لُوقا 14

المسيح شفى في يوم السبْت

١ وَ يَوْم وَاحِدْ، نَادُمْ مِنْ كُبَارَاتْ الْفَرِيزِيِّينْ عَزَمْ عِيسَى أَشَانْ يَاكُلْ مَعَايَهْ وَ عِيسَى مَشَى لَيَّهْ فِي بَيْتَهْ. وَ دَا يَوْم السَّبْت وَ الضِّيفَانْ الْآخَرِينْ خَطَّوْا بَالْهُمْ فِي عِيسَى أَشَانْ يِشِيفُوا شُنُو الشَّيّءْ الْيِسَوِّيهْ. ٢ وَ هِنَاكْ قِدَّامَهْ فِي نَادُمْ مُوَرِّمْ. ٣ وَ عِيسَى سَأَلْ عُلَمَاءْ التَّوْرَاةْ وَ الْفَرِيزِيِّينْ وَ قَالْ: «فِي يَوْم السَّبْت، حَلَالْ لَيْنَا نَشْفُوا الْمَرْضَانِينْ وَلَّا؟» ٤ وَ مَا قَالَوْا لَيَّهْ شَيّءْ. وَ هُو كَرَبْ إِيدْ الْمَرْضَانْ وَ شَفَاهْ وَ خَلَّاهْ مَشَى. ٥ وَ عِيسَى سَأَلَاهُمْ بَتَّانْ وَ قَالْ: «كَنْ نَادُمْ مِنْكُو عِنْدَهْ وِلَيْد وَلَّا تَوْر الْوَقَعْ فِي بِيرْ فِي يَوْم السَّبْت، يِسَوِّي شُنُو؟ مَا يَمُرْقَهْ عَجَلَةْ وَلَّا؟» ٦ وَ مَا قِدْرَوْا يُرُدُّوا لَيَّهْ فِي الْكَلَامْ دَا.

الواجِب في العاوازيم

٧ وَ عِيسَى شَافْ كَدَرْ أَيِّ ضَيْف دَوَّرْ يَقْعُدْ فِي الْبَكَانْ الْكُبَارَاتْ يَقْعُدُوا فَوْقَهْ. وَ حَجَّى لَيْهُمْ بِمَثَلْ وَ قَالْ: ٨ «كَنْ نَادُمْ يَعَزِمَكْ فِي عَازُومَةْ الْعِرِسْ، مَا تُخُطّ نَفْسَكْ فِي بَكَانْ الْكُبَارَاتْ. أَكُونْ عَزَمَوْا ضَيْف كَبِيرْ مِنَّكْ. ٩ وَ النَّادُمْ الْعَزَمَاكُو يَجِي لَيْك وَ يُقُولْ: ‹خَلِّي الرَّاجِلْ دَا يَقْعُدْ فِي بَكَانَكْ.› وَ خَلَاصْ الْعَيْب يَكُرْبَكْ وَ تُقُمّ تَمْشِي فِي الْبَكَانْ الْوَرَاءْ.

١٠ «لَاكِنْ كَنْ يَعَزُمُوكْ، أَمْشِي أَقْعُدْ فِي الْبَكَانْ الْوَرَاءْ. وَ فِي الْحَالَةْ دِي، وَكِتْ سِيدْ الْبَيْت يَجِي لَيْك، هُو يُقُولْ: ‹يَا رَفِيقِي، تَعَالْ قِدَّامْ.› وَ مِثِلْ دَا هُو يِشَرِّفَكْ قِدَّامْ كُلَّ النَّاسْ الْمَعَاكْ فِي الْعَازُومَةْ. ١١ أَشَانْ أَيِّ نَادُمْ الْيِسَوِّي نَفْسَهْ كَبِيرْ، اللّٰهْ يِسَوِّيهْ صَغَيَّرْ. وَ النَّادُمْ الْيِسَوِّي نَفْسَهْ صَغَيَّرْ، اللّٰهْ يِسَوِّيهْ كَبِيرْ.»

