عِبْرَانِيِّين 12

مَثَل هنا جُهُد عِيسَى

١ وَ فِي الْكَلَامْ دَا، عِنْدِنَا شُهُودْ كَتِيرِينْ بِلْحَيْن الْيَشْهَدَوْا لَيْنَا مِنْ أَيِّ جِيهَةْ. أَشَانْ دَا، خَلِّي نِخَلُّوا مِنِّنَا كُلَّ شَيّءْ الْيِوَقِّفْنَا وَ كُلَّ ذَنِبْ الْيِدَوْر يَكْرُبْنَا. وَ خَلِّي نَمْشُوا قِدَّامْ بِجُهُدْ مِثِلْ نَاسْ فِي مُسَابَقَةْ وَ نَجْرُوا لَحَدِّي نِكَمُّلُوا الْمُسَابَقَةْ الْأَنِحْنَ قَاعِدِينْ فَوْقهَا. ٢ خَلِّي نُخُطُّوا عُيُونَّا فِي عِيسَى الْفَتَحْ لَيْنَا دَرِبْ الْإِيمَانْ وَ كَمَّلَهْ. مِنْ بَعِيدْ، هُو شَافْ الْفَرَحْ الْقَاعِدْ قِدَّامَهْ وَ حِمِلْ تَعَبْ الصَّلِيبْ وَ مَا فَكَّرْ فِي الْعَيْب الْخَطَّوْه فَوْقَهْ. وَ هَسَّعْ، هُو قَاعِدْ جَنْب عَرْش اللّٰهْ فِي نُصَّهْ الزَّيْنَايْ. ٣ فَكُّرُوا فَوْقَهْ هُو، الْحِمِلْ الْبُغُضْ الشَّدِيدْ هَنَا الْمُذْنِبِينْ. فَكُّرُوا فَوْقَهْ أَشَانْ إِنْتُو مَا تَبْقَوْا كَسْلَانِينْ وَ لَا خَوَّافِينْ. ٤ إِنْتُو قَمَّيْتُوا ضِدّ الذَّنِبْ لَاكِنْ مَا صَبَرْتُوا لَحَدِّي الْمَوْت.

الأدب اليجي من اللّه

٥ إِنْتُو نِسِيتُوا كَلَامْ الشَّجَاعَةْ الْاللّٰهْ قَالَهْ لَيْكُو إِنْتُو أَوْلَادَهْ؟ قَالْ: ﴿يَا وِلَيْدِي، مَا تَابَى أَدَبْ اللّٰهْ وَ مَا تَكْسَلْ كَنْ يِعَاقِبَكْ ٦ أَشَانْ اللّٰهْ يِأَدِّبْ الْيِحِبَّهْ وَ يُدُقّ أَيِّ وِلَيْد الْهُو قِبِلَهْ.﴾

٧ التَّعَبْ الْإِنْتُو تَصْبُرُوا فَوْقَهْ، وَاجِبْ لَيْكُو فِي شَانْ الْأَدَبْ. اللّٰهْ يِعَامِلْكُو مِثِلْ رَاجِلْ يِعَامِلْ عِيَالَهْ. وَيْن الْوِلَيْد الْأَبُوهْ مَا يِأَدِّبَهْ؟ ٨ كَنْ الْأَدَبْ الْيَجِي فَوْق كُلَّ الْعِيَالْ مِنْ أَبَّهَاتْهُمْ مَا يَجِي فَوْقكُو، خَلَاصْ إِنْتُو مَا أَوْلَادْ أَبُوكُو دَا، إِنْتُو فُرُوخْ. ٩ فَكُّرُوا بَتَّانْ. أَيِّ نَادُمْ مِنِّنَا عِنْدَهْ أَبُو إِنْسَانِي الْأَدَّبَهْ وَ أَبَّهَاتْنَا دَوْل أَنِحْنَ نِكَرُّمُوهُمْ. وَ دَا يِأَكِّدْ لَيْنَا بِزِيَادَةْ كَدَرْ وَاجِبْ نَقْبَلَوْا أَدَبْ اللّٰهْ أَبُونَا السَّمَاوِي وَ نَلْقَوْا الْحَيَاةْ.

