١١٤
١ وَكِتْ بَنِي إِسْرَائِيلْ مَرَقَوْا مِنْ بَلَدْ مَصِرْ
وَ هُمَّنْ ذُرِّيَّةْ يَعْقُوبْ
الْمَرَقَوْا مِنْ أُسُطْ شَعَبْ أَجْنَبِي،
٢ بَنِي يَهُوذَا بِقَوْا بَيْتَهْ الْمُقَدَّسْ
وَ بَنِي إِسْرَائِيلْ بِقَوْا بَكَانَهْ الْحَلَالَهْ.
٣ الْبَحَرْ الْأَحْمَرْ شَافْ الشَّيّءْ دَا وَ جَرَى*
وَ بَحَرْ الْأُرْدُنْ كَسَّ وَرَاءْ.*
٤ الْجِبَالْ نَطَّطَوْا مِثِلْ كُبْشَانْ
وَ الْحُجَارْ نَطَّطَوْا مِثِلْ حُمْلَانْ.
٥ يَا الْبَحَرْ الْأَحْمَرْ،
مَالَا جَرَيْت؟
يَا بَحَرْ الْأُرْدُنْ،
مَالَا كَسَّيْت؟
٦ يَا الْجِبَالْ،
مَالَا نَطَّطْتُوا مِثِلْ كُبْشَانْ؟
يَا الْحُجَارْ،
مَالَا نَطَّطْتُوا مِثِلْ حُمْلَانْ؟
٧ يَا الْأَرْض،
أَرْجِفِي قِدَّامْ الرَّبّ،
قِدَّامَهْ هُو إِلٰـهْ يَعْقُوبْ،
٨ هُو السَّوَّى الْحَجَرْ رَهَدْ أَلْمِي*
وَ الْحَصْحَصْ،
عَيْن أَلْمِي جَارِي.