عِبْرَانِيِّين 9

خَيْمة الْعِبادة الأوّل

١ وَ تَعَرْفُوا كَدَرْ فِي الْمُعَاهَدَةْ الْأَوَّلْ، عِنْدَهَا شُرُوطْ الْبَيْهُمْ النَّاسْ وَاجِبْ يَعَبُدُوا اللّٰهْ وَ عِنْدَهَا بَكَانْ مُقَدَّسْ فِي الْأَرْض. ٢ وَ بَنَوْا خَيْمَةْ عِبَادَةْ وَ فِي نُصَّهَا الْبَرَّانِي، خَطَّوْا الْفَانُوسْ وَ الطَّرَبَيْزَةْ الْيِقَدُّمُوا فَوْقهَا خُبْزَةْ لِلّٰهْ. وَ نُصَّهَا الْبَرَّانِي دَا، أُسْمَهْ الْبَكَانْ الْمُقَدَّسْ. ٣ وَ نُصَّهَا الدَّخْلَانِي الْقَاعِدْ غَادِي لِلسِّتَارْ، أُسْمَهْ الْبَكَانْ الْمُقَدَّسْ مَرَّةْ وَاحِدْ. ٤ وَ دَا الْبَكَانْ الْقَاعِدْ فَوْقَهْ الْمُخْبَرْ هَنَا دَهَبْ وَ صَنْدُوقْ الْمُعَاهَدَةْ الْمَمْسُوحْ بِدَهَبْ دَاخَلْ وَ بَرَّا. وَ الصَّنْدُوقْ دَا، عِنْدَهْ جَرّ هَنَا دَهَبْ الْفِي لُبَّهْ الْمَنَّةْ. وَ عَصَاةْ هَارُونْ السَّوَّتْ نُوَّارْ وَ لِيحَانْ الْمُعَاهَدَةْ كُلَ قَاعِدِينْ فِي لُبَّهْ. ٥ وَ فِي مَخْلُوقِينْ سَمَاوِيِّينْ مَصْنُوعِينْ فِي ضَهَرْ سِدَادَةْ الصَّنْدُوقْ الْيِوَصُّفُوا مَجْد اللّٰهْ وَ هُمَّنْ مُمَطِّطِينْ جَنَاحَيْهُمْ قِدَّامْ وَ مُغَطِّيِّينْ بَيْهُمْ سِدَادَةْ الصَّنْدُوقْ وَ دَا بَكَانْ الْكَفَّارَةْ. وَ لَاكِنْ هَسَّعْ دَا، مَا نَقْدَرَوْا نِفَسُّرُوا مَعَنَى هَنَا كُلَّ الْأَشْيَاءْ دَوْل.

٦ وَ وَكِتْ كُلَّ الْأَشْيَاءْ دَوْل جَهَّزَوْهُمْ خَلَاصْ، رُجَالْ الدِّينْ يَدْخُلُوا كُلَّ يَوْم فِي نُصّ الْخَيْمَةْ الْبَرَّانِي أَشَانْ يِسَوُّوا خِدْمَةْ الْعِبَادَةْ. ٧ لَاكِنْ كَبِيرْ رُجَالْ الدِّينْ بَسْ يَدْخُلْ فِي نُصَّهَا الدَّخْلَانِي. وَ هُو مَا يَدْخُلْ إِلَّا مَرَّةْ وَاحِدَةْ بَسْ فِي السَّنَةْ. وَ هُو مَا يَدْخُلْ إِلَّا هُو شَايِلْ الدَّمّ الْيِقَدِّمَهْ لِلّٰهْ كَفَّارَةْ لِنَفْسَهْ هُو وَ لِخَطَايَا الشَّعَبْ السَّوَّوْهُمْ بَلَا رَايْهُمْ. ٨ وَ دَوْل شُرُوطْ الْعِبَادَةْ. وَ بَيْهُمْ الرُّوحْ الْقُدُّوسْ يِوَصِّفْ كَدَرْ دَخُولْ فِي الْبَكَانْ الْمُقَدَّسْ مَرَّةْ وَاحِدْ الْقَاعِدْ فِي السَّمَاوَاتْ، مَا مَفْتُوحْ مَادَامِةْ الْخَيْمَةْ الْأَوَّلْ لِسَّاعْهَا قَاعِدَةْ.

