أعمال الرُسُل 9

المسيح بان لشَاوُول

١ وَ لَاكِنْ شَاوُولْ لِسَّاعَهْ زَعْلَانْ وَ قَاعِدْ يِهَدِّدْهُمْ بِالْكَتِلْ لِتَلَامِيذ الرَّبّ عِيسَى. وَ مَشَى لِكَبِيرْ رُجَالْ الدِّينْ ٢ وَ طَلَبْ مِنَّهْ جَوَابَاتْ لِبُيُوتْ الصَّلَاةْ فِي مَدِينَةْ دِمَشْق. وَ فِي الْجَوَابَاتْ دَوْل، يَنْطُوهْ إِذِنْ أَشَانْ يَكْرُبْ أَيِّ نَادُمْ الْيِتَابِعْ دَرِبْ عِيسَى الْمَسِيحْ، كَنْ رَاجِلْ وَلَّا مَرَةْ. وَ فِي أَيِّ بَكَانْ الْيَلْقَاهُمْ فَوْقَهْ، يَكْرُبْهُمْ وَ يِوَدِّيهُمْ مُقَيَّدِينْ فِي مَدِينَةْ الْقُدُسْ.

٣ وَ شَاوُولْ مَشَى. وَ وَكِتْ قَرَّبْ لِدِمَشْق، فَجْأَةً نُورْ شَدِيدْ مِنْ السَّمَاءْ دَاوَى فَوْقَهْ. ٤ وَ شَاوُولْ وَقَعْ فِي التُّرَابْ وَ سِمِعْ حِسّ نَادُمْ قَاعِدْ يِكَلِّمْ لَيَّهْ وَ يُقُولْ: «يَا شَاوُولْ، يَا شَاوُولْ! مَالَكْ تِتَعِّبْنِي؟» ٥ وَ شَاوُولْ سَأَلَهْ وَ قَالْ: «يَا السَّيِّدْ، إِنْتَ يَاتُو؟» وَ الْحِسّ قَالْ: «أَنَا عِيسَى الْإِنْتَ قَاعِدْ تِتَعِّبَهْ. ٦ قُمّ وَ أَدْخُلْ فِي دِمَشْق وَ نَادُمْ وَاحِدْ يِأَوْرِيكْ بِالشَّيّءْ الْوَاجِبْ تِسَوِّيهْ.»

٧ وَ النَّاسْ الْمَاشِينْ مَعَ شَاوُولْ وَقَفَوْا وَ سَكَتَوْا مِنْ الْعَجَبْ أَشَانْ سِمْعَوْا الْحِسّ وَ لَاكِنْ مَا شَافَوْا نَادُمْ. ٨ وَ وَكِتْ شَاوُولْ قَمَّ فَوْق وَ فَكَّ عُيُونَهْ مَا قِدِرْ يِشِيفْ شَيّءْ. وَ كَرَبَوْه مِنْ إِيدَيْنَهْ وَ وَدَّوْه فِي دِمَشْق. ٩ وَ تَلَاتَةْ يَوْم مَا يِشِيفْ شَيّءْ وَ لَا يَاكُلْ وَ لَا يَشْرَبْ.

١٠ وَ نَادُمْ وَاحِدْ قَاعِدْ فِي دِمَشْق أُسْمَهْ حَنَانِيَّا وَ هُو تِلْمِيذْ الْمَسِيحْ. الرَّبّ عِيسَى بَانْ لَيَّهْ فِي رُؤْيَةْ وَ قَالْ: «يَا حَنَانِيَّا!» وَ حَنَانِيَّا رَدَّ لَيَّهْ وَ قَالْ: «نَعَمْ، يَا رَبّ.» ١١ وَ الرَّبّ كَلَّمْ لَيَّهْ وَ قَالْ: «أَمْشِي فِي الشَّارِعْ الْأُسْمَهْ الْمُسْتَقِيمْ وَ أَمْشِي فِي بَيْت هَنَا يَهُوذَا. أَسْأَلْ مِنْ النَّادُمْ الْمِنْ حِلَّةْ طَرْسُوسْ الْأُسْمَهْ شَاوُولْ أَشَانْ هَسَّعْ هُو قَاعِدْ يِصَلِّي. ١٢ وَ فِي صَلَاتَهْ، هُو رِئِي وَ فِي الرُّؤْيَةْ، هُو شَافْ نَادُمْ أُسْمَهْ حَنَانِيَّا دَخَلْ فِي بَيْتَهْ وَ خَطَّ إِيدَيْنَهْ فَوْقَهْ أَشَانْ عُيُونَهْ يِنْفَتْحُوا.»

