يَعْقُوب 1

جواب يَعْقُوب

١ جَوَابْ مِنِّي أَنَا يَعْقُوبْ عَبْد اللّٰهْ وَ عَبْد رَبِّنَا عِيسَى الْمَسِيحْ. وَ نِرَسِّلَهْ لَيْكُو إِنْتُو أُمَّةْ اللّٰهْ الْمُشَتَّتِينْ فِي أَيِّ بَكَانْ. السَّلَامْ عَلَيْكُمْ.

الصبُر في التعب و الإيمان الثابِت

٢ يَا أَخْوَانِي، أَفْرَحَوْا فِي أَيِّ تَعَبْ الْيَجِيكُو ٣ أَشَانْ تَعَرْفُوا كَدَرْ التَّعَبْ يِجَرِّبْ إِيمَانْكُو وَ كَنْ قَعَدْتُوا ثَابْتِينْ فِي أُسْط التَّعَبْ، تَبْقَوْا نَاسْ صُبُورِينْ. ٤ وَ خَلِّي صَبُرْكُو يَبْقَى تَمَامْ أَشَانْ بَيَّهْ تَبْقَوْا كَامِلِينْ وَ قَادْرِينْ وَ مَا فِي شَيّءْ يِقَصِّرْ لَيْكُو.

٥ كَنْ نَادُمْ مِنْكُو مَا عِنْدَهْ حِكْمَةْ، خَلِّي يَطْلُبْهَا مِنْ اللّٰهْ وَ اللّٰهْ يَنْطِيهْ. أَشَانْ اللّٰهْ يَنْطِي لِكُلَّ النَّاسْ بِزِيَادَةْ بِجُودْ وَ بَلَا لُوَامَةْ. ٦ وَ خَلِّي يَطْلُبْهَا بِإِيمَانْ ثَابِتْ وَ بَلَا شَكَكْ. نَادُمْ كَنْ يِشَكِّكْ، هُو مِثِلْ شَلَّالْ الْبَحَرْ التِّشِيلَهْ الرِّيحْ وَ تِهِزَّهْ. ٧ نَادُمْ مِثِلْ دَا، خَلِّي مَا يُخُطّ فِي عَقْلَهْ كَدَرْ يَلْقَى شَيّءْ مِنْ رَبِّنَا ٨ أَشَانْ النَّادُمْ دَا قَلْبَهْ إِتْنَيْن وَ هُو مَا ثَابِتْ فِي أَيِّ شَيّءْ الْيِسَوِّيهْ.

سياد المال و المساكين

٩ الْأَخُو الْمُؤمِنْ الْمِسْكِينْ، خَلِّي يَفْرَحْ أَشَانْ اللّٰهْ دَرَّجَهْ. ١٠ وَ الْمُؤمِنْ سِيدْ الْمَالْ كُلَ، خَلِّي يَفْرَحْ أَشَانْ هُو مَسْكَنْ نَفْسَهْ قِدَّامْ اللّٰهْ. وَ سِيدْ الْمَالْ، هُو مِثِلْ قَشّ، مَا يِطَوِّلْ. ١١ كَنْ الْحَرَّايْ طَلَعَتْ وَ بِقَتْ حَامِيَةْ بِلْحَيْن، هِي تُطُقّ الْقَشّ وَ الْقَشّ دَا يَبْقَى أَصْفَرْ وَ يَيْبَسْ وَ يُمُوتْ. وَ مِثِلْ دَا بَسْ، سِيدْ الْمَالْ كُلَ يُمُوتْ فِي أُسُطْ خِدِمْتَهْ وَ يَبْقَى مَا فِيهْ.

التجْرِبة و الذُنوب

١٢ مَبْرُوكْ لِلنَّادُمْ الْيَصْبُرْ فِي التَّعَبْ الْيِجَرِّبْ إِيمَانَهْ. أَشَانْ وَكِتْ التَّجْرِبَةْ دِي كَمَّلَتْ خَلَاصْ، هُو يَلْقَى تَاجْ الْحَيَاةْ. وَ التَّاجْ دَا، هُو الْحَيَاةْ الْاللّٰهْ وَاعَدْ بَيْهَا النَّاسْ الْيِحِبُّوهْ. ١٣ كَنْ نَادُمْ قَاعِدْ فِي التَّجْرِبَةْ، خَلِّي مَا يُقُولْ: «اللّٰهْ قَاعِدْ يِلِزِّنِي فِي الذَّنِبْ.» أَشَانْ أَبَداً مَا فِي شَيّءْ يِلِزّ اللّٰهْ فِي الذَّنِبْ. وَ اللّٰهْ هُو أَبَداً مَا يِلِزّ نَادُمْ فِي الذَّنِبْ. ١٤ لَاكِنْ كَنْ نَادُمْ يِدَوْر يَذْنِبْ، شَهْوَتَهْ بَسْ قَاعِدَةْ تِلِزَّهْ أَشَانْ الذَّنِبْ بِقِي لَيَّهْ حَلُو. ١٥ وَ الشَّهْوَةْ هِي مِثِلْ مَرَةْ التَّغْلَبْ وَ تَلْدَ صَغِيرْ. الشَّهْوَةْ كُلَ تَغْلَبْ وَ تَلْدَ صَغِيرْ وَ صَغِيرْهَا، هُو الذَّنِبْ. وَ الذَّنِبْ كَنْ خَلَاصْ كِبِرْ يِسَبِّبْ الْمَوْت.

