مَزْمُورْ
٩٨
١ غَنُّوا لِلّٰهْ غِنَيْ جَدِيدْ
أَشَانْ هُو سَوَّى عَجَايِبْ.
بِزَيْنَايْتَهْ وَ دُرَاعَهْ الْمُقَدَّسْ،
هُو جَابْ النَّجَاةْ.
٢ اللّٰهْ عَرَّفْ نَجَاتَهْ
وَ قِدَّامْ الْأُمَمْ،
بَيَّنْ عَدَالْتَهْ.
٣ هُو فَكَّرْ فِي رَحْمَتَهْ
وَ صِدْقَهْ مَعَ بَنِي إِسْرَائِيلْ.
لَحَدِّي آخِرْ الْأَرْض،
شَافَوْا نَجَاتْنَا
الْجَايَةْ مِنْ إِلٰـهْنَا.
٤ أَفْرَحَوْا بِاللّٰهْ،
يَا سُكَّانْ كُلَّ الْأَرْض!
زَغْرُطُوا وَ غَنُّوا!
٥ غَنُّوا لِلّٰهْ بِجِقِنْدِيَّةْ،
أَيْوَى،
بِجِقِنْدِيَّةْ وَ بِغِنَيْ.
٦ بِحِسّ بُرُنْجِي وَ بُوقْ،
أَفْرَحَوْا قِدَّامْ اللّٰهْ الْمَلِكْ!
٧ خَلِّي الْبَحَرْ يِدَقْدِقْ
بِكُلَّ شَيّءْ الْفِي لُبَّهْ
وَ الْعَالَمْ وَ سُكَّانَهْ كُلَ.
٨ خَلِّي الْبُحُورْ يِصَفُّقُوا
وَ مَعَاهُمْ،
خَلِّي الْجِبَالْ يِزَغْرُطُوا!
٩ يِزَغْرُطُوا قِدَّامْ اللّٰهْ
أَشَانْ يَجِي يَحْكِمْ الْأَرْض.
هُو يَحْكِمْ الْعَالَمْ بِالْعَدَالَةْ
وَ الشُّعُوبْ بِالْحَقّ.