٩٤
١ يَا اللّٰهْ،
إِنْتَ الْإِلٰـهْ التِّشِيلْ التَّارْ!
يَا إِلٰـهْ التِّشِيلْ التَّارْ،
بَيِّنْ نَفْسَكْ!
٢ قُمّ،
يَا قَاضِي الْأَرْض،
ضِدّ الْمُسْتَكْبِرِينْ.
عَاقِبْهُمْ الْعِقَابْ الْوَاجِبْ لَيْهُمْ.
٣ لَحَدِّي مَتَى،
يَا اللّٰهْ؟
لَحَدِّي مَتَى الْعَاصِيِينْ يِنْبَسْطُوا؟
٤ كَلَامْ هَنَا إِسْتِكْبَارْ يَمْرُقْ مِنْ خُشُومْهُمْ،
هُمَّنْ وَ كُلَّ الْفَسْلِينْ دَوْل يِفَاشُرُوا.
٥ يَا اللّٰهْ،
هُمَّنْ يِتَعُّبُوا شَعَبَكْ
وَ يِضَايُقُوا نَاسَكْ الْمِثِلْ وَرَثَتَكْ.
٦ يَكْتُلُوا الْأَرْمَلَةْ وَ الْأَجْنَبِي
وَ يِكَمُّلُوا الْأَتَامَا.
٧ وَ يُقُولُوا:
«اللّٰهْ مَا يِشِيفْ شَيّءْ!
أَيْوَى،
إِلٰـهْ يَعْقُوبْ مَا يَعَرِفْ.»
٨ يَا الْمُغَفَّلِينْ فِي أُسْط الشَّعَبْ،
فَكُّرُوا عَدِيلْ.
مَتَى تَفْهَمَوْا،
إِنْتُو الْمَطَامِيسْ؟
٩ الْخَلَقْ الْأُدْنَيْ مَا يَسْمَعْ وَلَّا؟
وَ السَّوَّى الْعُيُونْ مَا يِشِيفْ وَلَّا؟
١٠ وَ الْيِأَدِّبْ الْأُمَمْ مَا يُلُومْهُمْ وَلَّا؟
هُو بَسْ يِعَلِّمْ الْمَعْرَفَةْ لِلْإِنْسَانْ.
١١ اللّٰهْ يَعَرِفْ أَفْكَارْ الْإِنْسَانْ
أَشَانْ هُمَّنْ زَايْلِينْ.
١٢ يَا اللّٰهْ،
مَبْرُوكْ لِلنَّادُمْ الْإِنْتَ تِأَدِّبَهْ
وَ تِعَلِّمَهْ تَوْرَاتَكْ.
١٣ تَنْطِيهْ الرَّاحَةْ فِي أَيَّامْ الْفَسَالَةْ
لَحَدِّي يَحْفُرُوا قَبُرْ لِلْعَاصِيِينْ.
١٤ اللّٰهْ مَا يِخَلِّي شَعَبَهْ
وَ مَا يَابَى نَاسَهْ الْمِثِلْ وَرَثَتَهْ.
١٥ الشَّرِيعَةْ تِنْقَطِعْ حَسَبْ الْعَدَالَةْ
وَ كُلَّ النَّاسْ الْقَلِبْهُمْ عَدِيلْ يِتَابُعُوهَا.
١٦ يَاتُو الْيُقُمّ
ضِدّ الْيِسَوُّوا لَيِّ الْفَسَالَةْ؟
وَ يَاتُو الْيَقِيفْ
ضِدّ الْيِسَوُّوا لَيِّ الظُّلُمْ؟
١٧ كَنْ اللّٰهْ مَا فَزَعْنِي،
نَفْسِي تَسْكُنْ فِي الْقُبُورْ.
١٨ وَ وَكِتْ نُقُولْ:
«نِتَّرْتَعْ»،
رَحْمَتَكْ تَلْزَمْنِي،
يَا اللّٰهْ.
١٩ وَ وَكِتْ نِهِمّ زِيَادَةْ،
أَنَا نَفْرَحْ أَشَانْ إِنْتَ تِصَبِّرْنِي.
٢٠ هَلْ الْحَاكِمْ الْمُدَمِّرْ
يِشْتَرِكْ مَعَاكْ وَلَّا؟
هَلْ الْمُضَايِقْ بِقَوَانِينَهْ
يِنْضَمَّ لَيْك وَلَّا؟
٢١ يُقُمُّوا ضِدّ الصَّالِحْ
وَ يَتْهَمَوْا الْبَرِي بِدِمَّةْ.
٢٢ وَ لَاكِنْ اللّٰهْ بِقِي مَسْكَنِي الْقَوِي
وَ إِلٰـهِي هُو جَبَلِي الْيَحْمِينِي.
٢٣ هُو رَمَى لَيْهُمْ ذُنُوبْهُمْ فِي رَاسْهُمْ
وَ بِفَسَالِتْهُمْ بَسْ،
سَكَّتَاهُمْ مَرَّةْ وَاحِدْ!
أَيْوَى،
اللّٰهْ إِلٰـهْنَا بَسْ سَكَّتَاهُمْ.