تِيطُس 1

جواب لتِيطُس

من جوابات الرسول بولس

١ جَوَابْ مِنِّي أَنَا بُولُسْ عَبْد اللّٰهْ وَ رَسُولْ هَنَا عِيسَى الْمَسِيحْ، مُرَسَّلْ أَشَانْ نِجِيبْ النَّاسْ الْاللّٰهْ عَزَلَاهُمْ فِي دَرِبْ الْإِيمَانْ وَ نِعَرِّفْهُمْ الْحَقّ الْيِوَدِّيهُمْ لِلتَّقْوَى. ٢ وَ بِسَبَبْ الْإِيمَانْ دَا، يَرْجَوْا بِعَشَمْ الْحَيَاةْ الْأَبَدِيَّةْ الْهُو وَاعَدَاهُمْ بَيْهَا مِنْ قُبَّالْ بِدَايَةْ الدُّنْيَا. وَ اللّٰهْ أَبَداً مَا يَكْدِبْ. ٣ وَ فِي الْوَكِتْ الْاللّٰهْ حَدَّدَهْ، هُو نَزَّلْ كَلَامَهْ فِي الْمَسِيحْ. وَ اللّٰهْ مُنَجِّينَا كَلَّفَانِي بِالْكَلَامْ دَا وَ أَمَرَانِي أَشَانْ نِبَلِّغَهْ.

٤ وَ نَكْتِبْ لَيْك إِنْتَ، يَا تِيطُسْ، الْبِقِيتْ وِلَيْدِي الصَّحِيحْ بِالْإِيمَانْ النِّشَارُكُوا فَوْقَهْ. عَلَيْكُمْ السَّلَامْ وَ الرَّحْمَةْ مِنْ اللّٰهْ أَبُونَا وَ عِيسَى الْمَسِيحْ مُنَجِّينَا.

خِدْمة تِيطُس في كِرِيت

٥ أَنَا خَلَّيْتَكْ فِي جَزِيرَةْ كِرِيتْ أَشَانْ تِعَدِّلْ كُلِّ شَيّءْ اللِّسَّاعْ مَا عِنْدَهْ نِظَامْ عَدِيلْ. وَاجِبْ تَعَزِلْ مِنْ الْمُؤمِنِينْ نَاسْ فِي أَيِّ حِلَّةْ أَشَانْ يَبْقَوْا لَيْهُمْ شُيُوخْ مِثِلْ أَنَا أَوَّلْ وَصَّيْتَكْ بَيَّهْ. ٦ كُلِّ شَيْخ وَاجِبْ يَبْقَى نَادُمْ مَا عِنْدَهْ عَيْب. خَلِّي يَبْقَى رَاجِلْ مَرْتَهْ وَاحِدَةْ بَسْ وَ عِيَالَهْ مُؤمِنِينْ وَ مَا فِي نَادُمْ وَاحِدْ يُقُولْ فَوْقهُمْ كَدَرْ هُمَّنْ فَاسْدِينْ وَلَّا عَاصِيِينْ. ٧ مَسْؤُولْ الْمُؤمِنِينْ، هُو وَكِيلْ اللّٰهْ وَ أَشَانْ دَا، وَاجِبْ يَبْقَى نَادُمْ مَا عِنْدَهْ عَيْب. مَا وَاجِبْ يَبْقَى نَادُمْ مُسْتَكْبِرْ وَ لَا نَادُمْ الْيَزْعَلْ عَجَلَةْ وَ لَا سَكَّارِي وَ لَا سِيدْ الْمَشَاكِلْ وَ لَا نَادُمْ الْيِرِيدْ رِبَا الْحَرَامْ.

٨ لَاكِنْ وَاجِبْ يَبْقَى نَادُمْ كَرِيمْ لِلضِّيفَانْ وَ يِرِيدْ الْخَيْر وَ عَاقِلْ وَ عَادِلْ وَ صَالِحْ وَ يِثَبِّتْ نَفْسَهْ. ٩ هُو وَاجِبْ يَكْرُبْ قَوِي الْكَلَامْ الصَّحِيحْ الْعَلَّمْنَاهْ لَيَّهْ أَشَانْ يِشَجِّعْ أَخْوَانَهْ بِتَعْلِيمْ عَدِيلْ وَ يُرُدّ لِلنَّاسْ الْيِخَالُفُوهْ.

١٠ أَشَانْ فِي نَاسْ كَتِيرِينْ عَاصِيِينْ وَ غَشَّاشِينْ وَ يِحَجُّوا كَلَامْ سَاكِتْ وَ كَتِيرِينْ مِنْهُمْ يَهُودْ. ١١ وَاجِبْ نِوَقُّفُوهُمْ أَشَانْ تَلَّفَوْا إِيمَانْ هَنَا كُلَّ النَّاسْ فِي بُيُوتْ وَاحِدِينْ بِتَعْلِيمْهُمْ. قَاعِدِينْ يِعَلُّمُوا كَلَامْ مَا عَدِيلْ أَشَانْ يَرْبَحَوْا قُرُسْ بِكِدِبْهُمْ. ١٢ نَادُمْ وَاحِدْ مِنْ كِرِيتْ الْبِقِي لَيْهُمْ مِثِلْ نَبِي قَالْ: «نَاسْ هَنَا كِرِيتْ هُمَّنْ دَايْماً كَدَّابِينْ وَ مِثِلْ حَيْوَانَاتْ خَطِيرِينْ. هُمَّنْ يِحِبُّوا الْأَكِلْ وَ مَا يِرِيدُوا الْخِدْمَةْ.»

١٣ وَ كَلَامَهْ دَا صَحِيحْ. وَ أَشَانْ دَا، أَهْرِجْهُمْ بِشِدَّةْ أَشَانْ يَقْعُدُوا ثَابْتِينْ فِي الْإِيمَانْ ١٤ وَ مَا يَسْمَعَوْا بَتَّانْ الْقِصَصْ الْبَاطْلِينْ الْجَايِينْ مِنْ أُسْط الْيَهُودْ وَ لَا شُرُوطْ النَّاسْ الْأَبَوْا الْحَقّ.

١٥ لِلنَّاسْ الْقُلُوبْهُمْ طَاهِرِينْ، كُلِّ شَيّءْ طَاهِرْ. وَ لَاكِنْ لِلنَّاسْ الْقُلُوبْهُمْ مَا طَاهِرِينْ وَ لِلْمَا مُؤمِنِينْ، مَا فِي شَيّءْ وَاحِدْ طَاهِرْ. أَفْكَارْهُمْ وَ قُلُوبْهُمْ مَا طَاهِرِينْ مَرَّةْ وَاحِدْ. ١٦ يُقُولُوا يَعَرْفُوا اللّٰهْ لَاكِنْ بِعَمَلْهُمْ يَكْفُرُوا بَيَّهْ. نَاسْ مِثِلْ دَوْل مَكْرُوهِينْ وَ عَاصِيِينْ وَ مَا يَنْفَعَوْا لِأَيِّ عَمَلْ هَنَا خَيْر.