لُوقا 13

التَوْبة واجِب لكل الناس

١ وَ فِي الْوَكِتْ دَا بَسْ، نَاسْ وَاحِدِينْ جَوْا لِعِيسَى وَ أَوْرَوْه بِخَبَرْ النَّاسْ مِنْ دَارْ الْجَلِيلْ. النَّاسْ دَوْل، بِلَاطُسْ كَتَلَاهُمْ فِي بَيْت اللّٰهْ وَ خَلْبَطْ دَمُّهُمْ مَعَ دَمّ ضَحَايَاهُمْ. ٢ وَ عِيسَى رَدَّ لَيْهُمْ وَ قَالْ: «بِسَبَبْ مَوْتهُمْ الشَّيْن دَا، فِي فِكِرْكُو الْجَلِيلِيِّينْ دَوْل مُذْنِبِينْ زِيَادَةْ مِنْ النَّاسْ الْآخَرِينْ الْمِنْ دَارْ الْجَلِيلْ وَلَّا؟ ٣ نُقُولْ لَيْكُو لَا. وَ كَنْ إِنْتُو مَا تُتُوبُوا مِنْ ذُنُوبْكُو، كُلُّكُو تَهْلَكَوْا مِثِلْهُمْ. ٤ وَ سِمِعْتُوا خَبَرْ هَنَا النَّاسْ التَّمَانِيَةَ عَشَرْ الْقَصِرْ سِلْوَامْ وَقَعْ فَوْقهُمْ وَ كَتَلَاهُمْ. وَ فِي فِكِرْكُو، هُمَّنْ خَاطِيِّينْ زِيَادَةْ مِنْ كُلَّ النَّاسْ الْآخَرِينْ السَّاكْنِينْ فِي مَدِينَةْ الْقُدُسْ وَلَّا؟ ٥ نُقُولْ لَيْكُو لَا. وَ كَنْ إِنْتُو مَا تُتُوبُوا مِنْ ذُنُوبْكُو، كُلُّكُو تَهْلَكَوْا مِثِلْهُمْ.»

٦ وَ عِيسَى حَجَّى لَيْهُمْ بِمَثَلْ وَ قَالْ: «نَادُمْ وَاحِدْ عِنْدَهْ جِنَيْنَةْ هَنَا عِنَبْ وَ شَدَرَةْ تِينْ كُلَ قَاعِدَةْ فَوْقهَا. وَ مَشَى لَيْهَا وَ فَتَّشْ فَوْقهَا تِينْ وَ مَا لِقِي شَيّءْ. ٧ وَ حَجَّى لِلْخَدَّامْ الْمَسْؤُولْ فِي الْجِنَيْنَةْ وَ قَالْ: ‹شِيفْ! مِنْ تَلَاتَةْ سَنَةْ أَنَا قَاعِدْ نَجِي نِفَتِّشْ عِيَالْ مِنْ الشَّدَرَةْ دِي وَ مَا لِقِيتْ فَوْقهَا شَيّءْ. مَالَا نِخَلِّيهَا تَفْسِدْ التُّرَابْ؟ أَقْطَعْهَا!› ٨ وَ الْخَدَّامْ رَدَّ لَيَّهْ وَ قَالْ: ‹يَا سَيِّدِي! خَلِّيهَا تَقْعُدْ سَنَةْ وَاحِدَةْ بَتَّانْ. وَ أَنَا نَحْفِرْ التُّرَابْ الْجَايْ وَ جَايْ لَيْهَا وَ نِزِيدْ لَيْهَا بَعَرْ. ٩ أَكُونْ فِي السَّنَةْ الْجَايَةْ تَلْدَ عِيَالْ. وَ كَنْ مَا وِلْدَتْ، خَلَاصْ أَقْطَعْهَا.›»

المسيح شفى مرة في يوم السبْت

١٠ يَوْم السَّبْت عِيسَى قَاعِدْ يِعَلِّمْ النَّاسْ فِي بَيْت الصَّلَاةْ. ١١ وَ فِي مَرَةْ وَاحِدَةْ تَعْبَانَةْ. شَيْطَانْ وَاحِدْ ضَرَبَاهَا وَ مِنْ 18 سَنَةْ، ضَهَرْهَا مُكَنْجَرْ وَ مَا تَقْدَرْ تِنْعَدِلْ. ١٢ وَ عِيسَى شَافَاهَا وَ نَادَاهَا. وَ قَالْ لَيْهَا: «يَا مَرَةْ زَيْنَةْ. خَلَاصْ، لِقِيتِ الْعَافَيْ. إِنْتِ مَا مَرْبُوطَةْ بَتَّانْ.» ١٣ وَ خَطَّ إِيدَيْنَهْ فَوْقهَا وَ عَجَلَةْ كَيْ هِي مَطَّطَتْ ضَهَرْهَا عَدِيلْ وَ شَكَرَتْ اللّٰهْ.