٩ وَ دَا مَثَلْ هَنَا الزَّمَنْ الْحَالِي. هُمَّنْ يِقَدُّمُوا ضَحَايَا لَاكِنْ الضَّحَايَا دَوْل مَا يَقْدَرَوْا يِسَوُّوا النَّادُمْ الْيَعَبُدْ اللّٰهْ كَامِلْ أَشَانْ مَا يَقْدَرَوْا يِغَيُّرُوا قَلْبَهْ. ١٠ وَ نِظَامْ الْعِبَادَةْ دَا بُخُصّ الْأَكِلْ وَ الشَّرَابْ وَ الْوَضُوءْ. الشُّرُوطْ دَوْل بُخُصُّوا جِسِمْ الْإِنْسَانْ بَسْ وَ هُمَّنْ يَقْعُدُوا لَحَدِّي وَكِتْ النِّظَامْ الْجَدِيدْ يَجِي.

المسيح في الخَيْمة السماويّة

١١ لَاكِنْ الْمَسِيحْ جَاءْ وَ بِقِي كَبِيرْ رُجَالْ الدِّينْ الْجَابْ خَيْر كَتِيرْ الْهَسَّعْ قَاعِدْ. وَ هُو دَخَلْ فِي خَيْمَةْ كَبِيرَةْ وَ كَامِلَةْ مِنْ الْخَيْمَةْ الْأَوَّلْ. وَ الْخَيْمَةْ دِي، إِنْسَانْ مَا بَنَاهَا. هِي مَا مِنْ الْأَشْيَاءْ الْخَلَقَوْهُمْ فِي الدُّنْيَا دِي. ١٢ وَ خَلَاصْ، هُو دَخَلْ دَخُولْ وَاحِدْ وَ نِهَائِي فِي الْبَكَانْ الْمُقَدَّسْ. وَ الدَّمّ الْهُو شَالَهْ مَا هَنَا غَنَمْ وَ لَا هَنَا عِجِلْ لَاكِنْ شَالْ دَمَّهْ هُو ذَاتَهْ. وَ بَيْدَا، هُو جَابْ لَيْنَا الْفِدَا الدَّايِمْ.

١٣ أَوَّلْ النَّاسْ الْأَجْسَامْهُمْ بِقَوْا مَا طَاهِرِينْ، يِخَصُّصُوهُمْ بِرَشِّينْ دَمّ الْغَنَمْ وَ التِّيرَانْ وَ رُمَادْ الْبَقَرَةْ الْحَرَّقَوْهَا. ١٤ لَاكِنْ دَمّ الْمَسِيحْ عِنْدَهْ قُدْرَةْ زِيَادَةْ. الْمَسِيحْ مَا عِنْدَهْ عَيْب وَ هُو قَدَّمْ نَفْسَهْ لِلّٰهْ بِقُدْرَةْ الرُّوحْ الْأَبَدِي. وَ أَكِيدْ دَمَّهْ يِطَهِّرْ قُلُوبْنَا مِنْ الْأَعْمَالْ الْيِوَدُّوا النَّاسْ لِلْمَوْت وَ يِجَهِّزْنَا لِنَعَبُدُوا اللّٰهْ الْحَيّ. ١٥ وَ فِي شَانْ دَا، الْمَسِيحْ هُو وَسِيطْ هَنَا الْمُعَاهَدَةْ الْجَدِيدَةْ الْبَيْهَا النَّاسْ الْاللّٰهْ نَادَاهُمْ يَلْقَوْا الْوَرَثَةْ الْأَبَدِيَّةْ الْهُو وَاعَدْ بَيْهَا. أَشَانْ الْمَسِيحْ مَاتْ لِيَفْدَى النَّاسْ مِنْ خَطَايَاهُمْ السَّوَّوْهُمْ فِي وَكِتْ الْمُعَاهَدَةْ الْأَوَّلْ.

١٦ وَ الْمُعَاهَدَةْ دِي مُهِمَّةْ مِثِلْ وَصِيَّةْ مَكْتُوبَةْ هَنَا وَرَثَةْ وَ وَاجِبْ يِأَكُّدُوا مِنْ مَوْت هَنَا النَّادُمْ الْخَطَّ الْوَصِيَّةْ دِي. ١٧ أَشَانْ الْوَصِيَّةْ الْمَكْتُوبَةْ، مَا يَخْدُمُوا بَيْهَا إِلَّا بَعَدْ مَوْت سِيدْهَا. مَا يِطَبُّقُوهَا وَكِتْ هُو لِسَّاعْ حَيّ.

