وَصِيَّةْ لِكَبِيرْ الْغَنَّايِينْ: لِيِغَنُّوهْ حَسَبْ الْحِسّ الْبِنَادُوهْ «نُوَّارْ السِّتَّيْب»، تَعْلِيمْ مِنْ أَوْلَادْ قُورَحْ، غِنَيْ هَنَا مَحَبَّةْ
٤٥
١ قَلْبِي أَنْمَلَى بِكَلَامْ جَمِيلْ
وَ أَنَا قُلْت شِعِرْ وَ عَظَّمْت الْمَلِكْ.
وَ خَلِّي لِسَانِي يَبْقَى مِثِلْ قَلَمْ
هَنَا كَاتِبْ مُتَخَصِّصْ.
٢ يَا الْمَلِكْ!
إِنْتَ جَمِيلْ مِنْ كُلَّ رُجَالْ
وَ خَشْمَكْ يُقُولْ دَايْماً كَلَامْ حَلُو.
فِي شَانْ دَا،
الرَّبّ بَارَكَكْ إِلَى الْأَبَدْ.
٣ أَرْبُطْ سَيْفَكْ فِي صُلْبَكْ،
يَا الْفَارِسْ!
أَيْوَى،
أَلْحَزَّمْ بِشَرَفَكْ وَ عَظَمَتَكْ.
٤ وَ بِعَظَمَتَكْ،
أَرْكَبْ جُوَادَكْ
وَ أَنَّصِرْ بِسَبَبْ الْحَقّ
وَ الْعَدَالَةْ وَ التَّوَاضُعْ!
وَ بِإِيدَكْ الزَّيْنَةْ،
تِسَوِّي أَشْيَاءْ يِخَوُّفُوا!
٥ نَشَاشِيبَكْ طُرَانْ،
يَطْعَنَوْا عُدْوَانْ الْمَلِكْ فِي قُلُوبْهُمْ.
أَيْوَى،
تِحْتَكْ يَقَعَوْا شُعُوبْ.
٦ يَا إِلٰـهِي!
عَرْشَكْ قَاعِدْ إِلَى الْأَبَدْ
وَ عَصَاةْ مُلْكَكْ،
هِي عَصَاةْ عَدَالَةْ.
٧ إِنْتَ تِحِبّ الْعَدَالَةْ
وَ تَكْرَهْ الظُّلُمْ.
أَشَانْ دَا،
الرَّبّ إِلٰـهَكْ عَزَلَكْ إِنْتَ بَسْ مِنْ رُفْقَانَكْ
وَ مَسَحَكْ بِدِهِنْ السُّرُورْ.
٨ وَ خُلْقَانَكْ مُدَخَّنِينْ
بِصَنْدَلْ وَ عُودْ الْقَمَارِيْ وَ عِرِقْ.
وَ مِنْ بُيُوتْ مُجَمَّلِينْ بِالْعَاجْ،
يَجِي حِسّ الْمُسِيقَى الْيِفَرِّحَكْ.
٩ بَنَاتْ الْمُلُوكْ قَاعِدَاتْ جَنْبَكْ،
لَابْسَاتْ زِينْتَكْ
وَ الْمَلِكَةْ وَاقْفَةْ بِزَيْنَايْتَكْ،
لَابْسَةْ دَهَبْ صَافِي مِنْ أُفِيرْ.
١٠ أَسْمَعَيْ،
يَا بِنَيَّةْ الْمَلِكْ!
شِيفِي وَ خُطِّي أَدَانْكِ!
أَنْسَيْ شَعَبْكِ وَ عَايِلِتْكِ.
١١ الْمَلِكْ يِحِبّ جَمَالْكِ.
أَبُرْكِي قِدَّامَهْ أَشَانْ هُو سِيدْكِ.
١٢ يَا بِنْت مَدِينَةْ صُورْ،
الْغَنِيِّينْ مِنْ الشَّعَبْ
يِجِيبُوا لَيْكِ هَدَايَا
أَشَانْ يَلْقَوْا رِضَاكِ.
١٣ خَلَاصْ بِكُلَّ عَظَمَةْ،
بِنْت الْمَلِكْ دَخَلَتْ،
لَابْسَةْ خَلَقْهَا الْمُدَهَّبْ.
١٤ وَدَّوْهَا لِلْمَلِكْ
لَابْسَةْ خُلْقَانْهَا الْمُلَوَّنِينْ.
وَ رَفِيقَاتْهَا التَّابْعَاتْهَا،
وَدَّوْهِنْ لَيْك إِنْتَ،
يَا الْمَلِكْ.
١٥ وَدَّوْهِنْ بِفَرَحْ وَ سُرُورْ
وَ دَخَلَنْ فِي قَصِرْ الْمَلِكْ.
١٦ أَوْلَادَكْ يِبَدُّلُوا أَبَّهَاتَكْ
وَ إِنْتَ تُخُطُّهُمْ حُكَّامْ فِي كُلَّ الْبَلَدْ.
١٧ وَ أَنَا نِذَّكَّرْ أُسْمَكْ
مِنْ ذُرِّيَّةْ لِذُرِّيَّةْ.
وَ بَيْدَا،
الشَّعَبْ يَشْكُرُوكْ
دَايْماً وَ إِلَى الْأَبَدْ.