١٤ لَاكِنْ مَسْؤُولْ هَنَا بَيْت الصَّلَاةْ زِعِلْ أَشَانْ عِيسَى شَفَاهَا فِي يَوْم السَّبْت. وَ حَجَّى لِلنَّاسْ وَ قَالْ: «فِي الْأُسْبُوعْ عِنْدُكُو سِتَّةْ أَيَّامْ لِلْخِدْمَةْ. خَلِّي تَجُوا فِي الْأَيَّامْ دَوْل أَشَانْ تَلْقَوْا الْعَافَيْ لَاكِنْ مَا فِي يَوْم السَّبْت.»

١٥ وَ الرَّبّ عِيسَى رَدَّ لَيَّهْ وَ قَالْ: «يَا الْمُنَافِقِينْ! فِي يَوْم السَّبْت، أَكِيدْ أَيِّ نَادُمْ مِنْكُو يِحِلّ تَوْرَهْ وَلَّا حُمَارَهْ مِنْ شَايْتَهْ وَ يِوَدِّيهْ لِيَزْقِيهْ أَلْمِي. ١٦ وَ الْمَرَةْ دِي، هِي مِنْ أَوْلَادْ إِبْرَاهِيمْ وَ الشَّيْطَانْ رَبَطْهَا. وَ مِنْ 18 سَنَةْ هِي مَرْبُوطَةْ. وَ كِكَّيْف مَا وَاجِبْ نِحِلَّهَا مِنْ رُبَاطْهَا فِي يَوْم السَّبْت؟»

١٧ وَ بِكَلَامَهْ دَا، الْعَيْب دَخَلْ لِكُلَّ النَّاسْ الدَّوَّرَوْا يَدْحَرَوْه. وَ كُلَّ النَّاسْ فِرْحَوْا بِكُلَّ الْعَمَلْ الْمَجِيدْ الْعِيسَى قَاعِدْ يِسَوِّيهْ.

أمْثال الخرْدل و التوّارة

١٨ وَ بَتَّانْ عِيسَى قَالْ: «مَمْلَكَةْ اللّٰهْ هِي كِكَّيْف؟ هِي تِشَابِهْ شُنُو؟ ١٩ هِي صَغَيْرَةْ مِثِلْ حَبَّةْ الْخَرْدَلْ. وَ رَاجِلْ وَاحِدْ شَالْهَا وَ تَيْرَبَاهَا فِي جِنَيْنِتَهْ. وَ هِي بَذَرَتْ وَ بِقَتْ كَبِيرَةْ مِثِلْ شَدَرَةْ. وَ طُيُورْ السَّمَاءْ جَوْا وَ بَنَوْا عُشُوشْهُمْ فِي فُرُوعْهَا.»

٢٠ وَ بَتَّانْ عِيسَى قَالْ: «نُقُولْ مَمْلَكَةْ اللّٰهْ تِشَابِهْ مِثِلْ شُنُو؟ ٢١ مَمْلَكَةْ اللّٰهْ تِشَابِهْ مِثِلْ التَّوَّارَةْ. وَ مَرَةْ وَاحِدَةْ شَالَتْهَا وَ صَبَّتْهَا دَاخَلْ فِي لُبّ تَلَاتَةْ كَوْرَوْ هَنَا دَقِيقْ. وَ بَعَدَيْن التَّوَّارَةْ قَوَّمَتْ الْعَجِينَةْ كُلَّهَا كَيْ.»

الدرِب الضيِّق

٢٢ وَ وَكِتْ عِيسَى مُسَافِرْ لِمَدِينَةْ الْقُدُسْ، قَاعِدْ يِعَلِّمْ النَّاسْ فِي الْمُدُنْ وَ الْحِلَّالْ الْفِي دَرْبَهْ. ٢٣ وَ نَادُمْ وَاحِدْ سَأَلَهْ وَ قَالْ: «يَا سَيِّدْنَا، النَّاسْ الْيَنْجَوْا شِيَّةْ وَلَّا؟»

