١١٢
١ *الْحَمْدُ للّٰهْ!
مَبْرُوكْ لِلنَّادُمْ الْيَخَافْ مِنْ اللّٰهْ
وَ يَفْرَحْ زِيَادَةْ بِوَصِيَّاتَهْ.
٢ عِيَالَهْ يَبْقَوْا فَحَلِينْ فِي الْبَلَدْ
أَيْوَى،
ذُرِّيَّةْ الصَّالِحِينْ تَلْقَى بَرَكَةْ.
٣ وَ فِي بَيْتَهْ يِنْلَقُوا مَالْ وَ غُنَى
وَ عَدَالْتَهْ تَقْعُدْ دَايْماً.
٤ فِي الضَّلَامْ،
يِبِينْ نُورْ لِلنَّادُمْ الْعَدِيلْ
وَ لِلْحَنُونْ وَ الرَّحِيمْ وَ الصَّالِحْ.
٥ عَدِيلْ هُو النَّادُمْ الْيِحِنّ وَ يِدَيِّنْ
وَ يِسْتَعْمَلْ مَالَهْ حَسَبْ الْعَدَالَةْ.
٦ وَ بَيْدَا،
مَا يِتَّرْتَعْ أَبَداً
أَيْوَى،
الصَّالِحْ يِذَّكَّرَوْه دَايْماً.
٧ هُو مَا يَخَافْ مِنْ الْخَبَرْ الشَّيْن
وَ قَلْبَهْ ثَابِتْ وَ مُتَوَكِّلْ عَلَيْ اللّٰهْ.
٨ قَلْبَهْ قَوِي،
هُو مَا يَخَافْ
لَحَدِّي هَزِيمَةْ خُصْمَانَهْ تِنْشَافْ.
٩ هُو يَنْطِي لِلْمَسَاكِينْ بِجُودْ
وَ عَدَالْتَهْ تَقْعُدْ دَايْماً
وَ بِشَرَفْ،
هُو يَرْفَعْ رَاسَهْ.
١٠ الْعَاصِي يِشِيفَهْ وَ يَغْضَبْ
وَ يِعَضِّي شَلَالِيفَهْ وَ يِأَيِّسْ
أَيْوَى،
عَشَمْ الْعَاصِيِينْ
يِنْقَطِعْ مَرَّةْ وَاحِدْ.