عِبْرَانِيِّين 13

الحال الواجْبة

١ أَقْعُدُوا ثَابْتِينْ فِي الْمَحَبَّةْ الْأَخَوِيَّةْ. ٢ مَا تِخَلُّوا مِنْكُو فَضِّلِينْ الضِّيفَانْ الْيَجُوكُو. تَعَرْفُوا كَدَرْ نَاسْ وَاحِدِينْ ضَيَّفَوْا مَلَائِكَةْ وَ مَا عِرْفَوْهُمْ. ٣ فَكُّرُوا فِي أَخْوَانْكُو الْقَاعِدِينْ فِي السِّجِنْ وَ أَجْعَلَوْا نُفُوسْكُو مِثِلْ قَاعِدِينْ مَعَاهُمْ. وَ أَخْوَانْكُو الْقَاعِدِينْ يَحْمَلَوْا التَّعَبْ، فَكُّرُوا فَوْقهُمْ أَشَانْ جِسِمْهُمْ مِثِلْ جِسِمْكُو.

٤ كُلُّكُو أَحْتَرُمُوا الْأَخِيدَةْ. مَا تِخَلُّوا الزِّنَى يِنَجِّسْ سَرَايِرْكُو الزَّوْجِيَّةْ أَشَانْ تَعَرْفُوا كَدَرْ اللّٰهْ يِحَاسِبْ كُلَّ الزَّنَّايِينْ، كَنْ مَاخْدِينْ وَلَّا مَا مَاخْدِينْ كُلَ.

٥ أَنْقَرْعُوا مِنْ حُبّ الْمَالْ وَ أَبْقَوْا رَضْيَانِينْ بِالْعِنْدُكُو أَشَانْ اللّٰهْ قَالْ: ﴿أَبَداً مَا نَابَاكْ وَ لَا نِخَلِّيكْ.﴾ ٦ أَشَانْ دَا، كُلِّنَا نَقْدَرَوْا نُقُولُوا بَلَا شَكَكْ: ﴿اللّٰهْ يِسَاعِدْنِي، أَنَا مَا نَخَافْ مِنْ شَيّءْ. النَّاسْ يَقْدَرَوْا يِسَوُّوا لَيِّ شُنُو؟﴾

٧ فَكُّرُوا عَدِيلْ فِي كُبَارَاتْكُو الْأَوَّلْ بَلَّغَوْا لَيْكُو كَلَامْ اللّٰهْ. فَكُّرُوا فَوْقهُمْ كِكَّيْف هُمَّنْ عَاشَوْا وَ مَاتَوْا. وَ خَلِّي إِيمَانْكُو يَبْقَى مِثِلْ إِيمَانْهُمْ.

٨ عِيسَى الْمَسِيحْ أَبَداً مَا يِلْغَيَّرْ. هُو قَاعِدْ مِنْ أَوَّلْ وَ الْيَوْم وَ إِلَى الْأَبَدْ. ٩ مَا تِخَلُّوا النَّاسْ الْجَايِينْ بِتَعْلِيمْ عَجِيبْ أَوْ شِقْ شِقْ يِوَدُّوكُو فِي دَرِبْ آخَرْ. أَخَيْر قَلِبْ الْإِنْسَانْ يَلْقَى قُدْرَةْ مِنْ رَحْمَةْ اللّٰهْ بَسْ وَ مَا مِنْ الْأَكِلْ الْخَاصّ. وَ النَّاسْ التَّابَعَوْا التَّعْلِيمْ دَا، مَا لِقَوْا مِنَّهْ فَايْدَةْ.

١٠ الضَّحِيَّةْ الْأَنِحْنَ نِشَارُكُوا فَوْقهَا دِي، رُجَالْ الدِّينْ الْيَخْدُمُوا فِي خَيْمَةْ الْعِبَادَةْ مَا عِنْدُهُمْ حَقّ يَاكُلُوا مِنْهَا. ١١ أَشَانْ كَبِيرْ رُجَالْ الدِّينْ يَدْبَحْ بَهَايِمْ ضَحِيَّةْ لِلذُّنُوبْ وَ يِجِيبْ الدَّمّ فِي الْبَكَانْ الْمُقَدَّسْ. لَاكِنْ لَحَمْ الْبَهَايِمْ دَوْل، يِمَرُّقُوهْ بَرَّا مِنْ الْفَرِيقْ وَ يِحَرُّقُوهْ. ١٢ وَ أَشَانْ دَا، عِيسَى كُلَ مَرَقْ وَ تِعِبْ بَرَّا مِنْ الْمَدِينَةْ أَشَانْ يِسَوِّي الشَّعَبْ خَاصّ لِلّٰهْ بِدَفِّقِينْ دَمَّهْ هُو. ١٣ أَشَانْ دَا، خَلِّي نَمُرْقُوا وَ نَمْشُوا لَيَّهْ بَرَّا مِنْ الْفَرِيقْ وَ نَحْمَلَوْا نَفْس الْمُعْيَارْ الْهُو حِمْلَهْ. ١٤ أَشَانْ هِنِي فِي الْأَرْض، مَا عِنْدِنَا مَدِينَةْ التِّطَوِّلْ لَاكِنْ أَنِحْنَ قَاعِدِينْ نُخُطُّوا بَالْنَا فِي الْمَدِينَةْ التَّجِي بَعَدَيْن.

