جوابات الرسول بُطْرُس
الجواب الأول
مقدمة
بُطْرُس هو واحِد من التلاميذ الأتنا عشر العزلاهم عِيسَى المسيح ليبْقوا رُسُله. و الرسول بُطْرُس كتب الجواب دا بإذِن اللّه و بقُدْرة الروح القُدّوس.
و هو كتب الجواب دا للمسيحيّين القاعدين في خمْسة مناطِق في آسِيَا، الحاليّاً تُرْكيا. و الناس دَوْل قاعدين يعذُّبوهم و يتعُّبوهم بسبب إيمانهم بالمسيح. و بُطْرُس كتب ليهم أشان يشجِّعهم ليِتابُعوا المسيح و يعيشوا بحال صالْحة و يحْملوا التعب في شان المسيح. و يذكِّرهم كدر همن مِثِل أجانِب في البُلْدان دَوْل أشان إيمانهم. و بعدَيْن، يشْترُكوا مع المسيح في مجْده مِثِل أشْتركوا معايه في التعب.
و بُطْرُس وصّف ليهم ككيف يقْدروا يعيشوا مع ناس الما مُؤمِنين و مع المُؤمِنين كل. حتّى كان همن من قبايِل و بُلْدان شِق شِق كل، همن بِقوا واحِد في عِيسَى المسيح بسبب إيمانهم.
و بُطْرُس أمر المُؤمِنين أشان يحْترُموا الحُكّام و يسْمعوا كلامهم. و هو يشجِّع العبيد و العوين ليِوصُّفوا إيمانهم بالمسيح بحالهم العديلة مع سيدهم أو مع رُجالهن كن ما مُؤمِنين كل. و هو نادى كل المسيحيّين أشان يحْترُموا الواحِدين للآخرين. و بَيْدا، يجيبوا للمسيح الناس الما مُؤمِنين بيه.
خلّي اللّه يبارِك أيِّ نادم اليقْري الكلام دا و يفْتح قلْبه أشان يكْرُب الكلام و يتابِعه في أيِّ حال. آمين.