جواب لتِيطُس
من جوابات الرسول بولس
مقدمة
بُولُس هو رسول هنا عِيسَى المسيح و بيه اللّه أنْطانا تعْليم كتير. الجواب دا قِصيِّر لاكن عِنْده فايْدة كتيرة. الرسول كتبه بإذِن اللّه و بقُدْرة الروح القُدّوس.
الجواب دا أنْكتب في نفْس الوكت الأنْكتب فَوْقه الجواب الأوّل لتِمُوتَاوُس. الرسول قعد سنْتَيْن في السِجِن في رَوْمَا و الكلام دا تلقوه في كتاب أعمال الرُسُل فصُل 28. و بعد دا، طلقوا لبُولُس من السِجِن و هو قمّ يسافِر بتان ليِبلِّغ بِشارة المسيح. و قُبّال ما يكُرْبوه تاني مرّة في السِجِن، بُولُس كتب الجواب لتِيطُس دا.
و تِيطُس هو واحِد من الناس الخدموا مع الرسول بُولُس في بلِّغين بِشارة المسيح. الرسول بُولُس مشى مع تِيطُس لجزيرة كِرِيت القاعدة في البحر الأبْيض المُتوسِّط و بلّغوا كلام اللّه لناس الجزيرة دي. وكت الرسول بُولُس مشى قِدّام، هو خلّى تِيطُس في كِرِيت أشان يتمِّم الخِدْمة البدوها سوا. وكت بُولُس لِسّاع قاعد معايه، هو أنْطى تِيطُس وصايا في الشيّء البُخُصّ نِظام المسيحيّين. و في الجواب دا، هو كرّر الكلام دا و وصّفه التعْليم المُهِمّ الواجِب يعلِّمه لكل الناس.
خلّي اللّه يبارِك أيِّ نادم اليقْريه. آمين.