أعمال الرُسُل 19

بُولُس في مدينة أفَسُس

١ وَ وَكِتْ أَبُلُوسْ قَاعِدْ فِي كُرُنْتُسْ، بُولُسْ كَمَّلْ رُوَاغْتَهْ فِي الْحِلَّالْ الْفِي الْجِبَالْ وَ خَلَاصْ، وِصِلْ فِي مَدِينَةْ أَفَسُسْ. وَ هِنَاكْ لِقِي تَلَامِيذ وَاحِدِينْ. ٢ وَ بُولُسْ سَأَلَاهُمْ وَ قَالْ: «الرُّوحْ الْقُدُّوسْ نَزَلْ فَوْقكُو وَكِتْ آمَنْتُوا وَلَّا؟» وَ قَالَوْا: «لَا. الرُّوحْ الْقُدُّوسْ مَا نَعَرْفُوهْ وَ مَا سِمِعْنَا بَيَّهْ.» ٣ وَ بُولُسْ سَأَلَاهُمْ وَ قَالْ: «وَكِتْ غَطَّسَوْكُو، غَطِّسِينْكُو دَا كِكَّيْف؟» وَ قَالَوْا: «غَطَّسَوْنَا عَلَيْ حَسَبْ تَعْلِيمْ يَحْيَى.» ٤ وَ بُولُسْ قَالْ: «يَحْيَى غَطَّسْ النَّاسْ التَّابَوْا مِنْ ذُنُوبْهُمْ. وَ قَالْ لِلنَّاسْ كَدَرْ وَاجِبْ يِآمُنُوا بِالنَّادُمْ الْجَايِ وَرَايَهْ. وَ النَّادُمْ دَا، هُو عِيسَى.»

٥ وَ وَكِتْ سِمْعَوْا كَلَامْ بُولُسْ دَا، غَطَّسَوْهُمْ بِأُسُمْ الرَّبّ عِيسَى. ٦ وَ وَكِتْ بُولُسْ خَطَّ إِيدَيْنَهْ فَوْقهُمْ، الرُّوحْ الْقُدُّوسْ نَزَلْ فَوْقهُمْ وَ حَجَّوْا بِلُغَّاتْ جَدِيدَةْ وَ أَتْنَبَّأَوْا. ٧ وَ عَدَدْهُمْ 12 رَاجِلْ.

٨ وَ بُولُسْ دَخَلْ فِي بَيْت الصَّلَاةْ وَ بَدَا يِحَجِّي لِلنَّاسْ بَلَا خَوْف. وَ مُدَّةْ تَلَاتَةْ شَهَرْ، هُو يِنَاقِشْ مَعَاهُمْ فِي مَمْلَكَةْ اللّٰهْ أَشَانْ يِجِيبْهُمْ فِي الدَّرِبْ. ٩ وَ لَاكِنْ وَاحِدِينْ مِنْهُمْ رَاسْهُمْ قَوِي مَا دَوَّرَوْا يِآمُنُوا. وَ قَمَّوْا يِعَيُّرُوا دَرِبْ عِيسَى الْمَسِيحْ قِدَّامْ النَّاسْ. وَ بَيْدَا، بُولُسْ قَمَّ أَنْفَرَقْ مِنْهُمْ مَعَ تَلَامِيذَهْ وَ بَدَا يِنَاقِشْ مَعَاهُمْ كُلَّ يَوْم فِي مَدْرَسَةْ هَنَا نَادُمْ أُسْمَهْ تِيرَانُوسْ.

١٠ وَ بُولُسْ قَاعِدْ يِبَلِّغْ الْبِشَارَةْ دِي مُدَّةْ سَنْتَيْن. وَ بِمِثِلْ دَا، كُلَّ النَّاسْ السَّاكْنِينْ فِي بَلَدْ آسِيَا، مِنْ الْيَهُودْ وَ مِنْ الْيُونَانِيِّينْ، سِمْعَوْا كَلَامْ الرَّبّ. ١١ وَ اللّٰهْ سَوَّى عَجَايِبْ كُبَارْ بِوَاسِطَةْ بُولُسْ، ١٢ لَحَدِّي النَّاسْ قَاعِدِينْ يِشِيلُوا مِنَّهْ مِثِلْ الْقِطْعَةْ أَوْ خَلَقَهْ هَنَا الْخِدْمَةْ اللِّمْسَوْا جِلْدَهْ وَ يُخُطُّوهْ فِي الْمَرْضَانِينْ. وَ الْمَرَضْ يِخَلِّيهُمْ وَ الشَّوَاطِينْ كُلَ يَمُرْقُوا مِنْهُمْ.

