1 كُرُنْتُس 11

١ تَابُعُوا دَرْبِي أَشَانْ أَنَا قَاعِدْ نِتَابِعْ دَرِبْ الْمَسِيحْ.

غطّيين راس المرة

٢ وَ أَنَا فَرْحَانْ مِنْكُو أَشَانْ إِنْتُو قَاعِدِينْ تِفَكُّرُوا فَوْقِي وَ تِتَابُعُوا عَدِيلْ الْعَادَاتْ الْعَلَّمْتُهُمْ لَيْكُو. ٣ وَ لَاكِنْ فِي شَيّءْ نِدَوْر إِنْتُو تَفْهَمَوْه وَ دَا هُو. رَئِيسْ هَنَا أَيِّ رَاجِلْ، هُو الْمَسِيحْ وَ رَئِيسْ الْمَرَةْ، هُو الرَّاجِلْ وَ رَئِيسْ الْمَسِيحْ، هُو اللّٰهْ. ٤ وَ أَيِّ رَاجِلْ الْيِغَطِّي رَاسَهْ وَكِتْ يِصَلِّي وَلَّا يِتْنَبَّأْ، هُو يِجِيبْ عَيْب فِي الْمَسِيحْ الْهُو رَئِيسَهْ. ٥ وَ أَيِّ مَرَةْ الْمَا تِغَطِّي رَاسْهَا وَكِتْ تِصَلِّي وَلَّا تِتْنَبَّأْ، هِي تِجِيبْ عَيْب فِي رَاجِلْهَا الْهُو رَئِيسْهَا. وَ بَيْدَا، مِثِلْ زَيَّنَوْا صُوفْ رَاسْهَا. ٦ وَ كَنْ مَرَةْ تَابَى مَا تِغَطِّي رَاسْهَا، خَلِّي تُقُصّ شَعَرْهَا. وَ لَاكِنْ كَنْ قَصِّينْ الشَّعَرْ وَ زَيِّنِينْ الرَّاسْ دَا عَيْب لِلْمَرَةْ، خَلَاصْ خَلِّي هِي تِغَطِّي رَاسْهَا.

٧ وَ مَا وَاجِبْ لِلرَّاجِلْ يِغَطِّي رَاسَهْ أَشَانْ اللّٰهْ خَلَقَهْ فِي صُورْتَهْ لِيِوَصِّفْ مَجْدَهْ. لَاكِنْ الْمَرَةْ تِوَصِّفْ شَرَفْ الرَّاجِلْ. ٨ أَشَانْ الرَّاجِلْ مَا مَرَقَوْه مِنْ الْمَرَةْ لَاكِنْ الْمَرَةْ مَرَقَوْهَا مِنْ الرَّاجِلْ. ٩ وَ اللّٰهْ مَا خَلَقْ الرَّاجِلْ فِي شَانْ الْمَرَةْ لَاكِنْ خَلَقْ الْمَرَةْ فِي شَانْ الرَّاجِلْ. ١٠ وَ بِسَبَبْ الْمَلَائِكَةْ، وَاجِبْ لِلْمَرَةْ تُخُطّ شَيّءْ فِي رَاسْهَا الْيِوَصِّفْ كَدَرْ هِي عِنْدَهَا السُّلْطَةْ.

١١ وَ دَا كُلَّ صَحِيحْ لَاكِنْ فِي نِظَامْ رَبِّنَا. بَلَا الرَّاجِلْ، الْمَرَةْ مَا فِيهَا. وَ بَلَا الْمَرَةْ، الرَّاجِلْ مَا فِيهْ. ١٢ أَشَانْ أَوَّلْ، الْمَرَةْ مَرَقَوْهَا مِنْ الرَّاجِلْ وَ هَسَّعْ، أَيِّ رَاجِلْ مَوْلُودْ مِنْ مَرَةْ وَ كُلِّ شَيّءْ جَايِ مِنْ اللّٰهْ.