١٣ وَ حَنَانِيَّا رَدَّ لَيَّهْ وَ قَالْ: «يَا رَبِّنَا، سِمِعْت خَبَرْ مِنْ نَاسْ كَتِيرِينْ يُقُولُوا الرَّاجِلْ دَا سَوَّى عَمَلْ شَيْن فِي نَاسَكْ الصَّالِحِينْ فِي مَدِينَةْ الْقُدُسْ. ١٤ وَ يُقُولُوا هُو جَاءْ هِنِي بِإِذِنْ كُبَارَاتْ رُجَالْ الدِّينْ أَشَانْ يَكْرُبْ أَيِّ نَادُمْ الْيَدْعِي بِأُسْمَكْ.» ١٥ وَ الرَّبّ حَجَّى لَيَّهْ وَ قَالْ: «أَمْشِي بَسْ. الرَّاجِلْ دَا، أَنَا عَزَلْتَهْ أَشَانْ يَبْقَى خَدَّامِي وَ يَمْشِي يِبَشِّرْ بِأُسْمِي لِلنَّاسْ الْمَا يَهُودْ وَ لِمُلُوكْهُمْ وَ لِبَنِي إِسْرَائِيلْ. ١٦ وَ أَنَا بَسْ نِوَصِّفْ لَيَّهْ التَّعَبْ الشَّدِيدْ الْهُو يَتْعَبَهْ فِي شَانِي أَنَا.»

١٧ وَ خَلَاصْ، حَنَانِيَّا قَمَّ وَ مَشَى فِي بَيْت يَهُوذَا وَ خَطَّ إِيدَيْنَهْ فِي شَاوُولْ وَ قَالْ: «يَا أَخُونَا شَاوُولْ، رَبِّنَا عِيسَى بَانْ لَيْك فِي الدَّرِبْ وَكِتْ إِنْتَ جَايِ هِنِي وَ هُو بَسْ رَسَّلَانِي لَيْك أَشَانْ تِشِيفْ بَتَّانْ وَ تِنْمَلِي بِالرُّوحْ الْقُدُّوسْ.» ١٨ وَ طَوَّالِي، شُغُلْ مِثِلْ قِشِرْ وَقَعْ مِنْ عُيُونَهْ وَ بَتَّانْ قَمَّ يِشِيفْ. وَ شَاوُولْ قَمَّ فَوْق وَ غَطَّسَوْه. ١٩ وَ أَكَلْ وَ لِقِي قُدْرَةْ. وَ قَعَدْ أَيَّامْ شِيَّةْ مَعَ التَّلَامِيذ فِي دِمَشْق.

شَاوُول في دِمَشْق

٢٠ وَ طَوَّالِي كَيْ، شَاوُولْ مَشَى فِي بُيُوتْ الصَّلَاةْ وَ بَلَّغْ النَّاسْ بِعِيسَى وَ قَالْ كَدَرْ عِيسَى هُو إِبْن اللّٰهْ. ٢١ وَ كُلَّ النَّاسْ السِّمْعَوْا كَلَامَهْ أَلْعَجَّبَوْا مَرَّةْ وَاحِدْ وَ قَالَوْا: «دَا بَسْ النَّادُمْ الْقَمَّ فِي مَدِينَةْ الْقُدُسْ وَ تَعَّبْ النَّاسْ الْيَدْعُوا بِأُسُمْ عِيسَى. وَ دَاهُو جَاءْ هِنِي أَشَانْ يَكْرُبْهُمْ وَ يِوَدِّيهُمْ فِي بَكَانْ كُبَارَاتْ رُجَالْ الدِّينْ.»