١٢ وَ عِيسَى حَجَّى لِلنَّادُمْ الْعَزَمَهْ فِي بَيْتَهْ وَ قَالْ: «كَنْ تِسَوِّي عَازُومَةْ وَلَّا حَفْلَةْ، مَا تَعَزِمْ رُفْقَانَكْ وَ لَا أَخْوَانَكْ وَ لَا نَاسْ قَبِيلْتَكْ وَ لَا جِيرَانَكْ سِيَادْ الْمَالْ. أَشَانْ كَنْ تَعَزِمْ النَّاسْ دَوْل، أَكُونْ هُمَّنْ يَعَزُمُوكْ فِي عَازُومِتْهُمْ وَ دَا بَسْ يَبْقَى لَيْك أَجْرَكْ. ١٣ لَاكِنْ وَكِتْ تِسَوِّي عَازُومَةْ، أَعَزِمْ الْمَسَاكِينْ وَ الْمَعْضُورِينْ وَ الْعُرُجْ وَ الْعَمْيَانِينْ أَشَانْ يَاكُلُوا مَعَاكْ. ١٤ وَ اللّٰهْ يِبَارِكَكْ أَشَانْ هُمَّنْ مَا يَقْدَرَوْا يِقَبُّلُوا لَيْك شَيّءْ. وَ اللّٰهْ يِآجِرَكْ وَكِتْ بُعَاثْ الصَّالِحِينْ.»

مَثَل العازومة و الضيفان

١٥ وَ نَادُمْ وَاحِدْ الْقَاعِدْ يَاكُلْ مَعَايَهْ سِمِعْ الْكَلَامْ دَا وَ حَجَّى لِعِيسَى وَ قَالْ: «مَبْرُوكْ لِلنَّاسْ الْيِلْعَشَّوْا فِي عَازُومَةْ هَنَا مَمْلَكَةْ اللّٰهْ!»

١٦ وَ عِيسَى رَدَّ لَيَّهْ وَ قَالْ: «يَوْم مِنْ الْأَيَّامْ، فِي نَادُمْ وَاحِدْ سَوَّى عَازُومَةْ كَبِيرَةْ بِلْحَيْن وَ عَزَمْ فَوْقهَا نَاسْ كَتِيرِينْ. ١٧ وَ وَكِتْ الْعَازُومَةْ تَمَّ، هُو رَسَّلْ عَبْدَهْ لِلنَّاسْ الْمَعْزُومِينْ أَشَانْ يُقُولْ: ‹خَلَاصْ، تَعَالُوا! كُلَّ شَيّءْ جَاهِزْ لَيْكُو.› ١٨ وَ لَاكِنْ كُلُّهُمْ طَلَبَوْا مِنَّهْ يِسَامِحْهُمْ أَشَانْ مَا يَجُوا. النَّادُمْ الْأَوَّلْ قَالْ: ‹هَسَّعْ بَسْ بِعْت زَرَعْ وَ وَاجِبْ نَمْشِي نِشِيفَهْ. نَطْلُبْ مِنَّكْ تِسَامِحْنِي. أَنَا مَا نَجِي.› ١٩ وَ نَادُمْ آخَرْ قَالْ: ‹أَنَا بِعْت عَشَرَةْ تِيرَانْ أَشَانْ يَخْدُمُوا بِحَرَّاتَاتِي وَ أَنَا مَاشِي نِجَرِّبْهُمْ. أَشَانْ دَا، نَطْلُبْ مِنَّكْ تِسَامِحْنِي. أَنَا مَا نَجِي.› ٢٠ وَ نَادُمْ آخَرْ قَالْ: ‹أَخَدْت مَرَةْ وَ أَشَانْ دَا مَا نَقْدَرْ نَجِي.›

٢١ «وَ الْعَبِدْ قَبَّلْ لِسِيدَهْ وَ أَوْرَاهْ بِكَلَامْهُمْ. وَ سِيدْ الْبَيْت دَا زِعِلْ زَعَلْ شَدِيدْ وَ قَالْ لِعَبْدَهْ: ‹يَلَّا، أَمْشِي عَجَلَةْ عَجَلَةْ فِي شَوَارِعْ الْمَدِينَةْ وَ فِي كُلَّ دُرُوبْهَا وَ جِيبْ فِي بَيْتِي الْمَسَاكِينْ وَ الْمَعْضُورِينْ وَ الْعَمْيَانِينْ وَ الْعُرُجْ.› ٢٢ وَ بَعَدْ شِيَّةْ، الْعَبِدْ قَالْ لَيَّهْ: ‹يَا سِيدِي، أَنَا سَوَّيْت مِثِلْ إِنْتَ أَمَرْتِنِي بَيَّهْ وَ الْبَكَانْ لِسَّاعْ فَضَّلْ.› ٢٣ وَ سِيدَهْ رَدَّ لَيَّهْ وَ قَالْ: ‹أَمْشِي بَرَّا مِنْ الْمَدِينَةْ فِي دُرُوبْ الْكَدَادَةْ وَ أَعَصِرْهُمْ لِلنَّاسْ أَشَانْ يَجُوا فِي الْعَازُومَةْ لَحَدِّي بَيْتِي يِنْمَلِي. ٢٤ وَ نُقُولْ لَيْكُو مَا فِي نَادُمْ وَاحِدْ مِنْ النَّاسْ الْأَوَّلْ عَزَمْتُهُمْ يَاكُلْ شَيّءْ مِنْ عَازُومْتِي.›»