١٣ وَ لَيْكُو إِنْتُو، نُقُولْ فَكُّرُوا عَدِيلْ وَ مَيُّزُوا الْكَلَامْ دَا. كَنْ مَرَةْ تِصَلِّي لِلّٰهْ وَ رَاسْهَا مَا مُغَطَّى، دَا مُوَافِقْ وَلَّا؟ ١٤ وَ نَعَرْفُوا مِنْ الطَّبِيعَةْ كَدَرْ الشَّعَرْ الطُّوَالْ عَيْب لِلرَّاجِلْ. ١٥ وَ لَاكِنْ كَنْ مَرَةْ عِنْدَهَا شَعَرْ طُوَالْ، دَا سَمَحْ وَ دَا شَرَفْهَا. وَ اللّٰهْ أَنْطَاهَا شَعَرْ طُوَالْ أَشَانْ يَبْقَى لَيْهَا غَطَّايْ. ١٦ وَ كَنْ أَيِّ نَادُمْ يِدَوْر يِنَاقِشْ فِي الْكَلَامْ دَا، خَلِّي يَعَرِفْ أَنِحْنَ مَا نِقَصُّدُوا بِالْعَادَةْ الْهُو يِدَوْرهَا وَ بَتَّانْ نَاسْ اللّٰهْ أُمَّةْ الْمَسِيحْ مَا يِقَصُّدُوا بَيْهَا فِي أَيِّ بَكَانْ.

عشاء المسيح

١٧ وَ لَاكِنْ فِي الشَّيّءْ الْبُخُصّ الْكَلَامْ الْهَسَّعْ نِحَجِّي فَوْقَهْ، أَنَا مَا فَرْحَانْ بَيْكُو مَرَّةْ وَاحِدْ أَشَانْ وَكِتْ تِلِمُّوا فِي مَلَمَّةْ الْمُؤمِنِينْ، الْفَسَالَةْ كَتِيرَةْ مِنْ الْخَيْر. ١٨ وَ قُلْت الْكَلَامْ دَا أَشَانْ الْخَبَرْ السِّمِعْتَهْ فَوْقكُو. أَوَّلْ شَيّءْ، يُقُولُوا وَكِتْ تِلِمُّوا فِي جَمَاعَةْ الْمُؤمِنِينْ، إِنْتُو مُنْقَسِمِينْ. وَ فِي فِكْرِي، الْكَلَامْ دَا مَا كُلَّ كَيْ كِدِبْ. ١٩ أَيْوَى، لَابُدَّ إِنْتُو مُنْقَسِمِينْ أَشَانْ كَنْ الْخِلَافْ أَمْبَيْنَاتْكُو مَا فِيهْ، كِكَّيْف النَّاسْ الْإِيمَانْهُمْ ثَابِتْ يِنْعَرْفُوا؟

٢٠ وَ وَكِتْ تِلِمُّوا سَوَا، الْعَشَاءْ التَّاكُلُوهْ دَا، مَا عَشَاءْ رَبِّنَا. ٢١ أَشَانْ فِي وَكِتْ الْعَشَاءْ، وَاحِدِينْ يَاكُلُوا عَجَلَةْ قُبَّالْ الْآخَرِينْ. وَ بَيْدَا، الْآخَرِينْ دَوْل جِيعَانِينْ وَ الْأَوَّلَانِيِّينْ أَكَلَوْا وَ سِكْرَوْا خَلَاصْ. ٢٢ وَ دَا كِكَّيْف؟ مَا تَاكُلُوا وَ تَشَرْبَوْا فِي بُيُوتْكُو وَلَّا؟ أَوْ تَحْقُرُوا جَمَاعَةْ الْمُؤمِنِينْ هَنَا اللّٰهْ وَ تِدَوْرُوا تِعَيُّبُوا النَّاسْ الْمَا عِنْدُهُمْ شَيّءْ؟ وَ نُقُولْ لَيْكُو شُنُو؟ وَ بَيْدَا، نَشْكُرْكُو وَلَّا؟ لَا، أَبَداً.