أوْلاد سَكَاوَا

١٣ فِي الْبَلَدْ دِي، فِي يَهُودْ وَاحِدِينْ رَايْغِينْ حِلَّةْ لِحِلَّةْ وَ خِدْمِتْهُمْ يَشْفُوا الْمُشَوْطِنِينْ. وَ وَاحِدِينْ مِنْهُمْ يِسْتَعْمَلَوْا أُسُمْ الرَّبّ عِيسَى لِيَطُرْدُوا بَيَّهْ الشَّوَاطِينْ وَ يُقُولُوا: «نَامُرَكْ بِأُسُمْ عِيسَى، الْبُولُسْ قَاعِدْ يِبَشِّرْ بَيَّهْ.» ١٤ وَ مِنْ النَّاسْ السَّوَّوْا مِثِلْ دَا، سَبْعَةْ رُجَالْ، أَوْلَادْ يَهُودِي وَاحِدْ أُسْمَهْ سَكَاوَا وَ كَبِيرْ رُجَالْ الدِّينْ. ١٥ وَ الشَّيْطَانْ الدَّوَّرَوْا يَطُرْدُوهْ رَدَّ لَيْهُمْ وَ قَالْ: «عِيسَى نَعَرْفَهْ وَ أُسُمْ بُولُسْ نَعَرْفَهْ وَ لَاكِنْ إِنْتُو يَاتُمَّنْ؟»

١٦ وَ الْمُشَوْطِنْ هَجَمَاهُمْ وَ هُو شَدِيدْ مِنْهُمْ وَ عَجَلَةْ أَنَّصَرْ فَوْقهُمْ. هُو جَرَحَاهُمْ وَ شَرَّطْ خُلْقَانْهُمْ لَحَدِّي جَرَوْا مِنْ الْبَيْت عَرْيَانِينْ. ١٧ وَ كُلَّ النَّاسْ السَّاكْنِينْ فِي مَدِينَةْ أَفَسُسْ مِنْ الْيَهُودْ وَ مِنْ الْيُونَانِيِّينْ سِمْعَوْا الْخَبَرْ دَا وَ خَوْف شَدِيدْ دَخَلْ لَيْهُمْ وَ كَرَّمَوْا أُسُمْ الرَّبّ عِيسَى زِيَادَةْ. ١٨ وَ فِي الْبَكَانْ دَا، كَتِيرِينْ مِنْ الْمُؤمِنِينْ قَمَّوْا أَعْتَرَفَوْا بِأَعْمَالْهُمْ الشَّيْنِينْ السَّوَّوْهُمْ بِعَشِيرْ. ١٩ وَ نَاسْ كَتِيرِينْ مِنْهُمْ الْأَوَّلْ سَوَّوْا السِّحِرْ، لَمَّوْا كُتُبْهُمْ وَ تَشَّوْهُمْ قِدَّامْ نَاسْ الْحِلَّةْ. وَ حَسَبَوْا تَمَنْ الْكُتُبْ دَوْل وَ بِقِي مِثِلْ 50 000 حَجَرْ فُضَّةْ. ٢٠ وَ بِمِثِلْ دَا، نَاسْ السِّمْعَوْا كَلَامْ الرَّبّ زَادَوْا وَ قُدْرَةْ كَلَامَهْ زَادَتْ فِي أُسُطْهُمْ.

البرْجال في أفَسُس

٢١ وَ بَعَدْ دَا، بُولُسْ شَالْ نِيَّةْ أَشَانْ يَمْشِي فِي مَدِينَةْ الْقُدُسْ. وَ قُبَّالْ مَا يَمْشِي هِنَاكْ، دَوَّرْ يَمْشِي فِي مَقِدُونِيَةْ وَ أَخَايَةْ وَ قَالْ: «نَمْشِي فِي مَدِينَةْ الْقُدُسْ وَ بَعَدْ دَا، وَاجِبْ نَمْشِي فِي مَدِينَةْ رَوْمَا كُلَ.» ٢٢ وَ بُولُسْ عَزَلْ نَاسَيْن مِنْ الْأَخْوَانْ الْقَاعِدِينْ يَخْدُمُوا مَعَايَهْ وَ رَسَّلَاهُمْ فِي مَقِدُونِيَةْ أَشَانْ يَمْشُوا قِدَّامَهْ. وَ هُمَّنْ تِمُوتَاوُسْ وَ رَسْطُسْ. وَ بُولُسْ ذَاتَهْ قَعَدْ بَتَّانْ مُدَّةْ قِصَيْرَةْ فِي بَلَدْ آسِيَا.

