وَصِيَّةْ لِكَبِيرْ الْغَنَّايِينْ: تَعْلِيمْ مِنْ دَاوُدْ، وَكِتْ دُوَاقْ الْأَدَوْمِي جَاءْ خَبَّرْ شَاوُولْ كَدَرْ دَاوُدْ مَشَى بَكَانْ أَخِيمَلِكْ*
٥٢
١ مَالَا تِفَاشِرْ بِفَسَالْتَكْ،
يَا الْفَحَلْ؟
وَ مَالَا تُقُولْ دَايْماً رَحْمَةْ الرَّبّ قَاعِدَةْ فَوْقَكْ؟
٢ كَلَامَكْ يِجِيبْ الْخَرَابْ
وَ لِسَانَكْ طَرِينْ مِثِلْ الْمُوسْ،
يَا الْكَدَّابْ!
٣ إِنْتَ تِحِبّ الشَّرّ زِيَادَةْ مِنْ الْخَيْر
وَ الْكِدِبْ زِيَادَةْ مِنْ الصَّحِيحْ.
وَقْفَةْ.
٤ تِحِبّ أَيِّ كَلَامْ الْيِدَمِّرْ
وَ اللِّسَانْ الْيُغُشّ.
٥ الرَّبّ يِدَمِّرَكْ إِلَى الْأَبَدْ،
يَكُرْبَكْ وَ يَمُرْقَكْ مِنْ خَيْمِتَكْ
وَ يَطُرْدَكْ مِنْ أَرْض الْحَيِّينْ.
وَقْفَةْ.
٦ الصَّالِحِينْ يِشِيفُوا وَ يَخَافَوْا
وَ يَضْحَكَوْا فَوْقَكْ وَ يُقُولُوا:
٧ «دَاهُو الْفَحَلْ مَا شَافْ
الرَّبّ مِثِلْ مَلْجَئَهْ
لَاكِنْ هُو أَتْوَكَّلْ عَلَيْ غُنَايَهْ الْكَتِيرْ
وَ هُو قَوِي بِفَسَالْتَهْ.»
٨ لَاكِنْ أَنَا كَمَانْ مِثِلْ شَدَرَةْ زَيْتُونْ خَضْرَةْ
فِي بَيْت اللّٰهْ
وَ نِتْوَكَّلْ عَلَيْ رَحْمَةْ الرَّبّ
إِلَى الْأَبَدْ.
٩ أَنَا نَشْكُرَكْ دَايْماً
فِي شَانْ الشَّيّءْ الْإِنْتَ سَوَّيْتَهْ.
وَ خَطَّيْت عَشَمِي فِي أُسْمَكْ
أَشَانْ إِنْتَ زَيْن لِمُؤمِنِينَكْ.