التعْليم الواجِب
٢
١ لَاكِنْ إِنْتَ،
عَلِّمْ الْأَخْوَانْ الْحَالْ الْمُوَافْقَةْ مَعَ التَّعْلِيمْ الْعَدِيلْ.
٢ وَصِّي الشِّيَّابْ أَشَانْ يَبْقَوْا عَاقْلِينْ وَ مُحْتَرَمِينْ وَ خَلِّي بَالْهُمْ يَبْقَى وَسِيعْ.
وَ خَلِّي يَبْقَوْا ثَابْتِينْ فِي الْإِيمَانْ وَ الْمَحَبَّةْ وَ الصَّبُرْ.
٣ وَ وَصِّي الْعَجَايِزْ كُلَ أَشَانْ حَالْهِنْ تَبْقَى تَقِيَّةْ وَ مَا يَبْقَنْ قَوَّالَاتْ وَ لَا سَكَّارِيَّاتْ.
خَلِّي يِعَلِّمَنْ أَخْوَاتْهِنْ كِكَّيْف يِسَوَّنْ الْخَيْر.
٤ وَ بِمِثِلْ دَا،
يِشَجِّعَنْ الشَّابَّاتْ أَشَانْ يِرِيدَنْ رُجَالْهِنْ وَ عِيَالْهِنْ
٥ وَ يِعِيشَنْ بِحَالْ عَاقْلَةْ وَ طَاهِرَةْ وَ يُخُطَّنْ بَالْهِنْ فِي بُيُوتْهِنْ وَ قُلُوبْهِنْ يَبْقَوْا بُيُضْ وَ يَسْمَعَنْ كَلَامْ رُجَالْهِنْ.
وَ بِمِثِلْ دَا،
يِسِدَّنْ الدَّرِبْ لِلنَّادُمْ الْيِدَوْر يُقُولْ كَلَامْ فَسِلْ فِي كَلَامْ اللّٰهْ.
٦ وَ وَصِّي الصُّبْيَانْ أَشَانْ يِثَبُّتُوا نُفُوسْهُمْ.
٧ أَبْقَى لَيْهُمْ مَثَلْ فِي كُلِّ شَيّءْ.
وَصِّفْ لَيْهُمْ بِحَالَكْ كِكَّيْف يِسَوُّوا الْخَيْر.
وَ خَلِّيهُمْ يِشِيفُوا كَدَرْ إِنْتَ نَادُمْ مُخْلِصْ فِي تَعْلِيمَكْ وَ مُنْكَرِبْ فَوْقَهْ.
٨ وَ خَلِّي كَلَامَكْ يَبْقَى سَالِمْ بِلْحَيْن حَتَّى نَادُمْ مَا يَلْقَى فَوْقَهْ سَبَبْ لِيَهَرْجَكْ.
وَ بِمِثِلْ دَا،
أَيِّ نَادُمْ الْيِدَوْر يِخَالِفَكْ،
يَخْجَلْ وَ مَا يَقْدَرْ يُقُولْ فَوْقنَا شَيّءْ فَسِلْ.
٩ وَ وَصِّي الْعَبِيدْ أَشَانْ يَسْمَعَوْا كَلَامْ سِيَادْهُمْ لَحَدِّي سِيَادْهُمْ يَرْضَوْا بَيْهُمْ فِي كُلِّ شَيّءْ.
وَ خَلِّي الْعَبِيدْ مَا يِخَالُفُوهُمْ
١٠ وَ لَا يَسُرْقُوا مِنْهُمْ شَيّءْ.
وَ لَاكِنْ وَاجِبْ يَبْقَوْا لَيْهُمْ أَمِينِينْ مَرَّةْ وَاحِدْ أَشَانْ يِوَصُّفُوا فِي كُلِّ شَيّءْ كَدَرْ تَعْلِيمْ هَنَا اللّٰهْ الْيِنَجِّينَا،
هُو سَمَحْ بِلْحَيْن.
١١ أَكِيدْ،
نِعْمَةْ اللّٰهْ بَانَتْ فِي الْمَسِيحْ أَشَانْ تِنَجِّي كُلَّ النَّاسْ.
١٢ وَ هِي تِدَرِّبْنَا أَشَانْ نِخَلُّوا مِنِّنَا الْكُفُرْ وَ شَهْوَاتْ الدُّنْيَا وَ نِعِيشُوا فِي الدُّنْيَا بِحَالْ عَاقْلَةْ وَ صَالْحَةْ وَ تَقِيَّةْ.
١٣ وَ نَرْجَوْا بِعَشَمْ الْيَوْم الْمُبَارَكْ الْيِبِينْ فَوْقَهْ مَجْد إِلٰـهْنَا وَ مُنَجِّينَا الْعَظِيمْ،
عِيسَى الْمَسِيحْ.
١٤ هُو أَنْطَى نَفْسَهْ ضَحِيَّةْ لِيَفْدَانَا مِنْ كُلَّ الْفَسَالَةْ وَ يِطَهِّرْ قُلُوبْنَا أَشَانْ نَبْقَوْا لَيَّهْ شَعَبَهْ حَلَالَهْ مُنْكَرِبِينْ فِي عَمَلْ الْخَيْر.
١٥ وَ خَلَاصْ كُلَّ الْكَلَامْ دَا،
أَوْرِيهُمْ بَيَّهْ بِكَلَامْ وَاضِحْ.
عِنْدَكْ فَوْقهُمْ حَقّ أَشَانْ تِشَجِّعْهُمْ وَ تَهْرِجْهُمْ حَسَبْ حَالْهُمْ.
مَا تِخَلِّي نَادُمْ يَحْقِرَكْ.