جوابات لتِمُوتَاوُس
من جوابات الرسول بولس
مقدمة
الحمْدُ للّٰه، ربِّنا يعرِف اليعاوِنّا و نلْقوا مِنّه شجاعة. و أشان دا، هو أنْطانا في الكتاب كلام رُسُله الكتبوه لواحِدين من تلاميذهم. الرسول بُولُس كتب جوابات إتْنَيْن لتِلْميذه تِمُوتَاوُس و هو كتب الجوابات الإتْنَيْن دَوْل بقُدْرة الروح القُدّوس و بإذِن اللّه.
تِمُوتَاوُس هو من حِلّة واحِدة أُسُمها لِسْتَرَة القاعدة في بلد تُرْكيا. و الرسول بُولُس مشى بلّغ فَوْقها بِشارة المسيح و ناس واحِدين آمنوا بالمسيح. و الكلام دا مكتوب في أعمال الرُسُل فصُل 14 آية 6-23. و بعدَيْن الرسول قبّل للِسْتَرَة أشان يشجِّع الأخْوان و نادى تِمُوتَاوُس أشان يسافِر و يخْدِم معايه. و الكلام دا بِنْلقي في أعمال الرُسُل فصُل 16 آية 1-5. من الوكت داك، تِمُوتَاوُس قاعد يسافِر مع بُولُس و يعاوِنه في كل خِدِمْته و بِقي لبُولُس مِثِل وِلَيْده.
كتاب أعمال الرُسُل يأوْرينا بسفر بُولُس لحدي وِصِل في مدينة رَوْمَا. و في الوكت داك، هو مسْجون و قاعد يرْجى فُرْصة ليِدافِع لنفْسه قِدّام سُلْطان الرَوْمانيّين. و في الأخير، طلقوه من السِجِن و دا بعد كتاب أعمال الرُسُل أنْكتب خلاص. و الرسول قمّ يسافِر بتان ليِبلِّغ بِشارة المسيح. و في سفره، هو ودّى تِمُوتَاوُس في حِلّة أفَسُس و خلّاه فَوْقها أشان يعلِّم المسيحيّين هِناك. و بُولُس ذاته مشى قِدّام في مَقِدُونِيَة. و وكت وِصِل في مَقِدُونِيَة، هو كتب الجواب الأوّل لتِمُوتَاوُس أشان يشجِّعه في عمله و يذكِّره بالوصايا الأوّل أنْطاهم ليه و يوصِّفه ككيف ينظِّم المُؤمِنين.
و بعد دا، سياسة الرَوْمانيّين غيّرت. الرسول بُولُس كربوه بتان و ودّوه مسْجون في رَوْمَا. و بُولُس عِرِف مَوْته قرّب. و في البكان دا، هو كتب الجواب التاني و وصّى تِمُوتَاوُس أشان يقْعُد ثابِت و ما يخاف من التعب. و دوّر مِنّه يجي ليه عجلة في رَوْمَا.
خلّي أيِّ نادم اليقْري الجوابات دَوْل يسْأل اللّه أشان اللّه يثبِّت كلامهم في قلْبه. آمين.