١٦ يَا أَخْوَانِي النِّحِبُّكُو، مَا تُغُشُّوا نُفُوسْكُو. ١٧ كُلَّ شَيّءْ الْعَدِيلْ وَ كُلَّ شَيّءْ التَّمَامْ جَايِ مِنْ اللّٰهْ بَسْ وَ يَنْزِلْ مِنْ اللّٰهْ خَالِقْ الْأَنْوَارْ الْفِي السَّمَاءْ. وَ هُو مَا يِلْغَيَّرْ أَبَداً وَ مَا يِلْحَوَّلْ مِثِلْ الضُّلّ. ١٨ بِوَاسِطَةْ كَلَامْ الْحَقّ، اللّٰهْ أَنْطَانَا الْحَيَاةْ الْجَدِيدَةْ بِنِيّتَهْ أَشَانْ أَنِحْنَ نَبْقَوْا مُهِمِّينْ مِنْ كُلَّ مَخْلُوقِينَهْ.

طبِّقين كلام اللّه

١٩ يَا أَخْوَانِي النِّحِبُّكُو، فَكُّرُوا عَدِيلْ. خَلِّي أَيِّ نَادُمْ يُكُونْ دَايْماً جَاهِزْ لِيَسْمَعْ. خَلِّي مَا يِحَجِّي عَجَلَةْ وَ مَا يَزْعَلْ عَجَلَةْ ٢٠ أَشَانْ كَنْ نَادُمْ زَعْلَانْ مَا يِسَوِّي الْعَمَلْ الصَّالِحْ الْاللّٰهْ يِدَوْرَهْ. ٢١ أَشَانْ دَا، خَلُّوا مِنْكُو كُلَّ شَيّءْ الْيِنَجِّسْكُو وَ كُلَّ شَيّءْ الْفَسِلْ وَ أَقْبَلَوْا بِمَسْكَنَةْ الْكَلَامْ الْاللّٰهْ خَطَّاهْ فِي قُلُوبْكُو. الْكَلَامْ دَا عِنْدَهْ قُدْرَةْ أَشَانْ يِنَجِّيكُو.

٢٢ طَبُّقُوا كَلَامْ اللّٰهْ وَ مَا تَسْمَعَوْه بَسْ. كَنْ تَسْمَعَوْه وَ مَا تِطَبُّقُوهْ، تُغُشُّوا نُفُوسْكُو. ٢٣ كَنْ نَادُمْ سِمِعْ كَلَامْ اللّٰهْ وَ مَا طَبَّقَهْ، هُو يَبْقَى مِثِلْ نَادُمْ الْيِشِيفْ وِجْهَهْ فِي أَمْ شَوَّافَةْ. ٢٤ وَ يِشِيفْ كِكَّيْف وِجْهَهْ وَ خَلَاصْ يَمْشِي وَ طَوَّالِي يَنْسَاهْ. ٢٥ وَ لَاكِنْ كَنْ نَادُمْ يُخُطّ بَالَهْ عَدِيلْ فِي وَصَايَا اللّٰهْ الْكَامِلِينْ الْيَنْطُونَا الْحُرِّيَّةْ وَ يِنْكَرِبْ فَوْقهُمْ وَ مَا يَسْمَعْهُمْ لِيَنْسَاهُمْ وَ يِطَبِّقْهُمْ، خَلَاصْ النَّادُمْ دَا، اللّٰهْ يِبَارِكَهْ فِي كُلِّ شَيّءْ الْيِسَوِّيهْ.

٢٦ النَّادُمْ الْيِفَكِّرْ هُو يِتَابِعْ الدِّينْ عَدِيلْ وَ لَاكِنْ مَا يَلْزَمْ لِسَانَهْ، هُو دَا قَاعِدْ يُغُشّ نَفْسَهْ وَ دِينَهْ مَا يَنْفَعْ. ٢٧ دَاهُو الدِّينْ الصَّافِي الْمَا عِنْدَهْ عَيْب قِدَّامْ أَبُونَا اللّٰهْ. عَاوُنُوا الْأَتَامَا وَ الْعَوِينْ الْأَرَامِلْ الْقَاعِدِينْ فِي التَّعَبْ. وَ أَقِيفُوا بَعِيدْ مِنْ الْأَشْيَاءْ الْيِنَجُّسُوا نَاسْ الدُّنْيَا.