وَصِيَّةْ لِكَبِيرْ الْغَنَّايِينْ: لِدَاوُدْ عَبْد اللّٰهْ
٣٦
١ الْعَاصِي يِتَابِعْ كَلَامْ قَلْبَهْ
وَ فِي نَفْسَهْ مَا عِنْدَهْ خَوْف مِنْ الرَّبّ.
٢ أَشَانْ هُو يُغُشّ نَفْسَهْ بِلْحَيْن
وَ بَيْدَا،
مَا يَعَرِفْ خَطَايَهْ وَ يَكْرَهَهْ.
٣ وَ كَلَامْ خَشْمَهْ فَسَالَةْ وَ غَشّ
وَ أَبَى الْحِكْمَةْ وَ خَلَّى الْخَيْر.
٤ فِي فُرَاشَهْ،
هُو يَنْوِي الْفَسَالَةْ
وَ الدَّرِبْ الشَّايْلَهْ مَا عَدِيلْ
وَ مَا يَرْفُضْ الشَّرّ.
٥ يَا اللّٰهْ!
رَحْمَتَكْ قَاعِدَةْ فِي السَّمَاءْ
وَ صِدْقَكْ يَمْشِي لَحَدِّي السَّحَابْ.
٦ وَ عَدَالْتَكْ مِثِلْ جِبَالْ الْعَالِيِينْ
وَ شَرِيعْتَكْ مِثِلْ أَلْمِي الْغَرِيقْ.
يَا اللّٰهْ!
إِنْتَ تِنَجِّي النَّاسْ
وَ الْبَهَايِمْ.
٧ رَحْمَتَكْ غَالِيَةْ،
يَا رَبّ،
وَ بَنِي آدَم يَلْجَأَوْا تِحِتْ جَنَاحَيْك.
٨ هُمَّنْ يَشْبَعَوْا
مِنْ لَحَمْ سَمِينْ هَنَا بَيْتَكْ
وَ إِنْتَ تَزْقِيهُمْ بِخَيْرَكْ
مِثِلْ أَلْمِي الْوَادِي الْمَا يِكَمِّلْ.
٩ أَشَانْ مَعَاكْ،
عَيْن أَلْمِي الْحَيَاةْ
وَ بِنُورَكْ،
نِشِيفُوا النُّورْ.
١٠ خَلِّي رَحْمَتَكْ تُدُومْ لِلْيَعَرْفُوكْ
وَ عَدَالْتَكْ تَقْعُدْ لِلنَّاسْ الْقُلُوبْهُمْ عَدِيلِينْ.
١١ خَلِّي الْمُسْتَكْبِرْ مَا يُخُطّ رِجْلَهْ فِي بَكَانِي
وَ إِيدَيْ الْعَاصِيِينْ كُلَ مَا يَطُرْدُونِي.
١٢ دَاهُو هِنَاكْ الْيِسَوُّوا الشَّرّ وَقَعَوْا!
هُمَّنْ أَنْبَطَحَوْا،
مَا يَقْدَرَوْا يُقُمُّوا!