جواب التاني لتِمُوتَاوُس
من جوابات الرسول بولس
١
١ جَوَابْ مِنِّي أَنَا بُولُسْ رَسُولْ هَنَا عِيسَى الْمَسِيحْ بِإِذِنْ اللّٰهْ.
وَ هُو جَعَلَانِي رَسُولْ أَشَانْ نِبَلِّغْ الْحَيَاةْ الْأَبَدِيَّةْ الْاللّٰهْ وَاعَدَانَا بَيْهَا وَ أَنْطَاهَا بِعِيسَى الْمَسِيحْ.
٢ وَ نَكْتِبْ لَيْك إِنْتَ،
يَا تِمُوتَاوُسْ،
الْبِقِيتْ وِلَيْدِي النِّرِيدَكْ.
عَلَيْكُمْ السَّلَامْ وَ النِّعْمَةْ وَ الرَّحْمَةْ مِنْ اللّٰهْ أَبُونَا وَ عِيسَى الْمَسِيحْ رَبِّنَا.
شُكُر و شجاعة
٣ فِي شَانَكْ إِنْتَ،
نَشْكُرْ اللّٰهْ النَّعَبُدَهْ مِثِلْ جُدُودِي عَبَدَوْه بِنِيَّةْ مُخْلِصَةْ وَ نِفَكِّرْ فَوْقَكْ دَايْماً وَكِتْ نَدْعِي لَيْل وَ نَهَارْ.
٤ نِفَكِّرْ فِي دُمُوعَكْ وَ نَقْرَمْ لَيْك.
نِدَوْر نِشِيفَكْ بَتَّانْ أَشَانْ نِنْمَلِي بِالْفَرْحَةْ.
٥ أَنَا قَاعِدْ نِفَكِّرْ فِي إِيمَانَكْ الْمُخْلِصْ الْمِثِلْ الْإِيمَانْ الْأَوَّلْ شِفْتَهْ فِي جِدِّتَكْ لُوِيسَةْ وَ أَمَّكْ يُونِكَةْ وَ هَسَّعْ أَكِيدْ قَاعِدْ فَوْقَكْ إِنْتَ.
٦ أَشَانْ دَا،
نِدَوْر نِذَكِّرَكْ بَتَّانْ.
وَكِتْ أَنَا دَعَيْت وَ خَطَّيْت فَوْقَكْ إِيدَيْنِي،
اللّٰهْ أَنْطَاكْ بَرَكَةْ وَ هِي مِثِلْ جَمُرْ.
هَجِّجْهَا أَشَانْ تَبْقَى بَتَّانْ حَامِيَةْ مِثِلْ أَوَّلْ.
٧ أَشَانْ اللّٰهْ أَنْطَانَا الرُّوحْ الْقُدُّوسْ الْهُو مَا يِسَوِّينَا خَوَّافِينْ.
بِالْعَكْس،
الرُّوحْ الْقُدُّوسْ يَنْطِينَا الْقُدْرَةْ وَ الْمَحَبَّةْ وَ الْعَقُلْ الثَّابِتْ.
التعب في شان البِشارة
٨ مَا تَخَافْ وَ مَا تَخْجَلْ.
بَشِّرْ النَّاسْ بِأُسُمْ الرَّبّ الْأَنَا مَسْجُونْ فِي شَانَهْ.
مَا تِدَنْقِرْ رَاسَكْ بِسَبَبْ سِجْنِي أَنَا.
شَارِكْنِي فِي التَّعَبْ فِي شَانْ بِشَارَةْ الْمَسِيحْ وَ اللّٰهْ يَنْطِيكْ الْقُدْرَةْ.
٩ هُو نَجَّانَا وَ نَادَانَا أَشَانْ نَبْقَوْا نَاسْ خَاصِّينْ لَيَّهْ.