العِبادة التِرضّي اللّه

١٥ فِي بَدَلْ الضَّحِيَّةْ هَنَا الْبَهَايِمْ، خَلِّي نَعَبُدُوا اللّٰهْ بِدَرِبْ عِيسَى وَ نِقَدُّمُوا لِلّٰهْ دَايْماً ضَحِيَّةْ شُكُرْ. وَ دَا مَعَنَاتَهْ الشُّكُرْ الْجَايِ مِنْ النَّاسْ الْيَعَرْفُوا أُسُمْ اللّٰهْ. ١٦ سَوُّوا دَايْماً الْخَيْر وَ أَسَّاعَدَوْا أَمْبَيْنَاتْكُو أَشَانْ دِي بَسْ الْعِبَادَةْ الْاللّٰهْ يَرْضَى بَيْهَا. ١٧ أَسْمَعَوْا كُبَارَاتْكُو وَ تَابُعُوا كَلَامْهُمْ عَدِيلْ. أَشَانْ هُمَّنْ قَاعِدِينْ يِفَكُّرُوا فَوْقكُو وَ يَعَرْفُوا كَدَرْ هُمَّنْ مَسْؤُولِينْ مِنْكُو قِدَّامْ اللّٰهْ الْيِحَاسِبْهُمْ. خَلِّي خِدْمِتْهُمْ دِي تَبْقَى لَيْهُمْ فَرْحَةْ. كَنْ تَبْقَى لَيْهُمْ قَاسِيَةْ، إِنْتُو كُلَ مَا تَلْقَوْا مِنْهَا فَايْدَةْ.

نِهاية الجواب

١٨ أَسْأَلَوْا اللّٰهْ لَيْنَا. أَنِحْنَ مُؤَكِّدِينْ كَدَرْ نِيِّتْنَا مُخْلِصَةْ وَ نِدَوْرُوا نِتَابُعُوا حَالْ عَدِيلَةْ فِي كُلَّ شَيّءْ. ١٩ وَ بَتَّانْ نَطُلْبُوا مِنْكُو بِزِيَادَةْ، أَسْأَلَوْا لَيِّ أَنَا أَشَانْ اللّٰهْ يِرَسِّلْنِي لَيْكُو فِي وَكِتْ قَرِيبْ.

٢٠ وَ خَلَاصْ، اللّٰهْ رَبّ السَّلَامْ بَعَثْ مِنْ أُسْط الْمَيْتِينْ رَبِّنَا عِيسَى الْبِقِي رَاعِي كَبِيرْ هَنَا غَنَمْ اللّٰهْ بِسَبَبْ دَمّ الْمُعَاهَدَةْ الْأَبَدِيَّةْ. ٢١ وَ خَلِّي اللّٰهْ يِجَهِّزْكُو بِكُلَّ شَيّءْ الْعَدِيلْ أَشَانْ تِسَوُّوا الْهُو يِدَوْرَهْ. وَ خَلِّي هُو يِسَوِّي فَوْقكُو كُلَّ شَيّءْ الْهُو يَرْضَى بَيَّهْ بِوَاسِطَةْ عِيسَى الْمَسِيحْ. أَيْوَى، لِعِيسَى الْمَسِيحْ الْمَجْد دَايْماً وَ إِلَى الْأَبَدْ. آمِينْ.

٢٢ يَا أَخْوَانِي، نَشْحَدْكُو أَشَانْ تَسْمَعَوْا بِصَبُرْ الْكَلَامْ النِّرَسِّلَهْ لَيْكُو لِنِشَجِّعْكُو. كَتَبْت لَيْكُو كَلَامْ شِيَّةْ بَسْ. ٢٣ نِدَوْر إِنْتُو تَعَرْفُوا كَدَرْ أَخُونَا تِمُوتَاوُسْ طَلَقَوْه مِنْ السِّجِنْ وَ كَنْ هُو يَجِي لَيِّ عَجَلَةْ، نَمْشُوا لَيْكُو مَعَايَهْ وَ نِشِيفُوكُو. ٢٤ سَلُّمُوا كُلَّ كُبَارَاتْكُو وَ كُلَّ الصَّالِحِينْ. الْأَخْوَانْ الْمِنْ إِيطَالِيَا يِسَلُّمُوكُو.

٢٥ عَلَيْكُو كُلُّكُو رَحْمَةْ اللّٰهْ. آمِينْ.