يُوحَنَّا 13

المسيح غسّل رِجِلَيْن تلاميذه

١ وَ قُبَّالْ عِيدْ الْفِصْحَ مَا يَبْدَا، عِيسَى عِرِفْ كَدَرْ وَكْتَهْ تَمَّ وَ لَابُدَّ يَمْرُقْ مِنْ الدُّنْيَا وَ يِقَبِّلْ لِأَبُوهْ. وَ مِنْ الْبِدَايَةْ، هُو يِحِبّ نَاسَهْ الْقَاعِدِينْ فِي الدُّنْيَا وَ يِحِبُّهُمْ حُبّ شَدِيدْ.

٢ وَ عِيسَى وَ تَلَامِيذَهْ قَاعِدِينْ فِي الْعَشَاءْ. وَ فِي الْوَكِتْ دَا، خَلَاصْ إِبْلِيسْ دَسَّ نِيَّةْ الْخِيَانَةْ فِي قَلِبْ يَهُوذَا وِلَيْد سِمْعَانْ الْإِسْخَرِيَوْطِي أَشَانْ يُخُونْ عِيسَى. ٣ وَ عِيسَى يَعَرِفْ كَدَرْ هُو جَاءْ مِنْ اللّٰهْ وَ يِقَبِّلْ لِلّٰهْ وَ يَعَرِفْ كَدَرْ أَبُوهْ أَنْطَاهْ قُدْرَةْ فِي كُلَّ شَيّءْ. ٤ وَ وَكِتْ قَاعِدِينْ يَاكُلُوا، عِيسَى قَمَّ فَوْق وَ سَلَّ خَلَقَهْ الْبَرَّانِي وَ شَالْ الْقِطْعَةْ الْبُقُشُّوا بَيْهَا وَ رَبَطْ بَيْهَا صُلْبَهْ. ٥ وَ صَبَّ أَلْمِي فِي مَاعُونْ وَ بَدَا يِغَسِّلْ رِجْلَيْ تَلَامِيذَهْ. وَ قَشَّاهُمْ بِالْقِطْعَةْ الرَّبَطْ بَيْهَا صُلْبَهْ.

٦ وَ جَاءْ لِسِمْعَانْ بُطْرُسْ. وَ سِمْعَانْ بُطْرُسْ قَالْ: «سَيِّدْنَا، تِدَوْر تِغَسِّلْ رِجِلَيْنِي وَلَّا؟» ٧ وَ عِيسَى رَدَّ لَيَّهْ وَ قَالْ: «إِنْتَ لِسَّاعْ مَا فِهِمْت الشَّيّءْ الْأَنَا قَاعِدْ نِسَوِّيهْ لَاكِنْ بَعَدَيْن تَفْهَمَهْ.» ٨ وَ سِمْعَانْ بُطْرُسْ قَالْ: «أَبَداً مَا تِغَسِّلْ رِجِلَيْنِي!» وَ عِيسَى رَدَّ لَيَّهْ وَ قَالْ: «كَنْ أَنَا مَا نِغَسِّلَكْ، إِنْتَ مَا عِنْدَكْ حَقّ مَعَايِ.» ٩ وَ سِمْعَانْ بُطْرُسْ قَالْ: «سَيِّدْنَا، كَنْ يَبْقَى مِثِلْ دَا، مَا تِغَسِّلْ رِجِلَيْنِي بَسْ. غَسِّلْ إِيدَيْنِي وَ رَاسِي كُلَ!» ١٠ وَ عِيسَى قَالْ: «كَنْ نَادُمْ أَلْبَرَّدْ خَلَاصْ، الْغَسُولْ مَا وَاجِبْ لَيَّهْ إِلَّا فِي رِجِلَيْنَهْ. هُو نَضِيفْ مَرَّةْ وَاحِدْ. وَ إِنْتُو نُضَافْ لَاكِنْ مَا كُلُّكُو.» ١١ وَ عِيسَى عِرِفْ النَّادُمْ الْيِدَوْر يُخُونَهْ وَ أَشَانْ دَا قَالْ: «مَا كُلُّكُو نُضَافْ.»

