أعمال الرُسُل 12

هِرُودُس تعّب المُؤمِنين

١ وَ فِي الْوَكِتْ دَا، الْمَلِكْ هِرُودُسْ قَمَّ يِتَعِّبْ نَاسْ وَاحِدِينْ مِنْ جَمَاعَةْ الْمُؤمِنِينْ. ٢ وَ بِإِذْنَهْ، كَتَلَوْا بِالْسَّيْف يَعْقُوبْ أَخُو يُوحَنَّا. ٣ وَ وَكِتْ هُو شَافْ الْيَهُودْ فِرْحَوْا مِنْ الشَّيّءْ السَّوَّاهْ دَا، هُو شَالْ نِيَّةْ أَشَانْ يَكْرُبْ بُطْرُسْ كُلَ. وَ كَرَبَهْ فِي أُسْبُوعْ هَنَا عِيدْ الْخُبْزَةْ بَلَا تَوَّارَةْ. ٤ وَ كَرَبْ بُطْرُسْ وَ دَسَّاهْ فِي السِّجِنْ. وَ كَلَّفْ بَيَّهْ 16 عَسْكَرْ وَ فِي أَيِّ وَكِتْ، 4 عَسْكَرْ قَاعِدِينْ مَعَايَهْ لِيَحَرْسُوهْ. وَ الْمَلِكْ دَوَّرْ يَمْرُقْ بُطْرُسْ وَ يِقَدِّمَهْ لِلشَّعَبْ بَعَدْ عِيدْ الْفِصْحَ. ٥ بُطْرُسْ قَاعِدْ فِي السِّجِنْ وَ لَاكِنْ جَمَاعَةْ الْمُؤمِنِينْ قَاعِدِينْ يَسْأَلَوْا اللّٰهْ بِشِدَّةْ فِي شَانَهْ.

الربّ مرق بُطْرُس من السِجِن

٦ وَ فِي اللَّيْلَةْ الْقُبَّالْ هِرُودُسْ مَا يَمْرُقْ بُطْرُسْ قِدَّامْ النَّاسْ، بُطْرُسْ مَرْبُوطْ بِجَنَازِيرْ إِتْنَيْن وَ نَايِمْ بَيْن عَسْكَرْ إِتْنَيْن. وَ عَسْكَرْ آخَرِينْ يَحَرْسُوا بَابْ السِّجِنْ. ٧ وَ فَجْأَةً، وَاحِدْ مِنْ مَلَائِكَةْ اللّٰهْ بَانْ وَ نُورْ شَدِيدْ سَدَّ السُّلُولُو الْبُطْرُسْ قَاعِدْ فَوْقَهْ. وَ الْمَلَكْ ضَرَبَهْ لِبُطْرُسْ فِي نَايْطَهْ وَ قَوَّمَهْ مِنْ النَّوْم وَ قَالْ: «يَلَّا، قُمّ عَجَلَةْ!» وَ الْجَنَازِيرْ وَقَعَوْا مِنْ إِيدَيْنَهْ. ٨ وَ الْمَلَكْ كَلَّمْ لَيَّهْ وَ قَالْ: «أَرْبُطْ صُلْبَكْ. أَلْبَسْ نَعَالَكْ.» وَ بُطْرُسْ تَابَعْ كَلَامَهْ. وَ الْمَلَكْ قَالْ لَيَّهْ: «أَلْبَسْ خَلَقَكْ وَ تَعَالْ تَابِعْنِي.»

٩ وَ بُطْرُسْ مَرَقْ يِتَابِعْ الْمَلَكْ. وَ فِي فِكْرَهْ، هُو قَاعِدْ يَحْلَمْ بَسْ وَ مَا عِرِفْ الشَّيّءْ الْقَاعِدْ يِسَوِّيهْ الْمَلَكْ دَا، صَحِيحْ. ١٠ وَ فَاتَوْا بِدَرِبْ الْعَسْكَرْ الْأَوَّلْ وَ فَاتَوْا بِدَرِبْ الْعَسْكَرْ التَّانِي وَ جَوْا فِي بَابْ الْحَدِيدْ فِي خَشُمْ السِّجِنْ الْيَمْرُقْ فِي الْحِلَّةْ. وَ الْبَابْ أَنْفَكَّ وِحَيْدَهْ وَ مَرَقَوْا مِنْ السِّجِنْ. وَ كَمَّلَوْا شَارِعْ وَاحِدْ وَ بَعَدْ دَا، الْمَلَكْ خَلَّاهْ. ١١ وَ خَلَاصْ بُطْرُسْ فَكَّرْ وَ قَالْ: «هَسَّعْ فِهِمْت. صَحِيحْ، اللّٰهْ رَسَّلْ مَلَكَهْ أَشَانْ يِنَجِّينِي مِنْ إِيدَيْن هِرُودُسْ وَ مِنْ كُلَّ شَيّءْ الْيَهُودْ دَوَّرَوْا يِسَوُّوا فَوْقِي.»