١٨ أَشَانْ دَا، الْمُعَاهَدَةْ الْأَوَّلْ كُلَ مَا كَانَتْ إِلَّا بِدَفِّقِينْ دَمّ. ١٩ وَ بَعَدْ مُوسَى بَلَّغْ كُلَّ الشَّعَبْ بِكُلَّ وَصَايَا التَّوْرَاةْ، هُو شَالْ صُوفْ أَحْمَرْ وَ فِرِعْ هَنَا زُوفَةْ وَ دَسَّاهُمْ فِي أَلْمِي وَ دَمّ هَنَا عِجِلْ وَ غَنَمْ. وَ رَشَّ بَيْهُمْ الْكِتَابْ ذَاتَهْ وَ كُلَّ الشَّعَبْ. ٢٠ وَ قَالْ: ﴿دَاهُو دَمّ الْمُعَاهَدَةْ الْاللّٰهْ سَوَّاهَا مَعَاكُو.﴾ ٢١ وَ بِمِثِلْ دَا، هُو رَشَّ الدَّمّ فِي الْخَيْمَةْ وَ فِي كُلَّ الْمَوَاعِينْ الْيِسْتَعْمَلَوْهُمْ فِي بَكَانْ الْعِبَادَةْ. ٢٢ أَيْوَى، حَسَبْ شُرُوطْ التَّوْرَاةْ، كَتِيرْ مِنْ الْأَشْيَاءْ يِطَهُّرُوهُمْ بِدَمّ. وَ كَنْ دَمّ مَا دَفَّقَوْه، مَا فِي غُفْرَانْ.

٢٣ أَشَانْ دَا، لَابُدَّ يِطَهُّرُوا بِالضَّحَايَا دَوْل الْخَيْمَةْ الْقَاعِدَةْ فِي الْأَرْض الْهِي عَلَامَةْ هَنَا الْخَيْمَةْ السَّمَاوِيَّةْ. لَاكِنْ الْخَيْمَةْ السَّمَاوِيَّةْ ذَاتْهَا وَاجِبْ يِطَهُّرُوهَا بِضَحَايَا الْأَفْضَلْ زِيَادَةْ.

٢٤ وَ الْبَكَانْ الْمُقَدَّسْ الْعِيسَى الْمَسِيحْ دَخَلْ فَوْقَهْ، دَا مَا الْبَكَانْ الْبَنَاهْ الْإِنْسَانْ. الْبَكَانْ دَا صُورَةْ بَسْ هَنَا الْبَكَانْ الصَّحِيحْ. لَاكِنْ هُو دَخَلْ فِي السَّمَاءْ ذَاتَهْ أَشَانْ يَحْضَرْ قِدَّامْ اللّٰهْ فِي شَانَّا فِي الزَّمَنْ الْحَالِي. ٢٥ وَ هُو دَخَلْ لَاكِنْ مَا أَشَانْ يِقَدِّمْ نَفْسَهْ عِدَّةْ مَرَّاتْ. هُو مَا مِثِلْ كَبِيرْ رُجَالْ الدِّينْ الْيَدْخُلْ كُلِّ سَنَةْ فِي الْبَكَانْ الْمُقَدَّسْ مَرَّةْ وَاحِدْ شَايِلْ مَعَايَهْ دَمّ الْبَهَايِمْ. ٢٦ كَنْ يَبْقَى مِثِلْ دَا، وَاجِبْ يَتْعَبْ عِدَّةْ مَرَّاتْ مِنْ بِدَايَةْ الدُّنْيَا. لَاكِنْ هُو جَاءْ مَرَّةْ وَاحِدَةْ بَسْ فِي آخِرْ الزَّمَنْ أَشَانْ يِقَدِّمْ نَفْسَهْ مِثِلْ ضَحِيَّةْ الْبَيْهَا يَمْحَا الذُّنُوبْ.

٢٧ أَكِيدْ، مَكْتُوبْ لِأَيِّ نَادُمْ يُمُوتْ مَرَّةْ وَاحِدَةْ وَ بَعَدْ الْمَوْت يَجِي الْحِسَابْ. ٢٨ وَ الْمَسِيحْ كُلَ قَدَّمْ نَفْسَهْ مَرَّةْ وَاحِدَةْ أَشَانْ يَمْحَا ذُنُوبْ هَنَا نَاسْ كَتِيرِينْ. وَ هُو يَجِي بَتَّانْ مَرَّةْ تَانِيَةْ مَا أَشَانْ يَمْحَا الذُّنُوبْ وَ لَاكِنْ أَشَانْ يِنَجِّي النَّاسْ الْقَاعِدِينْ يَرْجَوْه.