالكلام اليعرْفوه البُخُصّ وعد اللّه. اللّه قال هو يسوّي سماء جديد و أرْض جديدة وكت عِيسَى المسيح يقبِّل و إلّا الصالِحين بس يقْعُدوا في الأرْض دي. و أشان دا، المُؤمِنين واجِب يقْعُدوا ثابْتين في درِب الإيمان الاللّه فتحه ليهم بالمسيح. و بتان، بُطْرُس خبّر المُؤمِنين أشان ما يسْمعوا كلام المُعلِّمين الخلّوا مِنهم الحال الصالْحة و نكروا جيّة المسيح التانية.
خلّي اللّه ينْطي أيِّ نادم اليقْري الكلام دا نِعْمة أشان يكْرُب الكلام عديل و يطبِّقه. آمين.