وَ دَا مَا بِسَبَبْ أَيِّ عَمَلْ صَالِحْ الْأَنِحْنَ سَوَّيْنَاهْ لَاكِنْ بِسَبَبْ نِيّتَهْ وَ رَحْمَتَهْ.
قُبَّالْ الدُّنْيَا مَا بَدَتْ،
هُو عِنْدَهْ نِيَّةْ أَشَانْ يَنْطِينَا النِّعْمَةْ دِي فِي الْمَسِيحْ عِيسَى.
١٠ وَ هَسَّعْ فِي الزَّمَنْ الْحَاضِرْ،
هُو بَيَّنْ رَحْمَتَهْ بِجَيَّةْ النَّادُمْ الْيِنَجِّينَا وَ هُو الْمَسِيحْ عِيسَى.
الْمَسِيحْ بَطَّلْ قُدْرَةْ الْمَوْت وَ فِي بِشَارْتَهْ وَصَّفْ لَيْنَا الْحَيَاةْ الْأَبَدِيَّةْ.
١١ وَ اللّٰهْ عَزَلَانِي وَ سَوَّانِي مُبَشِّرْ وَ رَسُولْ وَ مُعَلِّمْ.
١٢ وَ أَشَانْ دَا بَسْ،
أَنَا قَاعِدْ نَتْعَبْ مِثِلْ دَا.
لَاكِنْ الْعَيْب أَبَداً مَا سَوَّانِي أَشَانْ هُو الْأَنَا آمَنْت بَيَّهْ نَعَرْفَهْ تَمَامْ.
وَ أَنَا مُؤَكِّدْ كَدَرْ هُو قَادِرْ وَ يَحْفَضْ الْأَمَانَةْ الْأَنْطَيْتهَا لَيَّهْ لَحَدِّي الْيَوْم الْأَخِيرْ.
١٣ أَكْرُبْ قَوِي التَّعْلِيمْ الْعَدِيلْ السِّمِعْتَهْ مِنِّي وَ تَابِعَهْ تَمَامْ.
وَ أنْكَرِبْ فِي الْإِيمَانْ وَ الْمَحَبَّةْ مِثِلْ الْوَاجِبْ فِي دَرِبْ الْمَسِيحْ عِيسَى.
١٤ كَلَامْ الْحَقّ،
هُو أَمَانَةْ مِنْ اللّٰهْ.
أَحْفَضَهْ بِقُدْرَةْ الرُّوحْ الْقُدُّوسْ الْقَاعِدْ فِي أُسُطْنَا.
١٥ أَكِيدْ،
إِنْتَ سِمِعْت كَدَرْ كُلَّ الْأَخْوَانْ الْمِنْ بَلَدْ آسِيَا قَطَعَوْا مَعَايِ الْعَلَاقَةْ وَ الْأَخْوَانْ فِقَيْل وَ هَرْمُوْقِينْ كُلَ مِنْهُمْ.
١٦ خَلِّي رَبِّنَا يَرْحَمْ نَاسْ بَيْت أَخُونَا وَانِي سِفِرُسْ أَشَانْ هُو جَاءْ لَيِّ فِي السِّجِنْ وَ شَجَّعَانِي كَتِيرْ.
جَنَازِيرِي أَبَداً مَا سَوَّوْا لَيَّهْ عَيْب.
١٧ بِالْعَكْس،
وَكِتْ وِصِلْ فِي رَوْمَا هُو فَتَّشَانِي بِنِيَّةْ وَاحِدَةْ لَحَدِّي لِقِينِي.
١٨ وَ نَسْأَلْ رَبِّنَا لِوَانِي سِفِرُسْ أَشَانْ يَلْقَى رَحْمَةْ مِنْ اللّٰهْ فِي الْيَوْم الْأَخِيرْ.
وَ إِنْتَ تَعَرِفْ هُو سَاعَدَانِي كَتِيرْ وَكِتْ أَنَا قَاعِدْ فِي حِلَّةْ أَفَسُسْ كُلَ.