١٠ أَشَانْ أَبَّهَاتْنَا أَدَّبَوْنَا أَدَبْ الْهُمَّنْ يَرْضَوْا بَيَّهْ لِمُدَّةْ قِصَيْرَةْ. لَاكِنْ اللّٰهْ يِأَدِّبْنَا لِفَايْدِتْنَا أَشَانْ نِشَارُكُوا فِي قَدَاسْتَهْ. ١١ فِي الْوَكِتْ الْحَالِي، كُلَّ الْأَدَبْ قَاسِي لَيْنَا وَ مَا يَنْطِينَا فَرَحْ. لَاكِنْ بَعَدَيْن، النَّاسْ الضَّرَبَوْهُمْ أَشَانْ الْأَدَبْ يَلْقَوْا مِنَّهْ نَتِيجَةْ وَ هِي السَّلَامْ وَ الْعَدَالَةْ.

١٢ أَشَانْ دَا، خَلُّوا مِنْكُو الْكَسَلْ. قَوُّوا إِيدَيْكُو وَ رِجْلَيْكُو الْمَا عِنْدُهُمْ قُدْرَةْ. ١٣ عَدُّلُوا الدَّرِبْ التُّرُوغُوا فَوْقَهْ أَشَانْ الرِّجِلْ الْعَرْجَةْ مَا تَمْرُقْ لَاكِنْ تَبْرَى.

مَثَل عِيسُو

١٤ سَوُّوا جُهُدْ أَشَانْ تِعِيشُوا بِالسَّلَامْ مَعَ كُلَّ النَّاسْ وَ عِيشُوا بِحَالْ صَالْحَةْ الْبَلَاهَا مَا فِي نَادُمْ يِشِيفْ رَبِّنَا. ١٥ أَنْقَرْعُوا أَشَانْ نَادُمْ مِنْكُو مَا يَدْحَرْ نَفْسَهْ مِنْ نِعْمَةْ اللّٰهْ. أَنْقَرْعُوا أَشَانْ نَادُمْ أَمْبَيْنَاتْكُو مَا يِتَلِّفْ نَفْسَهْ وَ لَا يِتَلِّفْ الْجَمَاعَةْ مِثِلْ شَدَرَةْ فِي أُسُطْكُو الْعِيَالْهَا عِنْدُهُمْ سَمّ. ١٦ أَنْقَرْعُوا أَشَانْ نَادُمْ مَا يَبْقَى زَنَّايْ وَلَّا كَافِرْ مِثِلْ عِيسُو الْعِصِي اللّٰهْ. هُو بَاعْ حَقّ الْبُكُورِيَّةْ فِي شَانْ أَكْلَةْ وَاحِدَةْ بَسْ. ١٧ وَ تَعَرْفُوا كَدَرْ بَعَدَيْن هُو دَوَّرْ يَلْقَى الْبَرَكَةْ وَ لَاكِنْ أَبُوهْ أَبَاهْ. وَ عِيسُو مَا لِقِي طَرِيقَةْ يِعَدِّلْ بَيْهَا حَالَةْ حَتَّى كَانْ هُو فَتَّشْهَا بِبَكِي كُلَ.

سِينَاء و صَهْيُون

١٨ خُطُّوا بَالْكُو أَشَانْ الْحَجَرْ الْإِنْتُو جِيتُوا قِدَّامَهْ، دَا مَا الْحَجَرْ النَّاسْ يَقْدَرَوْا يِلَمُّسُوهْ مِثِلْ بَنِي إِسْرَائِيلْ فِي جَبَلْ سِينَاء. هُو مَا الْحَجَرْ الْقَاعِدِينْ فَوْقَهْ نَارْ مُقَرْقِرَةْ وَ ضَلَامْ أَزْرَقْ وَ رِيحْ شَدِيدَةْ. ١٩ وَ الْحَجَرْ هَنَا الْوَكِتْ دَاكْ، أَنْسَمَعْ فَوْقَهْ حِسّ الْبُوقْ وَ الْحِسّ الْكَلَامَهْ خَوَّفْ الشَّعَبْ لَحَدِّي النَّاسْ السِّمْعَوْه طَلَبَوْا أَشَانْ مَا يِحَجِّي لَيْهُمْ بَتَّانْ. ٢٠ أَشَانْ الْأَمُرْ الْاللّٰهْ أَمَرَاهُمْ بَيَّهْ قَاسِي لَيْهُمْ وَ مَا حِمْلَوْه. هُو قَالْ كَدَرْ الْيِلَمِّسْ الْحَجَرْ دَا وَاجِبْ يَرْجُمُوهْ، حَتَّى كَانْ بَهِيمَةْ كُلَ. ٢١ أَيْوَى، الشَّيّءْ الشَّافَوْه خَوَّفَاهُمْ مَرَّةْ وَاحِدْ لَحَدِّي مُوسَى كُلَ قَالْ: «أَنَا قَاعِدْ نَرْجِفْ مِنْ الْخَوْف.»

