عِبْرَانِيِّين 2

النجاة مُهِمّة

١ أَشَانْ دَا، وَاجِبْ نُخُطُّوا بَالْنَا وَ نِتَابُعُوا عَدِيلْ الْكَلَامْ السِّمِعْنَاهْ أَشَانْ مَا نَنْسَوْه وَ مَا نَمُرْقُوا مِنْ الدَّرِبْ الْعَدِيلْ. ٢ نَعَرْفُوا كَدَرْ الْكَلَامْ الْمَلَائِكَةْ اللّٰهْ بَلَّغَوْه حَقّ وَ أَيِّ نَادُمْ الْخَالَفَهْ أَوْ أَبَاهْ يِجِيبْ فِي نَفْسَهْ الْعِقَابْ الْوَاجِبْ لَيَّهْ. ٣ وَ كِكَّيْف أَنِحْنَ نَنْجَوْا كَنْ مَا نِتَابُعُوا عَدِيلْ كَلَامْ هَنَا النَّجَاةْ الْمُهِمَّةْ دِي؟ الْأَوَّلْ بَلَّغَاهَا، هُو رَبِّنَا. وَ الشُّهُودْ السِّمْعَوْا كَلَامَهْ أَكَّدَوْهَا لَيْنَا. ٤ وَ اللّٰهْ كُلَ شَهَدْ لَيْهَا بِعَلَامَاتْ وَ عَجَايِبْ وَ مُعْجِزَاتْ شِقْ شِقْ وَ بِالْقُدْرَةْ الْهُو أَنْطَاهَا لِلنَّاسْ بِالرُّوحْ الْقُدُّوسْ حَسَبْ الْهُو يِدَوْرَهْ.

عِيسَى فتح درِب النجاة

٥ الْآخِرَةْ، اللّٰهْ مَا خَطَّاهَا تِحِتْ سُلْطَةْ الْمَلَائِكَةْ. ٦ لَاكِنْ فِي بَكَانْ وَاحِدْ الْكِتَابْ بُقُولْ:

﴿شُنُو الْإِنْسَانْ

وَ مَالَا تِفَكِّرْ فَوْقَهْ؟

وَ بَنِي آدَم، هُو شُنُو

وَ مَالَا تِهِمّ بَيَّهْ؟

٧ لَاكِنْ إِنْتَ سَوَّيْتَهْ تِحِتْ مِنْ الْمَلَائِكَةْ

وَ أَنْطَيْتَهْ عَظَمَةْ وَ شَرَفْ.

٨ وَ خَطَّيْت كُلَّ شَيّءْ تِحِتْ رِجِلَيْنَهْ.﴾

وَ كَنْ هُو خَطَّ كُلَّ شَيّءْ تِحِتْ سُلْطِتَهْ، بَتَّانْ مَا فَضَّلْ شَيّءْ الْمَا تِحِتْ سُلْطِتَهْ. وَ حَالِيّاً مَا نِشِيفُوا كُلَّ شَيّءْ تِحِتْ سُلْطِتَهْ. ٩ لَاكِنْ النِّشِيفُوهْ، هُو عِيسَى. وَ عِيسَى دَا، اللّٰهْ نَزَّلَهْ تِحِتْ مِنْ الْمَلَائِكَةْ لِمُدَّةْ قِصَيْرَةْ وَ بَعَدْ دَا، اللّٰهْ أَنْطَاهْ عَظَمَةْ وَ شَرَفْ بِسَبَبْ تَعَبَهْ وَ مَوْتَهْ. أَشَانْ بِرَحْمَةْ اللّٰهْ، عِيسَى دَاقْ الْمَوْت فِي شَانْ كُلَّ النَّاسْ.

١٠ اللّٰهْ الْخَلَقْ كُلَّ شَيّءْ وَ فِي شَانَهْ كُلَّ شَيّءْ مَوْجُودْ، هُو دَوَّرْ نَاسْ كَتِيرِينْ يَبْقَوْا عِيَالَهْ وَ يَدْخُلُوا فِي مَجْدَهْ. وَ أَشَانْ دَا، اللّٰهْ سَوَّى شَيّءْ مُوَافِقْ لَيْهُمْ. هُو رَسَّلْ النَّادُمْ الْيَفْتَحْ لَيْهُمْ دَرِبْ النَّجَاةْ. وَ جَعَلْ لِلْمَسِيحْ التَّعَبْ وَ بِتَعَبَهْ دَا، هُو بِقِي الْمُنَجِّي الْكَامِلْ.

١١ أَشَانْ هُو الْيِخَصِّصْ النَّاسْ لِلّٰهْ وَ النَّاسْ الْبِقَوْا خَاصِّيْن لِلّٰهْ، هُمَّنْ كُلُّهُمْ عِنْدُهُمْ أَبُو وَاحِدْ. أَشَانْ دَا، بَلَا عَيْب عِيسَى أَكَّدْ كَدَرْ هُمَّنْ أَخْوَانَهْ. ١٢ هُو بُقُولْ: ﴿أَنَا نِبَلِّغْ بِأُسْمَكْ لِأَخْوَانِي وَ نَحْمُدَكْ فِي أُسْط الْجَمَاعَةْ.﴾ ١٣ وَ هُو بُقُولْ لِلّٰهْ: ﴿أَنَا نِتْوَكَّلْ عَلَيْك.﴾ وَ بُقُولْ: ﴿دَاهُونِي أَنَا مَعَ النَّاسْ الْاللّٰهْ جَعَلَاهُمْ عِيَالِي.﴾

١٤ الْعِيَالْ دَوْل كُلُّهُمْ إِنْسَانْ وَ أَشَانْ دَا، عِيسَى كُلَ بِقِي إِنْسَانْ مِثِلْهُمْ. وَ بِقِي مِثِلْهُمْ أَشَانْ بِمَوْتَهْ، هُو دَمَّرْ قُدْرَةْ إِبْلِيسْ الْعِنْدَهْ قُدْرَةْ فِي الْمَوْت. ١٥ وَ بَيْدَا، عِيسَى حَرَّرَاهُمْ لِكُلَّ النَّاسْ الْخَايْفِينْ مِنْ الْمَوْت وَ عَايْشِينْ طُولْ حَيَاتْهُمْ مِثِلْ عَبِيدْ بِسَبَبْ خَوْفهُمْ.

١٦ أَكِيدْ، هُو مَا جَاءْ أَشَانْ يِسَاعِدْ الْمَلَائِكَةْ لَاكِنْ أَشَانْ يِسَاعِدْ عِيَالْ إِبْرَاهِيمْ. ١٧ وَ بِسَبَبْ دَا، لَابُدَّ يَبْقَى مِثِلْ أَخْوَانَهْ فِي كُلَّ شَيّءْ وَ يَبْقَى لَيْهُمْ كَبِيرْ رُجَالْ الدِّينْ، الرَّحِيمْ وَ الْأَمِينْ، وَ يَخْدِمْ لِلّٰهْ وَ يِسَوِّي كَفَّارَةْ لِذُنُوبْ الشَّعَبْ. ١٨ هُو ذَاتَهْ تِعِبْ وَ قَعَدْ تِحِتْ التَّجْرِبَةْ. وَ أَشَانْ دَا، هُو كُلَ يَقْدَرْ يِسَاعِدْ النَّاسْ الْقَاعِدِينْ تِحِتْ التَّجْرِبَةْ.