١٢ وَكِتْ فِهِمْ الشَّيّءْ الْبِقِي، هُو مَشَى فِي بَيْت مَرْيَمْ أَمّ يُوحَنَّا الْبِنَادُوهْ مَرْخُوسْ. وَ مُؤمِنِينْ كَتِيرِينْ لَامِّينْ فِي بَيْتهَا أَشَانْ يِصَلُّوا. ١٣ وَ لِحِقْ الْبَيْت وَ دَقَّ فِي الْبَابْ الْبَرَّانِي. وَ خَدَّامَةْ أُسُمْهَا رَوْدَةْ جَاتْ تِأَكِّدْ يَاتُو فِي الْبَابْ. ١٤ وَ وَكِتْ عِرْفَتْ حِسّ بُطْرُسْ، فِرْحَتْ بِلْحَيْن. لَاكِنْ مَا فَكَّتْ الْبَابْ وَ قَبَّلَتْ فَرْحَانَةْ وَ جَرَتْ أَشَانْ تُقُولْ لِلنَّاسْ اللَّامِّينْ كَدَرْ بُطْرُسْ قَاعِدْ بَرَّا فِي الْبَابْ. ١٥ وَ رَدَّوْا لَيْهَا وَ قَالَوْا: «رَاسْكِ لَفَّ وَلَّا؟» وَ لَاكِنْ هِي أَكَّدَتْ لَيْهُمْ كَلَامْهَا. وَ قَالَوْا لَيْهَا: «أَكُونْ دَا مَلَكْ هَنَا بُطْرُسْ بَسْ.»

١٦ وَ لَاكِنْ بُطْرُسْ قَاعِدْ يُدُقّ فِي الْبَابْ لَحَدِّي جَوْا فَكَّوْه لَيَّهْ. وَ وَكِتْ شَافَوْه، أَلْعَجَّبَوْا مَرَّةْ وَاحِدْ. ١٧ وَ بُطْرُسْ سَوَّى لَيْهُمْ إِشَارَةْ بِإِيدَهْ أَشَانْ يَسْكُتُوا. وَ أَوْرَاهُمْ بِكِكَّيْف اللّٰهْ مَرَقَهْ مِنْ السِّجِنْ وَ قَالْ: «أَمْشُوا خَبُّرُوا يَعْقُوبْ وَ الْأَخْوَانْ بِالشَّيّءْ الْبِقِي.» وَ خَلَاصْ، بُطْرُسْ مَرَقْ مِنْ الْبَيْت وَ مَشَى بَكَانْ آخَرْ.

١٨ وَ بِفَجُرْ، الْحُرَّاسْ بَرْجَلَوْا مَرَّةْ وَاحِدْ. وَ أَسَّاءَلَوْا أَمْبَيْنَاتْهُمْ وَ قَالَوْا: «شُنُو بِقِي لِبُطْرُسْ؟» ١٩ وَ وَكِتْ هِرُودُسْ رَسَّلْ عَسْكَرَهْ أَشَانْ يِجِيبُوا بُطْرُسْ، مَا لِقَوْه. وَ نَادَى الْحُرَّاسْ وَ سَأَلَاهُمْ سُؤَالْ كَتِيرْ وَ أَمَرْ عَسْكَرَهْ أَشَانْ يَكْتُلُوهُمْ. بَعَدْ دَا، هِرُودُسْ قَمَّ مِنْ دَارْ الْيَهُودِيَّةْ وَ مَشَى فِي حِلَّةْ قَيْصَرِيَّةْ وَ سَكَنْ هِنَاكْ.

مَوْت هِرُودُس

٢٠ هِرُودُسْ زَعْلَانْ مِنْ نَاسْ الْحِلَّالْ صُورْ وَ صَيْدَا. وَ نَاسْ الْحِلَّالْ دَوْل لَمَّوْا وَ أَسْتَفَقَوْا أَمْبَيْنَاتْهُمْ أَشَانْ يِسَّامَحَوْا مَعَايَهْ بِمُسَاعَدَةْ بَلَاسْتُسْ. وَ بَلَاسْتُسْ دَا، هُو مَسْؤُولْ قَصِرْ الْمَلِكْ هِرُودُسْ. وَ هُمَّنْ دَوَّرَوْا يِسَّامَحَوْا مَعَ هِرُودُسْ أَشَانْ أَكِلْ بَلَدْهُمْ جَايِ مِنْ مَمْلَكَتَهْ. ٢١ وَ فِي الْيَوْم الْمُحَدَّدْ، هِرُودُسْ لِبِسْ لُبَاسْ هَنَا مَلِكْ وَ قَعَدْ فِي الْكُرْسِي وَ هَرَجَاهُمْ قِدَّامْ كُلَّ النَّاسْ. ٢٢ وَ كُلَّ النَّاسْ قَمَّوْا عَاطَوْا وَ قَالَوْا: «دَا مَا حِسّ نَادُمْ! دَا حِسّ اللّٰهْ!» ٢٣ وَ طَوَّالِي، وَاحِدْ مِنْ مَلَائِكَةْ اللّٰهْ ضَرَبْ هِرُودُسْ أَشَانْ هُو مَا أَبَى شَكِّرِينْ النَّاسْ وَ مَا مَجَّدْ اللّٰهْ. وَ دُودْ الْبَطُنْ أَكَلْ مُصْرَانْ هِرُودُسْ وَ خَلَاصْ، هُو مَاتْ.

٢٤ وَ عَدَدْ النَّاسْ السِّمْعَوْا كَلَامْ اللّٰهْ زَادْ وَ نَاسْ كَتِيرِينْ آمَنَوْا. ٢٥ وَ فِي مَدِينَةْ الْقُدُسْ بَرْنَابَا وَ شَاوُولْ كَمَّلَوْا الْخِدْمَةْ الْكَلَّفَوْهُمْ بَيْهَا الْمُؤمِنِينْ. وَ هُمَّنْ قَبَّلَوْا فِي أَنْطَاكِيَةْ وَ وَدَّوْا مَعَاهُمْ يُوحَنَّا الْبِنَادُوهْ مَرْخُوسْ.