٢٢ لَاكِنْ الْحَجَرْ الْإِنْتُو جِيتُوا قِدَّامَهْ، هُو جَبَلْ صَهْيُون الْقَاعِدَةْ فَوْقَهْ مَدِينَةْ اللّٰهْ الْحَيّ. وَ هِي مَدِينَةْ الْقُدُسْ السَّمَاوِيَّةْ. جِيتُوا قِدَّامْ الْمَلَائِكَةْ الْمَا يِنْحَسْبُوا مِنْ الْكَتَرَةْ اللَّامِّينْ لِلْإِحْتِفَالْ. ٢٣ وَ جِيتُوا قِدَّامْ جَمَاعَةْ أَوْلَادْ الْبِكِرْ الْأَسَامَيْهُمْ مُسَجَّلِينْ فِي السَّمَاءْ. وَ جِيتُوا قِدَّامْ اللّٰهْ الْيِحَاسِبْ كُلَّ النَّاسْ. وَ جِيتُوا قِدَّامْ أَرْوَاحْ الصَّالِحِينْ الْاللّٰهْ سَوَّاهُمْ كَامِلِينْ. ٢٤ وَ جِيتُوا قِدَّامْ عِيسَى وَسِيطْ هَنَا الْمُعَاهَدَةْ الْجَدِيدَةْ وَ قِدَّامْ دَمَّهْ الْمَرْشُوشْ الْيَشْهَدْ لَيْنَا بِشَهَادَةْ أَخَيْر مِنْ شَهَادَةْ دَمّ هَابِيلْ.

٢٥ أَنْقَرْعُوا! مَا تَابَوْا الْيِكَلِّمْ لَيْكُو. أَشَانْ كَنْ نَاسْ الزَّمَانْ مَا نِجَوْا وَكِتْ أَبَوْا مَا تَابَعَوْا كَلَامْ مُوسَى الْحَذَّرْهُمْ فِي الْأَرْض، كِكَّيْف أَنِحْنَ نَنْجَوْا كَنْ نَابَوْا كَلَامْ الْيِحَذِّرْنَا مِنْ السَّمَاءْ؟ ٢٦ أَوَّلْ، حِسّ اللّٰهْ رَجَّفْ الْأَرْض وَ هَسَّعْ، هُو وَاعَدَانَا وَ قَالْ: ﴿مَرَّةْ وَاحِدَةْ بَتَّانْ، نِرَجِّفْ الْأَرْض وَ نِرَجِّفْ مَعَاهَا السَّمَاءْ كُلَ.﴾ ٢٧ وَ الْكَلَامْ «مَرَّةْ وَاحِدَةْ بَتَّانْ» يِوَصِّفْ بِكَلَامْ وَاضِحْ الْخَلِيقَةْ تَرْجِفْ وَ تَبْقَى مَا فِيهَا. وَ بَيْدَا، الْمَا يَرْجِفْ بَسْ يِفَضِّلْ.

٢٨ وَ خَلَاصْ، خَلِّي نَشْكُرُوا اللّٰهْ أَشَانْ هُو قَاعِدْ يَنْطِينَا مَمْلَكَةْ ثَابْتَةْ الْمَا تَرْجِفْ. وَ خَلِّي نَعَبُدُوا اللّٰهْ بِالْعِبَادَةْ الْهُو يَرْضَى بَيْهَا بِتَقْوَى وَ إِحْتِرَامْ. ٢٩ أَشَانْ اللّٰهْ النَّعَبُدُوهْ دَا، هُو مِثِلْ نَارْ التَّحْرِقْ كُلَّ شَيّءْ.