١٢ وَ وَكِتْ عِيسَى غَسَّلْ رِجْلَيْهُمْ خَلَاصْ، هُو لِبِسْ خَلَقَهْ وَ قَبَّلْ فِي بَكَانَهْ وَ حَجَّى لَيْهُمْ وَ قَالْ: «تَعَرْفُوا الشَّيّءْ الْأَنَا سَوَّيْتَهْ لَيْكُو وَلَّا؟ ١٣ إِنْتُو تُقُولُوا أَنَا مُعَلِّمْكُو وَ سَيِّدْكُو وَ كَلَامْكُو صَحِيحْ. ١٤ وَ كَنْ أَنَا سَيِّدْكُو وَ مُعَلِّمْكُو وَ أَنَا غَسَّلْت رِجْلَيْكُو، وَاجِبْ أَيِّ وَاحِدْ مِنْكُو يِغَسِّلْ رِجْلَيْ الْآخَرِينْ. ١٥ الشَّيّءْ الْأَنَا سَوَّيْتَهْ دَا مَثَلْ لَيْكُو أَشَانْ إِنْتُو كُلَ تِسَوُّوا مِثِلْ أَنَا سَوَّيْتَهْ لَيْكُو. ١٦ أَسْمَعَوْا نُقُولْ لَيْكُو الْحَقّ، الْعَبِدْ مَا أَكْبَرْ مِنْ سِيدَهْ وَ الْمُرْسَالْ مَا أَكْبَرْ مِنْ الرَّسَّلَهْ. ١٧ وَ خَلَاصْ، تَعَرْفُوا الْكَلَامْ دَا وَ مَبْرُوكْ لَيْكُو كَنْ تِسَوُّوهْ.

١٨ «وَ الْكَلَامْ الْقُلْتَهْ دَا، مَا لَيْكُو إِنْتُو كُلُّكُو. نَعَرِفْ النَّاسْ الْأَنَا عَزَلْتُهُمْ. وَ لَاكِنْ الْكَلَامْ الْمَكْتُوبْ فِي الْكِتَابْ لَابُدَّ يِتِمّ. مَكْتُوبْ: ﴿الْيَاكُلْ مَعَايِ خُبْزِتِي، هُو أَنْقَلَبْ ضِدِّي.﴾ ١٩ نِأَوْرِيكُو هَسَّعْ بِالشَّيّءْ الْيِدَوْر يَبْقَى قُبَّالْ مَا يَبْقَى. أَشَانْ دَا، وَكِتْ بِقِي خَلَاصْ، إِنْتُو تِآمُنُوا بَيِّ كَدَرْ أَنَا هُو. ٢٠ أَسْمَعَوْا نُقُولْ لَيْكُو الْحَقّ، أَيِّ نَادُمْ الْيَقْبَلْ مُرْسَالِي، يَقْبَلْنِي أَنَا. وَ النَّادُمْ الْيَقْبَلْنِي أَنَا، يَقْبَلْ اللّٰهْ الرَّسَّلَانِي.»

المسيح حجّى بيَهُوذَا الخايِن

٢١ وَ وَكِتْ عِيسَى قَالْ الْكَلَامْ دَا، هُو حِزِنْ مَرَّةْ وَاحِدْ. وَ حَجَّى لَيْهُمْ وَ قَالْ: «أَسْمَعَوْا نُقُولْ لَيْكُو الْحَقّ، نَادُمْ وَاحِدْ مِنْكُو يُخُونِّي.» ٢٢ وَ التَّلَامِيذ أَلْعَجَّبَوْا وَ مَا عِرْفَوْا النَّادُمْ الْمِنْهُمْ الْعِيسَى حَجَّى بَيَّهْ. وَ كُلُّهُمْ قَاعِدِينْ يِشَّاوَفَوْا أَمْبَيْنَاتْهُمْ. ٢٣ وَ نَادُمْ وَاحِدْ مِنْ تَلَامِيذَهْ مُنْتَكِي جَنْب عِيسَى فِي نُصَّهْ الزَّيْنَايْ وَ هُو التِّلْمِيذْ الْعِيسَى يِحِبَّهْ بِلْحَيْن. ٢٤ وَ سِمْعَانْ بُطْرُسْ سَوَّى لَيَّهْ إِشَارَةْ أَشَانْ يَسْأَلْ عِيسَى يَاتُو النَّادُمْ الْحَجَّى بَيَّهْ. ٢٥ وَ التِّلْمِيذْ تَكَّى وَرَاءْ لَحَدِّي لِحِقْ صَدُرْ عِيسَى وَ سَأَلَهْ وَ قَالْ: «سَيِّدْنَا، حَجَّيْت بِيَاتُو؟»

٢٦ وَ عِيسَى رَدَّ لَيَّهْ وَ قَالْ: «شِيفْ، نِشِيلْ لُقْمَةْ وَ نِمَلِّحْهَا وَ نَنْطِيهَا لِنَادُمْ وَاحِدْ. وَ دَا بَسْ هُو.» وَ شَالْ لُقْمَةْ وَ مَلَّحَاهَا وَ أَنْطَاهَا لِيَهُوذَا وِلَيْد سِمْعَانْ الْإِسْخَرِيَوْطِي. ٢٧ وَ يَهُوذَا شَالْ اللُّقْمَةْ وَ خَلَاصْ إِبْلِيسْ دَخَلْ فِي قَلْبَهْ. وَ عِيسَى حَجَّى لَيَّهْ وَ قَالْ: «الشَّيّءْ التِّدَوْر تِسَوِّيهْ، سَوِّيهْ عَجَلَةْ.»