٢٢ لَاكِنْ شَاوُولْ بِقِي قَوِي زِيَادَةْ. وَ الْيَهُودْ الْفِي دِمَشْق مَا قِدْرَوْا يِخَالُفُوهْ أَشَانْ بِكَلَامْ وَاضِحْ هُو قَاعِدْ يِثَبِّتْ لَيْهُمْ كَدَرْ عِيسَى هُو الْمَسِيحْ. ٢٣ وَ بَعَدْ شَاوُولْ قَعَدْ أَيَّامْ فِي دِمَشْق، الْيَهُودْ أَشَّاوَرَوْا أَمْبَيْنَاتْهُمْ أَشَانْ يَكْتُلُوهْ. ٢٤ وَ شَاوُولْ سِمِعْ خَبَرْ مُؤآمَرَتْهُمْ. وَ الْيَهُودْ قَاعِدِينْ يَرْجَوْه فِي بِيبَانْ الْمَدِينَةْ لَيْل وَ نَهَارْ أَشَانْ يَكْتُلُوهْ. ٢٥ وَ خَلَاصْ بِاللَّيْل، وَاحِدِينْ مِنْ تَلَامِيذَهْ وَدَّوْا شَاوُولْ لِدُرْدُرْ الْمَدِينَةْ وَ دَسَّوْه فِي شَبَكَةْ كَبِيرَةْ وَ دَلَّوْه تِحِتْ بِحَبِلْ غَادِي مِنْ الدُّرْدُرْ.

شَاوُول في مدينة القدس

٢٦ وَ شَاوُولْ مَشَى فِي مَدِينَةْ الْقُدُسْ وَ دَوَّرْ يِلِمّ مَعَ تَلَامِيذ الْمَسِيحْ وَ لَاكِنْ هُمَّنْ مَا صَدَّقَوْا كَدَرْ هُو كُلَ تِلْمِيذْ وَ هُمَّنْ خَايْفِينْ مِنَّهْ. ٢٧ وَ بَرْنَابَا لَمَّ مَعَ شَاوُولْ وَ قَدَّمَهْ لِلرُّسُلْ. وَ بَرْنَابَا أَوْرَاهُمْ بِكِكَّيْف الرَّبّ بَانْ لِشَاوُولْ فِي دَرِبْ دِمَشْق وَ كَلَّمْ لَيَّهْ. وَ أَوْرَاهُمْ بِكِكَّيْف شَاوُولْ قَمَّ بَلَا خَوْف فِي دِمَشْق وَ بَلَّغْ الْبِشَارَةْ بِأُسُمْ الرَّبّ عِيسَى.

٢٨ وَ خَلَاصْ، شَاوُولْ بَدَا يَخْدِمْ مَعَاهُمْ فِي مَدِينَةْ الْقُدُسْ وَ قَاعِدْ يِبَلِّغْ بَلَا خَوْف الْبِشَارَةْ بِأُسُمْ عِيسَى. ٢٩ وَ كَلَّمْ لِلْيَهُودْ الْيِحَجُّوا بِكَلَامْ يُونَانِي وَ غَالَطَاهُمْ. وَ هُمَّنْ أَلآمَرَوْا فَوْقَهْ أَشَانْ يَكْتُلُوهْ. ٣٠ وَ الْأَخْوَانْ سِمْعَوْا بِالْكَلَامْ دَا وَ وَدَّوْا شَاوُولْ فِي خَشُمْ الْبَحَرْ فِي حِلَّةْ قَيْصَرِيَّةْ. وَ مِنْ هِنَاكْ، رَسَّلَوْه فِي طَرْسُوسْ.

٣١ وَ خَلَاصْ، أُمَّةْ الْمَسِيحْ الْفِي دَارْ الْيَهُودِيَّةْ وَ فِي دَارْ الْجَلِيلْ وَ فِي دَارْ السَّامِرَةْ قَاعِدَةْ بِعَافَيْ وَ سَلَامْ. وَ كُلَّ الْمُؤمِنِينْ خَايْفِينْ مِنْ الرَّبّ وَ الرُّوحْ الْقُدُّوسْ شَجَّعَاهُمْ وَ عَدَدْهُمْ زَادْ.