٢٣ أَسْمَعَوْا، دَا بَسْ الْكَلَامْ اللِّقِيتَهْ مِنْ رَبِّنَا وَ عَلَّمْتُكُو لَيَّهْ. فِي اللَّيْلَةْ الْيُخُونُوا فَوْقهَا رَبِّنَا عِيسَى، هُو شَالْ خُبْزَةْ وَاحِدَةْ ٢٤ وَ شَكَرْ اللّٰهْ وَ كَسَرْهَا وَ قَالْ: «دَا جِسْمِي النَّنْطِيهْ فِي شَانْكُو. سَوُّوا مِثِلْ دَا لِتِذَّكَّرَوْنِي بَيَّهْ.» ٢٥ وَ بَعَدْ الْعَشَاءْ، هُو سَوَّى نَفْس الشَّيّءْ بِالْكَاسْ. هُو شَالَهْ وَ قَالْ: «الْكَاسْ دَا يِوَصِّفْ الْمُعَاهَدَةْ الْجَدِيدَةْ النِّسَوِّيهَا مَعَاكُو بِدَمِّي. أَيِّ وَكِتْ التَّشَرْبَوْا مِنَّهْ، سَوُّوا مِثِلْ دَا لِتِذَكُّرُونِي بَيَّهْ.» ٢٦ وَ بَيْدَا، فِي أَيِّ وَكِتْ كَنْ تَاكُلُوا الْخُبْزَةْ دِي وَ تَشَرْبَوْا مِنْ الْكَاسْ دَا، تِبَلُّغُوا مَوْت رَبِّنَا عِيسَى لَحَدِّي هُو يَجِي بَتَّانْ.

٢٧ وَ أَشَانْ دَا بَتَّانْ، أَيِّ نَادُمْ الْيَاكُلْ خُبْزَةْ رَبِّنَا وَ يَشْرَبْ مِنْ كَاسَهْ وَ نِيّتَهْ مَا مُخْلِصَةْ، هُو يُضُرّ جِسِمْ رَبِّنَا وَ دَمَّهْ. ٢٨ خَلِّي أَيِّ نَادُمْ يِجَرِّبْ نَفْسَهْ قُبَّالْ مَا يَاكُلْ الْخُبْزَةْ وَ يَشْرَبْ مِنْ الْكَاسْ. ٢٩ أَشَانْ أَيِّ نَادُمْ الْيَاكُلْ وَ يَشْرَبْ عَشَاءْ الْمَسِيحْ بَلَا فِكِرْ فِي جِسِمْ الْمَسِيحْ، هُو يِجِيبْ الْعَذَابْ فِي نَفْسَهْ. ٣٠ وَ أَشَانْ دَا بَسْ، كَتِيرِينْ مِنْكُو عَيَّانِينْ وَ مَرْضَانِينْ وَ وَاحِدِينْ مَاتَوْا كُلَ.

٣١ وَ كَنْ أَوَّلْ نِفَكُّرُوا فِي نُفُوسْنَا عَدِيلْ، خَلَاصْ الْعَذَابْ مَا يَنْزِلْ فَوْقنَا. ٣٢ وَ لَاكِنْ رَبِّنَا يِحَاسِبْنَا وَ يِأَدِّبْنَا أَشَانْ الْعَذَابْ الْيَنْزِلْ فِي نَاسْ الدُّنْيَا مَا يَنْزِلْ فَوْقنَا. ٣٣ أَشَانْ دَا، يَا أَخْوَانِي، وَكِتْ تِلِمُّوا أَشَانْ تَاكُلُوا عَشَاءْ الْمَسِيحْ، خَلِّي أَيِّ نَادُمْ يَرْجَى أَخْوَانَهْ. ٣٤ كَنْ نَادُمْ جِيعَانْ وَ مَا يَقْدَرْ يَرْجَى الْآخَرِينْ، أَخَيْر يَاكُلْ قُبَّالْ فِي بَيْتَهْ. وَ بَيْدَا، مَلَمِّتْكُو مَا تِجِيبْ الْعَذَابْ فَوْقكُو.

وَ خَلَاصْ، فِي الشَّيّءْ الْبُخُصّ السُّؤَالَاتْ الْآخَرِينْ، نَنْطِيكُو وَصَايَا وَكِتْ نَجِيكُو.