٢٣ وَ فِي الْوَكِتْ دَا، بَرْجَالْ كَبِيرْ قَمَّ فِي أَفَسُسْ بِسَبَبْ دَرِبْ عِيسَى الْمَسِيحْ. ٢٤ فِيَّهْ صَيَّاغِي وَاحِدْ أُسْمَهْ دِمِتْرِي. خِدِمْتَهْ يَصْنَعْ مِنْ الْفُضَّةْ بُيُوتْ دُقَاقْ بِشَابُهُوا بَيْت الْعِبَادَةْ هَنَا الْإِلٰـهَةْ أَرْطَامِيسْ أَشَانْ يِبِيعْهُمْ. هُو وَ النَّاسْ الْيِسَوُّوا نَفْس الصِّنَاعَةْ لِقَوْا مِنْ التِّجَارَةْ دِي فَايْدَةْ كَتِيرَةْ. ٢٥ وَ هُو لَمَّ كُلَّ الصِّنَاعِيِينْ وَ خَدَّامِينْهُمْ.

وَ كَلَّمْ لَيْهُمْ وَ قَالْ: «يَا الْأَخْوَانْ، تَعَرْفُوا مَالْنَا جَايِ مِنْ الْخِدْمَةْ دِي. ٢٦ وَ شِفْتُوا وَ سِمِعْتُوا كِكَّيْف بُولُسْ دَا غَشَّ نَاسْ كَتِيرِينْ. وَ مَا غَشَّ نَاسْ هَنَا أَفَسُسْ بَسْ لَاكِنْ قَرِيبْ كُلَّ النَّاسْ الْقَاعِدِينْ فِي بَلَدْ آسِيَا. بُولُسْ قَالْ لَيْهُمْ كَدَرْ الْإِلٰـهَاتْ النَّاسْ صَنَعَوْهُمْ مَا إِلٰـهَاتْ بِالصَّحِيحْ. وَ جَابْ نَاسْ كَتِيرِينْ فِي دَرْبَهْ. ٢٧ وَ الْكَلَامْ دَا مَا يِتَلِّفْ تِجَارِتْنَا بَسْ لَاكِنْ يِجِيبْ عَيْب فِي بَيْت الْعِبَادَةْ هَنَا أَرْطَامِيسْ كُلَ وَ هِي إِلٰـهَتْنَا الْعَظِيمَةْ! أَكُونْ النَّاسْ يُقُولُوا بَيْتهَا مَا يَنْفَعْ. وَ أَكُونْ أُسُمْ أَرْطَامِيسْ الْعَظِيمْ يِوَدِّرْ! وَ دِي بَسْ الْإِلٰـهَةْ الْكُلَّ نَاسْ آسِيَا وَ كُلَّ نَاسْ الدُّنْيَا يَعَبُدُوهَا.»

٢٨ وَ وَكِتْ سِمْعَوْا الْكَلَامْ دَا، زِعِلَوْا زَعَلْ شَدِيدْ. وَ قَمَّوْا عَاطَوْا وَ قَالَوْا: «أَرْطَامِيسْ هَنَا نَاسْ أَفَسُسْ، هِي إِلٰـهَةْ عَظِيمَةْ.» ٢٩ وَ بِقِي بَرْجَالْ فِي كُلَّ الْحِلَّةْ. وَ نَاسْ كَتِيرِينْ بِلْحَيْن لَمَّوْا وَ كَرَبَوْا غَايُسْ وَ أَرِسْتَارْكُسْ رُفْقَانْ بُولُسْ الْإِتْنَيْن. هُمَّنْ مِنْ مَقِدُونِيَةْ وَ مَشَوْا مَعَايَهْ فِي سَفَرَهْ. وَ النَّاسْ جَرَوْا بَيْهُمْ فِي النَّقَعَةْ الْكَبِيرَةْ.

٣٠ وَ بُولُسْ دَوَّرْ يَدْخُلْ يِحَجِّي لِلنَّاسْ اللَّمَّوْا وَ لَاكِنْ التَّلَامِيذ دَحَرَوْه. ٣١ وَ وَاحِدِينْ مِنْ كُبَارَاتْ بَلَدْ آسِيَا رُفْقَانْ بُولُسْ رَسَّلَوْا لَيَّهْ وَ طَلَبَوْا مِنَّهْ مَا يَدْخُلْ فِي النَّقَعَةْ.