٢٨ وَ كُلُّهُمْ الْقَاعِدِينْ يَاكُلُوا سِمْعَوْا الْكَلَامْ الْعِيسَى قَالَهْ لِيَهُوذَا، لَاكِنْ مَا عِرْفَوْا مَعَنَاتَهْ. ٢٩ يَهُوذَا هُو مَسْؤُولْ هَنَا صَنْدُوقْ الْقُرُسْ وَ فِي فِكِرْ وَاحِدِينْ، عِيسَى قَالْ لَيَّهْ خَلِّي يَمْشِي يَشْرِي الْخُمَامْ الْوَاجِبْ لِلْعِيدْ. وَ فِي فِكِرْ وَاحِدِينْ، عِيسَى قَالْ لَيَّهْ خَلِّي يَمْشِي يَنْطِي صَدَقَةْ لِلْمَسَاكِينْ. ٣٠ وَ يَهُوذَا شَالْ اللُّقْمَةْ وَ طَوَّالِي مَرَقْ. وَ اللَّيْل قَاعِدْ وَ الْوَطَاةْ ضَلْمَةْ.

٣١ وَ وَكِتْ يَهُوذَا مَرَقْ خَلَاصْ، عِيسَى حَجَّى لَيْهُمْ وَ قَالْ: «هَسَّعْ مَجْد إِبْن الْإِنْسَانْ يِبِينْ. وَ بَيَّهْ هُو، مَجْد اللّٰهْ يِبِينْ. ٣٢ وَ كَنْ بَيَّهْ هُو مَجْد اللّٰهْ يِبِينْ، أَكِيدْ اللّٰهْ يِمَجِّدْ إِبْن الْإِنْسَانْ مَعَايَهْ وَ يِمَجِّدَهْ طَوَّالِي.

الوصيّة الجديدة

٣٣ «يَا عِيَالِي، أَنَا نَقْعُدْ مَعَاكُو وَكِتْ شِيَّةْ بَسْ. إِنْتُو تِفَتُّشُونِي وَ لَاكِنْ نُقُولْ لَيْكُو نَفْس الْكَلَامْ الْقُلْتَهْ لِلْيَهُودْ. الْبَكَانْ النَّمْشِي لَيَّهْ إِنْتُو مَا تَقْدَرَوْا تَمْشُوا لَيَّهْ. ٣٤ وَ نَنْطِيكُو وَصِيَّةْ جَدِيدَةْ وَ الْوَصِيَّةْ هِي أَرَّايَدَوْا أَمْبَيْنَاتْكُو. أَرَّايَدَوْا مِثِلْ أَنَا نِرِيدْكُو. ٣٥ وَ مِثِلْ دَا بَسْ، كُلَّ النَّاسْ يَعَرْفُوا إِنْتُو تَلَامِيذِي كَنْ إِنْتُو تِرَّايَدَوْا أَمْبَيْنَاتْكُو.»

٣٦ وَ سِمْعَانْ بُطْرُسْ قَالْ: «سَيِّدْنَا، إِنْتَ مَاشِي وَيْن؟» وَ عِيسَى رَدَّ لَيَّهْ وَ قَالْ: «هَسَّعْ إِنْتَ مَا تَقْدَرْ تِتَابِعْنِي فِي الْبَكَانْ الْأَنَا نَمْشِي لَيَّهْ. لَاكِنْ فِي وَكِتْ آخَرْ، تَقْدَرْ تِتَابِعْنِي.» ٣٧ وَ بُطْرُسْ سَأَلَهْ وَ قَالْ: «سَيِّدْنَا، مَالَا مَا نَقْدَرْ نِتَابِعَكْ هَسَّعْ؟ أَنَا جَاهِزْ نِتَابِعَكْ لَحَدِّي نَفْدَاكْ بِرُوحِي!» ٣٨ وَ عِيسَى رَدَّ لَيَّهْ وَ قَالْ: «هَلْ صَحِيحْ تِدَوْر تَفْدَانِي بِرُوحَكْ وَلَّا؟ أَسْمَعْ نُقُولْ لَيْك الْحَقّ، قُبَّالْ الدِّيكْ مَا يِعَوْعِي، إِنْتَ تَنْكُرْنِي تَلَاتَةْ مَرَّاتْ.»