عمل بُطْرُس في لُدَّة و يَافَا

٣٢ وَ بُطْرُسْ قَاعِدْ يَمْشِي مِنْ حِلَّةْ لِحِلَّةْ وَ خَلَاصْ مَشَى لِلْمُؤمِنِينْ الْقَاعِدِينْ فِي حِلَّةْ لُدَّةْ. ٣٣ وَ لِقِي نَادُمْ وَاحِدْ مُكَرْسَحْ أُسْمَهْ إِنْيَاسْ. مِنْ تَمَانَةْ سَنَةْ، هُو رَاقِدْ فِي السَّرِيرْ. ٣٤ وَ بُطْرُسْ حَجَّى لَيَّهْ وَ قَالْ: «يَا إِنْيَاسْ، عِيسَى الْمَسِيحْ يَشْفِيكْ. قُمّ فَوْق وَ طَبِّقْ سَرِيرَكْ.» وَ طَوَّالِي، إِنْيَاسْ قَمَّ وَ لِقِي الْعَافَيْ. ٣٥ وَ كُلَّ سُكَّانْ لُدَّةْ وَ شَارُونْ شَافَوْه وَ آمَنَوْا بِالرَّبّ عِيسَى.

٣٦ وَ مَرَةْ وَاحِدَةْ قَاعِدَةْ فِي حِلَّةْ يَافَا أُسُمْهَا طَابِيتَةْ وَ بِكَلَامْ يُونَانِي، دَا دُورْكَاسْ مَعَنَاتَهْ غَزَالَةْ. وَ هِي كُلَ مِنْ التَّلَامِيذ. وَ كُلِّ يَوْم، هِي قَاعِدَةْ تِسَاعِدْ الْمَسَاكِينْ وَ هِي دَايْماً شَغَّالَةْ بِعَمَلْ الْخَيْر. ٣٧ وَ فِي الْوَكِتْ دَا، هِي بِقَتْ مَرْضَانَةْ وَ مَاتَتْ. وَ بَرَّدَوْهَا وَ خَطَّوْا جَنَازِتْهَا فِي الْقَصِرْ التَّانِي. ٣٨ وَ التَّلَامِيذ الْفِي يَافَا سِمْعَوْا خَبَرْ بُطْرُسْ قَاعِدْ فِي لُدَّةْ. وَ لُدَّةْ مَا بَعِيدَةْ مِنْ يَافَا وَ خَلَاصْ رَسَّلَوْا رُجَالْ إِتْنَيْن أَشَانْ يِنَادُوهْ وَ يُقُولُوا لَيَّهْ: «تَعَالْ لَيْنَا عَجَلَةْ.»

٣٩ وَ بُطْرُسْ قَمَّ مَشَى مَعَاهُمْ. وَ وَكِتْ جَاءْ فِي الْبَيْت، وَدَّوْه فَوْق فِي الْبَكَانْ الْهِي رَاقْدَةْ فَوْقَهْ. وَ كُلَّ الْعَجَايِزْ الْمِسْكِينَاتْ قَاعِدَاتْ يَبْكَنْ وَ مَشَنْ لِبُطْرُسْ أَشَانْ يِوَصِّفَنْ لَيَّهْ اللُّبَاسْ وَ الْخُلْقَانْ الدُّورْكَاسْ خَيَّطَتْهُمْ وَكِتْ هِي حَيَّةْ. ٤٠ وَ بُطْرُسْ طَلَبْ مِنْ كُلَّ النَّاسْ الْحَاضْرِينْ يَمُرْقُوا بَرَّا.

وَ وَكِتْ مَرَقَوْا، هُو بَرَكْ وَ سَأَلْ اللّٰهْ. وَ بَعَدْ دَا، هُو أَنْلَفَتْ لِلْجَنَازَةْ وَ قَالْ: «يَا طَابِيتَةْ، قُمِّي فَوْق!» وَ هِي فَكَّتْ عُيُونْهَا. وَ وَكِتْ شَافَتْ بُطْرُسْ، هِي قَمَّتْ بِحَيْلهَا. ٤١ وَ بُطْرُسْ كَرَبْهَا مِنْ إِيدَيْنهَا وَ عَاوَنَاهَا وَ هِي قَمَّتْ فَوْق. وَ نَادَى كُلَّ الصَّالِحِينْ وَ الْعَجَايِزْ وَ خَلَاصْ قَدَّمَاهَا لَيْهُمْ حَيَّةْ.

٤٢ وَ كُلَّ نَاسْ حِلَّةْ يَافَا سِمْعَوْا بِالْعَجَبْ دَا وَ نَاسْ كَتِيرِينْ آمَنَوْا بِالرَّبّ عِيسَى. ٤٣ وَ بُطْرُسْ قَعَدْ أَيَّامْ فِي يَافَا وَ سَكَنْ فِي بَيْت دَبَّاغِي وَاحِدْ أُسْمَهْ سِمْعَانْ.