وَ عِيسَى حَجَّى لِلنَّاسْ وَ قَالْ: ٢٤ «جَاهُدُوا لِتَدْخُلُوا بِدَرِبْ الضَّيِّقْ أَشَانْ نُقُولْ لَيْكُو بَعَدَيْن نَاسْ كَتِيرِينْ يِدَوْرُوا يَدْخُلُوا وَ مَا يَقْدَرَوْا. ٢٥ كَنْ سِيدْ الْبَيْت قَمَّ سَدَّ الدَّرِبْ وَ إِنْتُو وَاقْفِينْ بَرَّا، تُقُمُّوا تُدُقُّوا الْبَابْ وَ تُقُولُوا: ‹سَيِّدْنَا، أَفْتَحْ لَيْنَا.› وَ هُو يُرُدّ لَيْكُو وَ يُقُولْ: ‹مَا نَعَرِفْكُو. إِنْتُو كَيْ مِنْ وَيْن؟› ٢٦ وَ فِي الْبَكَانْ دَا، إِنْتُو تُقُولُوا: ‹أَنِحْنَ أَكَلْنَا وَ شِرِبْنَا مَعَاكْ. وَ إِنْتَ عَلَّمْت النَّاسْ فِي شَوَارِعْنَا.› ٢٧ لَاكِنْ هُو يُقُولْ: ‹نُقُولْ لَيْكُو مَا نَعَرِفْ إِنْتُو يَاتُمَّنْ. يَلَّا كِسُّوا مِنِّي بَعِيدْ، إِنْتُو الْفَسْلِينْ!›

٢٨ «وَ فِي الْبَكَانْ دَا، تَبْكُوا وَ تِعَضُّوا سُنُونْكُو مِنْ النَّدَامَةْ أَشَانْ تِشِيفُوا إِبْرَاهِيمْ وَ إِسْحَاقْ وَ يَعْقُوبْ وَ كُلَّ الْأَنْبِيَاء يَدْخُلُوا فِي مَمْلَكَةْ اللّٰهْ وَ إِنْتُو كَمَانْ مَطْرُودِينْ مِنْهَا. ٢٩ وَ النَّاسْ يَجُوا مِنْ صَبَاحْ وَ غَرِبْ وَ مِنْ مُنْشَاقْ وَ وَطِي وَ يَدْخُلُوا يِلْعَشَّوْا فِي مَمْلَكَةْ اللّٰهْ. ٣٠ وَ خَلَاصْ النَّاسْ الْوَرَاءْ يَبْقَوْا قِدَّامْ وَ النَّاسْ الْقِدَّامْ يَبْقَوْا وَرَاءْ.»

كلام المسيح البُخُصّ القدس

٣١ وَ فِي الْوَكِتْ دَا، نَاسْ وَاحِدِينْ مِنْ الْفَرِيزِيِّينْ جَوْا لِعِيسَى وَ قَالَوْا: «يَلَّا، أَمْشِي مِنْ الْبَكَانْ دَا. هِرُودُسْ يِدَوْر يَكْتُلَكْ تَرَى!»

٣٢ وَ رَدَّ لَيْهُمْ وَ قَالْ: «أَمْشُوا لِلْبَعَشَوْم دَا وَ قُولُوا لَيَّهْ: ‹أَسْمَعْ. الْيَوْم أَنَا نَطْرُدْ الشَّوَاطِينْ وَ نَشْفِي الْمَرْضَانِينْ وَ أَمْبَاكِرْ نِسَوِّي نَفْس الشَّيّءْ. فِي الْيَوْم التَّالِتْ حَتَّى نِكَمِّلْ خِدِمْتِي.› ٣٣ أَيْوَى، الْيَوْم وَ أَمْبَاكِرْ وَ أَمْبُكْرَةْ وَاجِبْ نَمْشِي قِدَّامْ أَشَانْ مَا وَاجِبْ لِأَيِّ نَبِي يُمُوتْ، إِلَّا فِي مَدِينَةْ الْقُدُسْ.

٣٤ «يَا مَدِينَةْ الْقُدُسْ! يَا مَدِينَةْ الْقُدُسْ! يَا كَتَّالِينْ الْأَنْبِيَاء! إِنْتُو التَّرْجُمُوا النَّاسْ الْاللّٰهْ يِرَسِّلْهُمْ لَيْكُو. كَمْ مَرَّةْ دَوَّرْت نِلِمّ عِيَالْكُو مِثِلْ الْجِدَادَةْ تِلِمّ عِيَالْهَا تِحِتْ جَنَاحَيْهَا. لَاكِنْ إِنْتُو أَبَيْتُوا. ٣٥ شِيفُوا يِخَلُّوا بَيْتكُو يَابِسْ. وَ خَلَاصْ نُقُولْ لَيْكُو مَا تِشِيفُونِي بَتَّانْ لَحَدِّي تُقُولُوا: ﴿مَبْرُوكْ لِلنَّادُمْ الْجَايِ بِأُسُمْ اللّٰهْ.﴾»