مسائيل المُؤمِنين
٣
١ نُقُولُوا كَنْ نَادُمْ يِدَوْر يَبْقَى وَاحِدْ مِنْ مَسَائِيلْ الْمُؤمِنِينْ،
هُو يِدَوْر يُقُمّ بِخِدْمَةْ كَرِيمَةْ.
وَ الْكَلَامْ دَا حَقّ.
٢ وَ أَشَانْ دَا،
خَلِّي أَيِّ نَادُمْ الْمَسْؤُولْ فِي الْمُؤمِنِينْ يَبْقَى نَادُمْ الْمَا عِنْدَهْ أَيِّ عَيْب.
وَاجِبْ يَبْقَى رَاجِلْ مَرْتَهْ وَاحِدَةْ بَسْ وَ عَاقِلْ وَ مُلْتَزِمْ وَ مُكَرَّمْ وَ كَرِيمْ لِلضِّيفَانْ وَ قَادِرْ فِي الْعَلِّمِينْ.
٣ وَاجِبْ مَا يَبْقَى سَكَّارِي وَ لَا دَاوَاسِي لَاكِنْ وَاجِبْ يَبْقَى نَادُمْ عِنْدَهْ نَفَسْ بَارِدْ وَ مَا سِيدْ مَشَاكِلْ وَ لَا طَمَّاعْ.
٤ وَاجِبْ يَبْقَى نَادُمْ الْيِشِيلْ مَسْؤُولِيَّةْ بَيْتَهْ وَ يِرَبِّي عِيَالَهْ لِيِكَرُّمُوهْ فِي كُلِّ شَيّءْ.
٥ أَشَانْ كَنْ نَادُمْ مَا يَقْدَرْ يِشِيلْ مَسْؤُولِيَّةْ بَيْتَهْ،
كِكَّيْف يَقْدَرْ يِرَيِّسْ جَمَاعَةْ الْمُؤمِنِينْ هَنَا اللّٰهْ؟
٦ وَ خَلِّي نَادُمْ مَا يَبْقَى مَسْؤُولْ كَنْ دَهَابَهْ آمَنْ بِالْمَسِيحْ.
النَّادُمْ الْمِثِلْ دَا أَكُونْ يِسْتَكْبَرْ وَ اللّٰهْ يِعَاقِبَهْ مِثِلْ عَاقَبْ إِبْلِيسْ.
٧ وَ مَعَ كُلَّ الْكَلَامْ دَا،
خَلِّي أَيِّ مَسْؤُولْ يَبْقَى نَادُمْ الْيِكَرُّمُوهْ النَّاسْ الْمَا مُؤمِنِينْ كُلَ.
وَ مِثِلْ دَا،
الْعَيْب مَا يَجِي فَوْقَهْ وَ يَقَعْ فِي شَرَكْ إِبْلِيسْ.
المُعاوِنين
٨ وَ نَفْس الشَّيّءْ لِلْمُعَاوِنِينْ.
وَاجِبْ يَبْقَوْا نَاسْ مُحْتَرَمِينْ الْعِنْدُهُمْ كَلَامْ وَاحِدْ وَ مَا إِتْنَيْن وَ مَا سَكَّارَى وَ مَا يِحِبُّوا رِبَا الْحَرَامْ.
٩ وَ وَاجِبْ يِتَابُعُوا دَرِبْ الْإِيمَانْ الْاللّٰهْ بَيَّنَهْ لَيْنَا وَ يَكُرْبُوهْ قَوِي بِنِيَّةْ مُخْلِصَةْ.
١٠ وَ قُبَّالْ كُلَّ شَيّءْ،
وَاجِبْ يِجَرُّبُوهُمْ.
وَ بَعَدَيْن كَنْ مَا عِنْدُهُمْ عَيْب،
خَلِّي يَبْقَوْا مُعَاوِنِينْ وَ يَخْدُمُوا لِجَمَاعَةْ الْمُؤمِنِينْ.
١١ وَ نَفْس الشَّيّءْ لِعَوِينْهُمْ.
وَاجِبْ مَرِةْ الْمُعَاوِنْ تَبْقَى مُحْتَرَمَةْ وَ مَا قَوَّالَةْ لَاكِنْ عَاقْلَةْ وَ أَمِينَةْ فِي كُلِّ شَيّءْ.
١٢ وَ خَلِّي أَيِّ مُعَاوِنْ يَبْقَى رَاجِلْ مَرْتَهْ وَاحِدَةْ بَسْ وَ يِرَبِّي عِيَالَهْ عَدِيلْ وَ يِشِيلْ مَسْؤُولِيَّةْ بَيْتَهْ.
١٣ النَّاسْ الْيَبْقَوْا مُعَاوِنِينْ وَ يَخْدُمُوا عَدِيلْ دَوْل،
إِيمَانْهُمْ بِالْمَسِيحْ عِيسَى يَبْقَى عَالِي وَ يَبْقَوْا ثَابْتِينْ بِلْحَيْن وَ يَلْقَوْا شَرَفْ.
عمود الحقّ و أساسه
١٤ نِدَوْر نَجِيكْ قَرِيبْ لَاكِنْ كَتَبْت لَيْك الْوَصَايَا دَوْل أَشَانْ
١٥ كَنْ نِأَخِّرْ كُلَ،
إِنْتَ تَعَرِفْ الْحَالْ الْوَاجْبَةْ لِأَهَلْ اللّٰهْ.
هُمَّنْ نَاسْ اللّٰهْ أُمَّةْ الْمَسِيحْ.
وَ أُمَّةْ الْمَسِيحْ،
هِي عَمُودْ الْحَقّ وَ أَسَاسَهْ.
١٦ وَ بَلَا شَكَكْ،
دَرِبْ التَّقْوَى الْاللّٰهْ بَيَّنَهْ لَيْنَا،
هُو عَظِيمْ.
الْمَسِيحْ بِقِي إِنْسَانْ وَ بَانْ فِي الدُّنْيَا
وَ الرُّوحْ الْقُدُّوسْ شَهَدْ لَيَّهْ.
الْمَلَائِكَةْ شَافَوْه فِي السَّمَاءْ
وَ نَاسَهْ بَشَّرَوْا بَيَّهْ الْأُمَمْ.
نَاسْ آمَنَوْا بَيَّهْ فِي الدُّنْيَا
وَ اللّٰهْ رَفَعَهْ فَوْق فِي مَجْدَهْ.