٣٢ وَ كَلَامْ النَّاسْ الْفِي النَّقَعَةْ بِقِي مُخَلْبَطْ. وَاحِدِينْ مِنْهُمْ قَالَوْا شَيّءْ وَاحِدْ وَ نَاسْ آخَرِينْ قَالَوْا شَيّءْ آخَرْ لَحَدِّي كَتِيرِينْ مِنْهُمْ مَا فِهْمَوْا فِي شَانْ شُنُو هُمَّنْ لَمَّوْا. ٣٣ الْيَهُودْ لَزَّوْا نَادُمْ وَاحِدْ أُسْمَهْ إِسْكَنْدَرْ قِدَّامْ النَّاسْ. وَ نَاسْ وَاحِدِينْ دَوَّرَوْا هُو يِكَلِّمْ لِلنَّاسْ. هُو سَوَّى إِشَارَةْ بِإِيدَهْ أَشَانْ النَّاسْ يَسْكُتُوا وَ دَوَّرْ يِدَافِعْ لِأَخْوَانَهْ. ٣٤ لَاكِنْ وَكِتْ النَّاسْ اللَّامِّينْ عِرْفَوْا هُو يَهُودِي، قَمَّوْا عَاطَوْا كُلُّهُمْ بِحِسّ وَاحِدْ وَ قَالَوْا: «أَرْطَامِيسْ هَنَا نَاسْ أَفَسُسْ، هِي إِلٰـهَةْ عَظِيمَةْ.» وَ قَاعِدِينْ يِعِيطُوا بِالْكَلَامْ دَا وَ مَا سَكَتَوْا لَحَدِّي مُدَّةْ سَاعْتَيْن.

٣٥ وَ فِي الأَخِيرْ، كَاتِبْ هَنَا مَجْلَسْ الْحِلَّةْ قِدِرْ سَكَّتْ النَّاسْ وَ كَلَّمْ لَيْهُمْ. وَ هُو قَالْ: «يَا نَاسْ أَفَسُسْ، مَا فِي نَادُمْ الْيَقْدَرْ يَنْكُرْ مَدِينَةْ أَفَسُسْ هِي بَسْ حَافْضَةْ بَيْت الْعِبَادَةْ هَنَا أَرْطَامِيسْ. وَ هِي الْإِلٰـهَةْ الْعَظِيمَةْ وَ صَنَمْهَا الْوَقَعْ مِنْ السَّمَاءْ. ٣٦ وَ كَنْ صَحِيحْ نَادُمْ وَاحِدْ مَا يَنْكُرْ الْكَلَامْ دَا، خَلَاصْ أَقْعُدُوا سَاكِتْ بَسْ! أَنْقَرْعُوا مَا تِسَوُّوا شَيّءْ فَسِلْ مِثِلْ مَا عِنْدُكُو عَقُلْ. ٣٧ إِنْتُو جِبْتُوا الرُّجَالْ دَوْل هِنِي وَ هُمَّنْ مَا سِرْقَوْا شَيّءْ مِنْ بَيْت الْعِبَادَةْ وَ مَا عَيَّرَوْا إِلٰـهَتْنَا.

٣٨ «وَ كَنْ دِمِتْرِي وَ أَخْوَانَهْ عِنْدُهُمْ شَكْوَةْ، عِنْدِنَا بَكَانْ هَنَا الشَّرِيعَةْ وَ عِنْدِنَا حُكَّامْ. خَلِّي يِقَدُّمُوا شَكْوِتْهُمْ لِلْحُكَّامْ. ٣٩ وَ كَنْ عِنْدُكُو مُشْكِلَةْ آخَرَةْ، نِحِلُّوهَا فِي الْمَلَمَّةْ الرَّسْمِيَّةْ. ٤٠ وَ لَاكِنْ الْيَوْم أَنِحْنَ قَاعِدِينْ نِجِيبُوا مُشْكِلَةْ فِي رَاسْنَا. وَكِتْ الرَّوْمَانِيِّينْ يَسْمَعَوْا بِالْبَرْجَالْ الْبِقِي الْيَوْم دَا، أَكُونْ يَحْكُمُوا فَوْقنَا. يُقُولُوا سَوَّيْنَا بَرْجَالْ فِي حِلِّتْنَا. مَا عِنْدِنَا سَبَبْ فِي شَانْ الْمُظَاهَرَةْ دِي تُكُونْ.» ٤١ وَ بَعَدْ قَالْ الْكَلَامْ دَا، قَالْ لِلنَّاسْ خَلِّي يِشِتُّوا.