تبِعين المسيح ما هيِّن

٢٥ وَ نَاسْ كَتِيرِينْ بِلْحَيْن مَاشِينْ مَعَ عِيسَى. وَ هُو أَنْلَفَتْ لَيْهُمْ وَ قَالْ: ٢٦ «كَنْ نَادُمْ يِدَوْر يَبْقَى تِلْمِيذِي، وَاجِبْ يِرِيدْنِي زِيَادَةْ مِنْ أَبُوهْ وَ أَمَّهْ وَ مَرْتَهْ وَ عِيَالَهْ وَ أَخْوَانَهْ وَ أَخْوَاتَهْ. وَاجِبْ يِرِيدْنِي زِيَادَةْ مِنْ نَفْسَهْ كُلَ. ٢٧ وَ كَنْ نَادُمْ أَبَى مَا يِلْحَمَّلْ تَعَبْ الصَّلِيبْ وَ مَا يِتَابِعْنِي لِلْمَوْت، مَا يَقْدَرْ يَبْقَى تِلْمِيذِي.

٢٨ «كَنْ نَادُمْ مِنْكُو يِدَوْر يَبْنِي قَصِرْ، يِسَوِّي شُنُو؟ أَوَّلْ شَيّءْ، هُو يَقْعُدْ تِحِتْ وَ يِسَوِّي الْحِسَابْ أَشَانْ يَعَرِفْ كَنْ عِنْدَهْ قُرُسْ الْوَاجِبْ لِيِكَمِّلْ الْبُنَى. ٢٩ هُو مَا يِدَوْر يُخُطّ أَسَاسْ الْقَصِرْ كَنْ مَا يَقْدَرْ يِكَمِّلَهْ أَشَانْ كُلَّ النَّاسْ الْيِشِيفُوهْ، يِشَّمَّتَوْا لَيَّهْ. ٣٠ يُقُولُوا: ‹النَّادُمْ دَا بَدَا يَبْنِي لَاكِنْ مَا قِدِرْ يِكَمِّلَهْ.›

٣١ «وَ كَنْ نَادُمْ مَلِكْ وَ يِدَوْر يِدَاوِسْ مَلِكْ آخَرْ، يِسَوِّي شُنُو؟ أَوَّلْ شَيّءْ، هُو يِفَكِّرْ عَدِيلْ. هُو يِدَوْر يَعَرِفْ كَنْ بِعَسْكَرَهْ الْعَشَرَةْ أَلِفْ هُو يَقْدَرْ يِدَاوِسْ الْمَلِكْ الْعِنْدَهْ عِشْرِينْ أَلِفْ عَسْكَرْ. ٣٢ وَ كَنْ مَا يَقْدَرْ، هُو يِرَسِّلْ نَادُمْ أَشَانْ يِمَثِّلَهْ وَكِتْ الْعَدُو لِسَّاعْ قَاعِدْ بَعِيدْ أَشَانْ يِسَوِّي مَعَايَهْ صُلُحْ. ٣٣ وَ بِمِثِلْ دَا، كَنْ أَيِّ نَادُمْ مِنْكُو مَا يِخَلِّي مِنَّهْ كُلَّ شَيّءْ الْعِنْدَهْ، هُو مَا يَقْدَرْ يَبْقَى تِلْمِيذِي.

٣٤ «تَعَرْفُوا كَدَرْ الْمِلِحْ عَدِيلْ. لَاكِنْ كَنْ طَعَامَهْ بِقِي مَا فِيهْ، شُنُو يِقَبِّلَهْ؟ ٣٥ الْمِلِحْ الْمِثِلْ دَا مَا عِنْدَهْ فَايْدَةْ وَ لَا لِلتُّرَابْ وَ لَا لِلْبَعَرْ. وَ خَلَاصْ، النَّاسْ يِدَفُّقُوهْ بَرَّا. أَيِّ نَادُمْ الْعِنْدَهْ أَدَانْ لِلسَّمَعْ، خَلِّي يَسْمَعْ!»