جواب لفِلِمُون
من جوابات الرسول بولس
مقدمة
الحمْدُ للّٰه، في الكتاب، اللّه وصّفانا العلاقة اليرْضى بيها أمْبَيْنات المُؤمِنين.
فِلِمُون دا أُسُم هنا نادم واحِد. هو نادم غني عِنْده عبيد و ساكِن في حِلّة كُلُوسِي. و هو سِمِع كلام اللّه من خشُم بُولُس. و في كُلُوسِي، بيت فِلِمُون بِقي البكان اليلِمّوا فَوْقه المُؤمِنين أشان يعبُدوا اللّه.
و واحِد من عبيده أُسْمه الْفَايِد. و الْفَايِد جرى من سيده فِلِمُون. أكون سِرِق مِنّه قُرُس كل. و هو جرى مِنّه بعيد. و لاكن برحْمة اللّه، هو لمّ مع الرسول بُولُس في السِجِن و سِمِع كلام اللّه و خلاص آمن بالمسيح. و الرسول كتب الجواب دا لفِلِمُون أشان يأوْريه كدر عبْده بِقي مُؤمِن و تاب من ذُنوبه. و بُولُس دوّر يقبِّل الْفَايِد لفِلِمُون و رسّل معايه الجواب دا بإيد تِشِيكُس. و بُولُس قال هو يدَوْر فِلِمُون يكْرُب الْفَايِد عديل مِثِل هو أخوه و ما عبْده بس.
و الكلام دا يبْقى لينا مَثَل و يوصِّف لينا الحال الواجْبة أمبين الناس اللِقوا رحْمة اللّه بالمسيح. و خلّي اللّه يبارِك أيِّ نادم اليقْري الجواب دا و يطبِّق التعْليم القاعد فَوْقه. آمين.